利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Chong-kàu ê Cheh-kî
Siōng-chú hoan-hù Mô͘-se kóng,
23:2 " Lí tio̍h hoan-hù I-su-la-el lâng, kóng: Siōng-chú ê cheh-kî, lín só͘ tio̍h soan-pò͘ chò sèng-hōe ê, í-hā chiahê to̍h-sī Góa ê cheh-kî.
23:3 An-hioh-ji̍t
" La̍k ji̍t tio̍h chò-kang, tē-chhit ji̍t sī tōa ê An-hioh-ji̍t, tio̍h chò sèng-hōe; tī lín it-chhè tòa ê só͘-chāi, só͘-ū ê kang lín lóng m̄ thang chò. Che sī chò Siōng-chú ê sèng-ji̍t.
23:4 Ē-bīn sī Siōng-chú só͘ chí-tēng ê cheh-kî, to̍h-sī lín kàu Siōng-chú só͘ chí-tēng ê ji̍t-chí só͘ tio̍h soan-pò͘ ê sèng-hōe. "
23:5 Pôaⁿ-kòe-cheh kah Tû-kàⁿ-cheh
( BSK 28:16-25)
Chiaⁿ-goe̍h cha̍p-sì hông-hun ê sî, sī Siōng-chú ê Pôaⁿ-kòe-cheh.
23:6 Chit goe̍h cha̍p-gō͘ sī Siōng-chú ê Tû-kàⁿ-cheh, lín tio̍h chia̍h bô-kàⁿ piáⁿ chhit ji̍t.
23:7 Thâu chi̍t ji̍t tio̍h ū sèng-hōe, lóng m̄ thang chò siáⁿ-mi̍h khó͘-kang.
23:8 Chhit ji̍t tio̍h hiàn hóe-chè hō͘ Siōng-chú, tē-chhit ji̍t sī sèng-hōe, lóng m̄ thang chò siáⁿ-mi̍h khó͘-kang. "
23:9 Sin Siu-koah ê Ngó͘-kok
Siōng-chú hoan-hù Mô͘-se kóng,
23:10 " Lí tio̍h hoan-hù I-su-la-el lâng, kā in kóng: Lín kàu Góa siúⁿ-sù hō͘ lín ê tē, siu-koah ngó͘-kok ê sî, tio̍h kā khí-thâu se̍k ê ngó͘-kok chi̍t khún, tòa-lâi hō͘ chè-si.
23:11 I tio̍h ēng chit khún tī Siōng-chú ê bīn-chêng iô, hō͘ lín tit tio̍h chiap-la̍p. Chè-si tio̍h tī An-hioh-ji̍t ê keh tńg kang lâi iô.
23:12 Iô chit khún ê ji̍t, lín tio̍h kā chi̍t chiah bī-móa-nî bô khoat-tiám ê mî-iûⁿ-káng-á, hiàn hō͘ Siōng-chú chò sio-chè.
23:13 Sio-sòa hiàn ê sò͘-chè, to̍h-sī tiâu-hô iû ê iù mī-hún gō͘-hūn chi-it e-hoat, chò phang-phang ê hóe-chè hiàn hō͘ Siōng-chú, sio-sòa hiàn ê koàn-tiān, tio̍h ēng chiú sì-hūn chi-it hin.
23:14 Bô-lūn sī piáⁿ, á-.sī pōe ê ngó͘-kok, á-.sī sin ê sūi, lín lóng m̄ thang chia̍h, kàu lín tòa lé-mi̍h hiàn hō͘ lín ê Siōng-tè hit ji̍t chiah thang chia̍h. Che tī lín it-chhè tòa ê só͘-chāi, chò lín tāi-tāi éng-oán ê lē. "
23:15 Siu-koah-cheh
( BSK 28:26-31)
" Lín tio̍h tùi An-hioh-ji̍t ê keh tńg kang, hiàn tiū-khún chò iô-chè; hit ji̍t ūi kakī sǹg-khí, móa chhit-ê An-hioh-ji̍t,
23:16 kàu tē-chhit-ê An-hioh-ji̍t ê keh tńg kang, lín tio̍h sǹg gō͘-cha̍p kang, koh tio̍h kā sin ê sò͘-chè hiàn hō͘ Siōng-chú.
23:17 Tio̍h tùi lín tòa ê só͘-chāi the̍h-chhut iù ê mī-hún gō͘-hūn chi-it e-hoat, chham kàⁿ lâi piak nn̄g tè iô-chè ê piáⁿ, chò khí-thâu se̍k ê mi̍h, hiàn hō͘ Siōng-chú.
23:18 Koh tio̍h ēng bī-móa-nî bô khoat-tiám ê iûⁿ-á chhit chiah, gû-káng-á chi̍t chiah, mî-iûⁿ-káng nn̄g chiah, í-ki̍p hiahê piáⁿ chò-hóe hiàn in chò sio-chè hō͘ Siōng-chú kah in ê sò͘-chè, in ê koàn-tiān, chò phang-phang ê hóe-chè, hiàn hō͘ Siōng-chú.
