利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 Chun-siú Kài-bēng Ē Bông-hok
( SBK 7: 12-24; 28: 1-4)
Siōng-chú kóng, " Lín m̄ thang ūi kakī chò siáⁿ-mi̍h sîn-pu̍t, mā m̄ thang chhāi tiau-khek ê ngó͘-siōng á-.sī thiāu-siōng, mā m̄ thang tī lín ê tē-kài an-tì siáⁿ-mi̍h khek-siōng ê chio̍h, kā i kūi-pài, in-ūi Góa sī Siōng-chú — lín ê Siōng-tè.
26:2 Lín tio̍h siú Góa chiahê an-hioh, kèng-pài Góa ê sèng-só͘. Góa sī Siōng-chú.
26:3 " Lín nā chun-thàn Góa ê lu̍t-lē, siú Góa ê kài-bēng lâi chun-hêng,
26:4 Góa chiū ē kā lín lo̍h ki̍p-sî ê hō͘, tē ē chhut i ê lông-sán-bu̍t, chhân-iá ê chhiū-ba̍k ē kiat kóe-chí.
26:5 Lín phah ngó͘-kok ē phah kàu bán phû-tô ê sî, bán phû-tô ē bán kàu iā chéng ê sî, lín koh ē chia̍h lín ê bí-niû chia̍h kàu pá, tī lín ê thó͘-tē an-jiân tòa lo̍h-.khì.
26:6 " Góa beh siúⁿ-sù pêng-an tī lín ê tē, lín tó teh khùn, bô lâng kā lín phah-kiaⁿ. Góa beh tī lín ê tē tû-khì ok-siù, to-kiàm mā bē keng-kòe lín ê tē.
26:7 Lín ē kā tùi-te̍k kóaⁿ-cháu, in beh tī lín ê bīn-chêng tó tī to hā.
26:8 Lín gō͘-ê lâng ē kóaⁿ-cháu chi̍t pah-ê lâng, lín chi̍t pah-ê lâng ē kóaⁿ-cháu chi̍t-bān-ê lâng, tùi-te̍k ē tī lín ê bīn-chêng tó tī to hā.
26:9 Góa beh khòaⁿ-kò͘ lín, hō͘ lín seⁿ-thòaⁿ chin chē, mā beh kah lín kiàn-li̍p góa ê iok.
26:10 Lín ē chia̍h khǹg chin kú ê kū ngó͘-kok, koh ūi tio̍h sin ê, kā kū ê poaⁿ chhut-.lâi.
26:11 Góa beh tī lín tiong-kan li̍p Góa ê hōe-bō͘, Góa ê sim mā bô thó-ià lín.
26:12 Góa beh kiâⁿ tī lín tiong-kan, Góa beh chò lín ê Siōng-tè, lín beh chò Góa ê chú-bîn.
26:13 Góa sī Siōng-chú — lín ê Siōng-tè, bat chhōa lín chhut Ai-gi̍p tē, bián-tit lín chò in ê lô͘-po̍k; Góa bat chám-tn̄g lín ê ka-taⁿ ê soh, hō͘ lín théng-sin lâi kiâⁿ. "
26:14 Ûi-hoán Kài-bēng Siū Chhú-hoa̍t
( SBK 28: 15-68)
Siōng-chú kóng, " Lín nā m̄ chun-thàn Góa, m̄ siú Góa só͘-ū ê kài-bēng,
26:15 lín nā khì-sak Góa ê lu̍t-lē, sim-lāi thó-ià Góa ê hoat-tō͘, tì-sú bô kiâⁿ Góa it-chhè ê kài-bēng, ûi-pōe Góa ê iok,
26:16 Góa chiū beh ánne kā lín khoán-thāi, Góa tiāⁿ tio̍h beh hō͘ lín kiaⁿ-hiâⁿ, siau-sán, jia̍t-pēⁿ, ba̍k-chiu phah-pháiⁿ, sim iu-siong. Lín ē khang-khang iā chéng, in-ūi lín ê tùi-te̍k ē kā chéng-chí chia̍h tiāu.
