民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 Ko-hat Chong-cho̍k ê Chit-chek
Siōng-chú hoan-hù Mô͘-se kah A-lông kóng,
4:2 " Lí tio̍h tùi Lē-bī lâng ê tiong-kan keng-kòe tiám-sǹg Ko-hat kiáⁿ-sun ê chóng-gia̍h, chiàu in ê ke-kháu kah chong-cho̍k.
4:3 Tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê, lóng tio̍h sǹg.
4:4 " Ko-hat ê kiáⁿ-sun tī hōe-bō͘ só͘ chò ê kang, to̍h-sī pān-lí chì-sèng ê mi̍h, kì tī ē-té:
4:5 Iâⁿ-tūi chhut-hoat ê sî, A-lông kah i ê kiáⁿ tio̍h ji̍p-khì pak jia-cha̍h ê tiùⁿ-lî, the̍h-lâi jia-khàm hoat-kūi.
4:6 Koh ēng hái-káu phôe khàm tī téng-bīn, koh khàm sûn nâ-sek ê pò͘, jiân-āu chiah chhēng i ê kǹg.
4:7 " Koh ēng nâ-sek ê pò͘ chhu tī pâi-lia̍t piáⁿ ê toh, kā chiahê pôaⁿ, sî, óaⁿ kah koàn-tiān ê poe pâi tī hit téng-bīn, tī hia mā tio̍h ū tiāⁿtiāⁿ pâi-siat ê piáⁿ.
4:8 Tī hit téng-bīn koh tio̍h tà chu-âng sek ê pò͘, koh ēng hái-káu phôe chò kòa lâi khàm, chiah chhng i ê kǹg.
4:9 " In tio̍h the̍h nâ-sek pò͘ lâi khàm chiò-kng ê teng-tâi kah i ê chóaⁿ, i ê chián, i ê pôaⁿ, í-ki̍p só͘-ū chò i ê lō͘-ēng té iû ê khì-kū.
4:10 Koh tio̍h kā teng-tâi kah i só͘-ū ê khì-kū, pau tī hái-káu phôe ê kòa lāi, hē tī chhâ-kè téng.
4:11 " Tī kim-tôaⁿ téng in tio̍h chhu nâ-sek ê pò͘, ēng hái-káu phôe chò kòa lâi khàm, chiah chhng i ê kǹg.
4:12 Koh tio̍h the̍h só͘ ēng lâi ho̍k-sāi ê khì-kū, to̍h-sī tī sèng-só͘ ēng lâi ho̍k-sāi ê, pau tī nâ-sek ê pò͘, ēng hái-káu phôe chò kòa lâi khàm, hē tī chhâ-kè téng.
4:13 In tio̍h siu tôaⁿ téng ê hóe-hu, ēng chí-sek ê pò͘ chhu tī hit téng-bīn.
4:14 Koh tio̍h kā in chò-kang só͘ ēng it-chhè ê khì-kū pâi tī téng-bīn, to̍h-sī hóe-tiáⁿ, bah-chhe, thuh-á, pôaⁿ, it-chhè sio̍k tī tôaⁿ ê khì-kū, koh ēng hái-káu phôe chò kòa lâi tà, chiah chhng i ê kǹg.
4:15 Iâⁿ-tūi beh chhut-hoat ê sî, A-lông kah i ê kiáⁿ kā sèng-só͘ kah sèng-só͘ só͘-ū ê khì-kū khàm liáu-āu, jiân-āu Ko-hat ê kiáⁿ-sun tio̍h lâi kng. " Chóng-.sī, m̄ thang bong sèng ê mi̍h, bián-tit in sí; hōe-bō͘ lāi chiahê mi̍h-kiāⁿ lóng sī Ko-hat ê kiáⁿ-sun só͘ tio̍h kng ê.
4:16 " Chè-si A-lông ê kiáⁿ Ê-lī-a-chal só͘ tio̍h kò͘-siú ê, sī tiám teng ê iû kah phang-liāu, í-ki̍p tiāⁿtiāⁿ hiàn ê sò͘-chè kah boah ê iû, mā tio̍h kò͘-siú choân hōe-bō͘ kah hit tiong-kan só͘-ū ê, í-ki̍p sèng-só͘ kah sèng-só͘ só͘-ū ê khì-kū. "
4:17 Siōng-chú hoan-hù Mô͘-se kah A-lông kóng,
4:18 " Lín m̄ thang kā Ko-hat lâng ka-cho̍k ê chi-cho̍k tùi Lē-bī lâng ê tiong-kan chián tû-.khì.
4:19 In óa-kīn chì-sèng ê mi̍h ê sî, lín tio̍h kā in ánne siat-hoat, hō͘ in ē oa̍h, bián-tit sí. A-lông kah i ê kiáⁿ tio̍h ji̍p-.khì, phài in ta̍k lâng só͘ tio̍h chò kah só͘ tio̍h kng ê.
4:20 Chóng-.sī, in chi̍t-sî-á to m̄ thang ji̍p-khì khòaⁿ sèng-só͘, bián-tit in ē sí-bông. "
4:21 Kel-sióng Chong-cho̍k ê Chit-chek
Siōng-chú hoan-hù Mô͘-se kóng,
4:22 " Lí tio̍h sǹg Kel-sióng kiáⁿ-sun ê chóng-gia̍h, chiàu in ê chong-cho̍k kah ke-kháu,
4:23 tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê lóng tio̍h sǹg.
