利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
24:1 Teng-tâi ê Kui-tēng
( CAG 27: 20-21) Siōng-chú hoan-hù Mô͘-se kóng,
24:2 " Tio̍h bēng-lēng I-su-la-el lâng, ēng Kaⁿ-ná kheh chiâⁿ chheng ê iû, the̍h-lâi hō͘ lí, thang tiám teng hō͘ i tiāⁿtiāⁿ kng.
24:3 Tī hōe-bō͘ lāi hoat-kūi ê tiùⁿ-lî gōa, A-lông tio̍h ánne pān-lí, tùi ê-hng kàu chá-khí, tiāⁿtiāⁿ tī Siōng-chú ê bīn-chêng. Che sī chò lín tāi-tāi éng-oán ê lē.
24:4 I tio̍h tī Siōng-chú ê bīn-chêng, tī chheng-khì ê teng-tâi téng tiāⁿtiāⁿ pān-lí chiahê teng. "
24:5 Hiàn hō͘ Siōng-chú ê Piáⁿ
" Lí tio̍h the̍h iù ê mī-hún lâi piak cha̍p-jī tè piáⁿ, múi tè ēng gō͘-hūn chi-it e-hoat.
24:6 Tio̍h tī Siōng-chú ê bīn-chêng sèng-kiat ê toh téng kā piáⁿ pâi chò nn̄g chōa, múi chōa la̍k tè.
24:7 Koh tio̍h ēng chheng-khì ê jú-hiuⁿ hē tī ta̍k chōa, kā piáⁿ chò kì-hō, to̍h-sī chò hóe-chè hiàn hō͘ Siōng-chú.
24:8 Ta̍k-ê An-hioh-ji̍t, i tio̍h tiāⁿtiāⁿ pâi tī Siōng-chú ê bīn-chêng. Che sī ūi tio̍h I-su-la-el lâng chò éng-oán ê iok.
24:9 Chiahê piáⁿ tio̍h kui hō͘ A-lông kah i ê kiáⁿ-sun, in tio̍h tī sèng ê só͘-chāi chia̍h, in-ūi tī Siōng-chú ê hóe-chè tiong, chit-ê sī chì-sèng kui tī i, chò éng-oán ê lē.
24:10 Kong-tō ê Sím-phòaⁿ
Ū chi̍t-ê lâng, i ê lāu-bú sī I-su-la-el lâng, i ê lāu-pē sī Ai-gi̍p lâng, chhut-lâi kiâⁿ tī I-su-la-el lâng ê tiong-kan. Chit-ê I-su-la-el chabó͘ lâng ê kiáⁿ kah chi̍t-ê I-su-la-el lâng tī iâⁿ-pâng lāi oan-ke.
24:11 Chit-ê I-su-la-el chabó͘ lâng ê kiáⁿ siat-to̍k sèng-miâ, koh chiù-chó͘, chiū ū lâng kā i chhōa kàu Mô͘-se hia. I ê lāu-bú ê miâ kiò-chò Si-ló-mi̍t, sī Tàn ê chi-cho̍k, Tí-pek-lī ê chabó͘ kiáⁿ.
24:12 In kā i koaiⁿ tī khu-liû-só͘, beh thèng-hāu Siōng-chú ê chí-sī.
24:13 Siōng-chú hoan-hù Mô͘-se kóng,
24:14 " Tio̍h kā hit-ê chiù-chó͘ ê lâng chhōa kàu iâⁿ gōa, hō͘ thiaⁿ-.tio̍h ê lâng tī i ê thâu-khak téng hōaⁿ-chhiú; choân hōe-chiòng tio̍h ēng chio̍h-thâu kā i tìm-sí.
24:15 Lí tio̍h hoan-hù I-su-la-el lâng kóng: Kiàn-nā chiù-chó͘ i ê Siōng-tè ê, tio̍h tam-tng i kakī ê chōe.
24:16 Lâng siat-to̍k Siōng-chú ê miâ, tio̍h hō͘ i sí; choân hōe-chiòng tio̍h ēng chio̍h-thâu kā i tìm-sí. Put-koán sī chhut-gōa lâng á-.sī pún-tē-lâng, i siat-to̍k Siōng-chú ê miâ ê sî, tio̍h hō͘ i sí.
24:17 Kiàn-nā phah-sí-lâng ê, it-tēng tio̍h hō͘ i sí.
24:18 Phah-sí chengseⁿ ê, tio̍h pôe-sióng, ēng miā pôe miā.
24:19 Lâng nā sún-siong i ê chhù-piⁿ, i ánne kiâⁿ, mā tio̍h ánne kā i khoán-thāi.
24:20 Ēng siong pôe siong, ēng ba̍k-chiu pôe ba̍k-chiu, ēng chhùi-khí pôe chhùi-khí, i sún-siong lâng án-chóaⁿ, mā tio̍h ánne kā i tùi-thāi.
24:21 Phah-sí chengseⁿ ê, tio̍h pôe-sióng; phah-sí-lâng ê, it-tēng tio̍h hō͘ i sí.
24:22 Put-koán sī chhut-gōa lâng á-.sī pún-tē-lâng, tio̍h chun-siú sio-siâng ê lu̍t-hoat, in-ūi Góa sī Siōng-chú — lín ê Siōng-tè. "
24:23 Mô͘-se chiū kā I-su-la-el lâng kóng, in chiū kā hit-ê chiù-chó͘ ê lâng chhōa kàu iâⁿ gōa, ēng chio̍h-thâu tìm-sí. I-su-la-el lâng chiū chiàu Siōng-chú só͘ bēng-lēng Mô͘-se ê lâi kiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。