26:17 Góa ē tùi lín pìⁿ-bīn, lín ē pāi-tīn tī tùi-te̍k ê bīn-chêng, oàn-hūn lín ê ē kā lín koán-hat, bô lâng teh kā lín jiok, lín mā tio̍h tô-cháu.
26:18 " Lín in-ūi chiahê tāichì nā iáu koh m̄ chun-thàn Góa, Góa chiū beh ūi tio̍h lín ê chōe ke-thiⁿ chhit pōe kā lín chek-hoa̍t.
26:19 Góa beh toān-choa̍t lín ū sè-le̍k ê kiau-ngō͘, koh beh hō͘ lìn ê thiⁿ chhin-chhiūⁿ thih, lín ê tē chhin-chhiūⁿ tâng.
26:20 Lín chhut-la̍t lô-khó͘ ē khang-khang, in-ūi lín ê tē bô chhut i ê lông-sán-bu̍t, tē ê chhiū-ba̍k mā bô kiat i ê kóe-chí.
26:21 " Lín chò tāichì nā kah Góa hoán-tùi, m̄-khéng chun-thàn Góa, Góa chiū beh chiàu lín só͘ chò ê ke-thiⁿ chhit pōe kàng chai-hō hō͘ lín.
26:22 Góa beh chhe iá-siù kàu lín ê tiong-kan, kā-chia̍h lín ê kiáⁿ-jî, thun-bia̍t lín ê chengseⁿ, hō͘ lín ê lâng-gia̍h kiám-chió, lín ê lō͘ pha-hng.
26:23 " Lín in-ūi chiahê iáu koh bô siū chek-tok lâi kui-ǹg Góa, chò tāichì hoán-tùi Góa,
26:24 Góa mā beh chò tāichì lâi hoán-tùi lín, Góa pún-sin beh in-ūi lín ê chōe, kā lín phah chhit pōe tāng.
26:25 Góa koh beh hō͘ to-kiàm lîm-kàu lín, pò-èng lín pōe-iok ê chōe; lín ē siū ûi-khùn tī siâⁿ lāi, Góa beh kàng un-e̍k tī lín tiong-kan, mā beh kā lín kau tī tùi-te̍k ê chhiú.
26:26 Góa beh toān-choa̍t lín só͘ óa-khò ê bí-niûⁿ, hit sî beh ū cha̍p-ê chabó͘ lâng tī chi̍t-ê lô͘ kā lín piak piáⁿ, chhìn lín ê gia̍h ê chia̍h-mi̍h hō͘ lín, lín siūⁿ beh chia̍h mā chia̍h bē pá.
26:27 " Lín in-ūi che it-chhè ê tāichì nā iáu koh m̄ chun-thàn Góa, mā chò tāichì hoán-tùi Góa,
26:28 Góa chiū ē hoat-chhut tōa siū-khì, chò tāichì lâi hoán-tùi lín, Góa pún-sin in-ūi lín ê chōe, kā lín chek-hoa̍t chhit pōe tāng.
26:29 Koh lín ē chia̍h lín ê kiáⁿ ê bah, lín ê chabó͘ kiáⁿ ê bah lín mā beh chia̍h.
26:30 Góa mā beh húi-hoāi lín ê soaⁿ-thâu tôaⁿ, chhò lín ê ji̍t-thâu siōng, kā lín ê sin-si hiat tī lín ê ngó͘-siōng ê sin chiūⁿ, Góa ê sim mā ē thó-ià lín.
26:31 Góa beh hō͘ lín ê siâⁿ pha-hng, hō͘ lín chiahê sèng-só͘ hong-hùi, Góa mā bô beh koh phīⁿ lín ê phang-liāu ê phang-bī.
26:32 Góa beh hō͘ tē hong-hùi, lín ê tùi-te̍k khiā tī hia ê ē in-ūi ánne, tio̍h-kiaⁿ kah gāng-.khì.
26:33 Góa beh kā lín tī lia̍t pang tiong phah sì-sòaⁿ, Góa mā beh poe̍h to jiok lín. Lín ê tē ē hong-hùi, lín ê siâⁿ ē pha-hng.