4:24 Kel-sióng lâng chiahê ke ê kang-têng, só͘ tio̍h pān-lí, só͘ tio̍h kng ê, to̍h-sī chiahê:
4:25 In tio̍h kng hōe-bō͘ hiahê tiùⁿ-pak, í-ki̍p hōe-bō͘ kah i ê kòa kah tī hit téng-bīn hái-káu phôe chò ê kòa kah hōe-bō͘ ê mn̂g-lî,
4:26 īⁿ ê pò͘-ûi kah īⁿ mn̂g ê mn̂g-lî, ( īⁿ to̍h-sī ûi hōe-bō͘ kah tôaⁿ ê), soh-á kah só͘ ēng ê khì-kū, bô-lūn chò siáⁿ-mi̍h lō͘-ēng ê, in lóng tio̍h pān-lí.
4:27 Kel-sióng ê kiáⁿ-sun tī in it-chhè só͘ kng ê mi̍h, só͘ pān ê tāichì, lóng tio̍h chiàu A-lông kah i ê kiáⁿ-sun só͘ bēng-lēng ê lâi pān, in só͘ eng-kai kng ê, lín tio̍h phài in kò͘-siú.
4:28 Che sī Kel-sióng kiáⁿ-sun chiahê ke, tī hōe-bō͘ lāi só͘ chò ê kang, in só͘ kò͘-siú ê, tio̍h tī chè-si A-lông ê kiáⁿ I-tha-mal ê chhiú-hā. "
4:29 Me-la-lih Chong-cho̍k ê Chit-chek
" Nā-sī Me-la-lih ê kiáⁿ-sun, lí tio̍h chiàu in ê ke-kháu kah chong-cho̍k, kā in tiám-sǹg.
4:30 Tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê, lóng tio̍h sǹg.
4:31 In só͘ tam-tng ê chek-jīm, chiàu hōe-bō͘ chiahê kang-têng, to̍h-sī hōe-bō͘ ê pán kah i ê mn̂g-chhòaⁿ, i ê thiāu, i ê chō,
4:32 īⁿ sì-kho͘-ûi ê thiāu kah i ê chō; só͘ tèng ê teng kah soh-á, í-ki̍p it-chhè só͘ ēng ê khì-kū. In tam-tng só͘ kng ê khì-kū, lín tio̍h chiàu miâ kā in tiāⁿ tio̍h.
4:33 Che sī Me-la-lih kiáⁿ-sun chiahê ke ê kang, to̍h-sī in tī hōe-bō͘ lāi só͘ chò ê kang, lóng tī chè-si A-lông ê kiáⁿ I-tha-mal ê chhiú-hā."
4:34 Lē-bī Chi-cho̍k Jîn-sò͘ ê Thóng-kè
Mô͘-se kah A-lông í-ki̍p hōe-chiòng chiahê siú-léng, kā Ko-hat ê kiáⁿ-sun chiàu in ê chong-cho̍k kah ke-kháu,
4:35 tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê, lóng keng-kòe tiám-sǹg.
4:36 Chiàu in ê ke-kháu keng-kòe tiám-sǹg ê, chóng-kiōng ū nn̄g-chheng chhit-pah gō͘-cha̍p miâ.
4:37 Che sī Ko-hat cho̍k chiahê ke keng-kòe tiám-sǹg ê, sī só͘-ū tī hōe-bō͘ lāi chò-kang ê, to̍h-sī Mô͘-se kah A-lông, chiàu Siōng-chú thok Mô͘-se só͘ bēng-lēng tiám-sǹg ê.
4:38 Kel-sióng ê kiáⁿ-sun keng-kòe tiám-sǹg ê, chiàu in ê ke-kháu kah chong-cho̍k,
4:39 tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê,
4:40 kî-tiong keng-kòe tiám-sǹg ê, chiàu in ê ke-kháu kah chong-cho̍k, chóng-kiōng ū nn̄g-chheng la̍k-pah saⁿ-cha̍p miâ.
4:41 Che sī Kel-sióng kiáⁿ-sun chiahê ke keng-kòe tiám-sǹg ê, sī só͘-ū tī hōe-bō͘ lāi chò-kang ê, to̍h-sī Mô͘-se kah A-lông chiàu Siōng-chú só͘ bēng-lēng lâi tiám-sǹg ê.
4:42 Me-la-lih kiáⁿ-sun chiahê ke só͘ keng-kòe tiám-sǹg ê, chiàu in ê ke-kháu, in ê chong-cho̍k,
4:43 tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò-kang ê,
4:44 kî-tiong keng-kòe tiám-sǹg ê, chiàu in ê ke-kháu, chóng-kiōng ū saⁿ-chheng nn̄g-pah miâ.
4:45 Che sī Me-la-lih kiáⁿ-sun chiahê ke keng-kòe tiám-sǹg ê, to̍h-sī Mô͘-se kah A-lông chiàu Siōng-chú thok Mô͘-se só͘ bēng-lēng tiám-sǹg ê.
4:46 Kiàn-nā keng-kòe tiám-sǹg ê Lē-bī lâng, to̍h-sī Mô͘-se kah A-lông kah I-su-la-el chiahê siú-léng, chiàu in ê ke-kháu, in ê chong-cho̍k, só͘ tiám-sǹg ê,
4:47 tùi saⁿ-cha̍p hòe í-siōng kàu gō͘-cha̍p hòe, kiàn-nā ji̍p-lâi tng-chit tī hōe-bō͘ lāi chò kng mi̍h-kiāⁿ ê kang ê,
4:48 kî-tiong keng-kòe tiám-sǹg ê, chóng-kiōng ū peh-chheng gō͘-pah peh-cha̍p miâ.
4:49 In hō͘ Mô͘-se tiám-sǹg, chiàu Siōng-chú só͘ bēng-lēng ê, ta̍k lâng chiàu i só͘ pān ê tāichì, chiàu i só͘ kng ê mi̍h-kiāⁿ, in ánne hō͘ i tiám-sǹg, sī chiàu Siōng-chú só͘ bēng-lēng Mô͘-se ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。