26:34 " Lín tòa tī tùi-te̍k ê tē ê sî, lín ê tē pha-hng beh hióng-siū i ê an-hioh; tī hit sî, tē beh hioh-khùn, hióng-siū i ê an-hioh.
26:35 Tē pha-hng gōa kú, chiū ē tit tio̍h hiah kú ê an-hioh, in-ūi lín tòa tī hia ê ji̍t, lín chiahê an-hioh ê kî-kan i bô tit tio̍h an-hioh.
26:36 " Nā-sī lín só͘ chhun lo̍h-.lâi ê lâng, Góa beh hō͘ in tī tùi-te̍k ê tē, sim kiaⁿ kah hūn-.khì. Chhiū-hio̍h hō͘ hong chhoe tín-tāng ê siaⁿ jiok in, in beh tô-siám, ná chhin-chhiūⁿ teh tô-siám to-kiàm, bô lâng jiok i, i mā ē poa̍h-tó.
26:37 Bô lâng jiok ê sî, mā chhin-chhiūⁿ tī to-kiàm ê thâu-chêng, in ē tāi-ke sio kheh lâi poa̍h-tó. Lín tī tùi-te̍k ê bīn-chêng mā khiā bē tiâu.
26:38 Lín ē tī lia̍t pang tiong bia̍t-bông, tùi-te̍k ê tē ē kā lín thun-chia̍h.
26:39 Lín só͘ chhun lo̍h-.lâi ê lâng ē tī tùi-te̍k ê tē, in-ūi kakī ê chōe lâi siau-bia̍t, mā ē in-ūi chó͘-sian ê chōe kah in kāng-khoán siau-bia̍t.
26:40 " In ē sêng-jīn kakī ê chōe kah in chó͘-sian ê chōe, to̍h-sī in só͘ pōe-ge̍k Góa ê chōe, koh sêng-jīn kakī chò tāichì lâi hoán-tùi Góa,
26:41 só͘-í, Góa chò tāichì lâi hoán-tùi in, chhōa in kàu tùi-te̍k ê tē. Hit sî, in bô siū kat-lé ê sim, nā ū khiam-pi, chiū ē kam-goān siū chōe ê hêng-hoa̍t.
26:42 Góa beh kì-liām Góa kah Iâ-kop só͘ li̍p ê iok, Góa beh kì-liām Góa kah Í-sak só͘ li̍p ê iok; Góa kah A-bu-la-hàm só͘ li̍p ê iok, Góa mā beh kì-liām chit-ê tē.
26:43 In tio̍h lī-khui hit-ê tē, tī i pha-hng kah in bô tī-.leh ê sî, hō͘ tē tit tio̍h hióng-siū i ê an-hioh. Jî-chhiáⁿ in kam-goān siū chōe ê hêng-hoa̍t, in-ūi in khì-sak Góa ê hoat-tō͘, sim-lāi thó-ià Góa ê lu̍t-lē.
26:44 Sûi-jiân ánne, in tī tùi-te̍k ê tē ê sî, Góa iáu koh bô kā in khì-sak, mā bô thó-ià in, lâi kā in choân-pō͘ siau-bia̍t, tì-sú ûi-pōe Góa kah in só͘ li̍p ê iok, in-ūi Góa sī Siōng-chú — in ê Siōng-tè.
26:45 Góa mā beh ūi tio̍h in ê iân-kò͘, kì-liām Góa kah in ê chó͘-sian só͘ li̍p ê iok, to̍h-sī Góa tī ī-pang lâng ê bīn-chêng chhōa in chhut Ai-gi̍p tē ê, beh chò in ê Siōng-tè ê. Góa sī Siōng-chú. "
26:46 Chiahê lu̍t-lē, hoat-tō͘, kà-sī, to̍h-sī Siōng-chú tī Si-nái soaⁿ thok Mô͘-se, tī I pún-sin kah I-su-la-el lâng ê tiong-kan só͘ li̍p ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。