23:19 Lín tio̍h hiàn chi̍t chiah soaⁿ-iûⁿ-káng chò sio̍k-chōe-chè, nn̄g chiah bī-móa-nî ê mî-iûⁿ-á chò siā-un-chè.
23:20 Chè-si tio̍h iô hiahê chè-mi̍h kah khí-thâu se̍k ê be̍h ê piáⁿ, chò iô-chè tī Siōng-chú ê bīn-chêng kah hit nn̄g chiah iûⁿ-á tio̍h kā in hun-pia̍t chò sèng, hiàn hō͘ Siōng-chú, lâi kui hō͘ chè-si.
23:21 Siâng hit ji̍t, lín tio̍h soan-pò͘ chò lín ê sèng-hōe, lóng m̄ thang chò siáⁿ-mi̍h khó͘-kang. Che tī lín it-chhè tòa ê só͘-chāi, chò ta̍k sè-tāi éng-oán ê lē.
23:22 " Lín siu-koah chhân ê ngó͘-kok, chhân ê kak-thâu m̄ thang koah kàu chīn, ka-la̍uh ê mā m̄ thang khioh, tio̍h lâu hō͘ sànchhiah lâng kah chhut-gōa ê khioh. Góa sī Siōng-chú — lín ê Siōng-tè."
23:23 Sin-nî
( BSK 29: 1-6)
Siōng-chú hoan-hù Mô͘-se kóng,
23:24 " Lí tio̍h hoan-hù I-su-la-el lâng, kóng: Chhit goe̍h chhe-it, lín tio̍h siú-chò sèng ê An-hioh-ji̍t, tio̍h pûn kó͘-chhoe lâi kì-liām, tio̍h chò sèng-hōe.
23:25 Lóng m̄ thang chò siáⁿ-mi̍h khó͘-kang, tio̍h kā hóe-chè hiàn hō͘ Siōng-chú. "
23:26 Sio̍k-chōe-ji̍t
Siōng-chú hoan-hù Mô͘-se kóng,
23:27 " Chhit goe̍h chhe-cha̍p sī sio̍k-chōe ê ji̍t, lín tio̍h siú-chò sèng-hōe, koh tio̍h kakī khek-khó͘, mā tio̍h kā hóe-chè hiàn hō͘ Siōng-chú.
23:28 Siâng chit ji̍t, lóng m̄ thang chò siáⁿ-mi̍h kang, in-ūi sī sio̍k-chōe ê ji̍t, tī Siōng-chú — lín ê Siōng-tè ê bīn-chêng kā lín sio̍k-chōe.
23:29 Siâng chit ji̍t, kiàn-nā bô khek-khó͘ i ê sim ê, ē hông tùi jîn-bîn tiong chián-tû.
23:30 Kiàn-nā tī chit ji̍t chò siáⁿ-mi̍h kang ê, Góa beh tùi jîn-bîn tiong-kan kā i bia̍t-tiāu.
23:31 Lín lóng m̄ thang chò siáⁿ-mi̍h kang, che tī lín it-chhè tòa ê só͘-chāi, chò lín ta̍k sè-tāi éng-oán ê lē.
23:32 Lín tio̍h siú chit ji̍t chò tōa ê An-hioh-ji̍t, tī chit goe̍h ê chhe-káu ê-hng, tùi hit ê-hng kàu keh kang ê-hng, tio̍h siú lín ê An-hioh-ji̍t. "
23:33 Tòa-pêⁿ-cheh
( BSK 29: 12-40)
Siōng-chú hoan-hù Mô͘-se kóng,
23:34 " Lí tio̍h kā I-su-la-el lâng kóng: Chit-ê chhit goe̍h cha̍p-gō͘ sī Tòa-pêⁿ-cheh, tio̍h kā Siōng-chú siú chhit ji̍t.
23:35 Thâu chi̍t ji̍t tio̍h ū sèng-hōe, m̄ thang chò siáⁿ-mi̍h khó͘-kang.
23:36 Lín chhit ji̍t tio̍h kā hóe-chè hiàn hō͘ Siōng-chú, tē-peh ji̍t tio̍h siú sèng-hōe, tio̍h kā hóe-chè hiàn hō͘ Siōng-chú. Che sī giâm-siok-hōe, lóng m̄ thang chò siáⁿ-mi̍h khó͘-kang.
23:37 " Che sī Siōng-chú chiahê cheh, lín tio̍h soan-pò͘ chò sèng-hōe ê, tio̍h kā hóe-chè, sio-chè, sò͘-chè, chè-mi̍h kah koàn-tiān hiàn hō͘ Siōng-chú, koh chiàu I ê ji̍t-kî.
23:38 Che sī tī Siōng-chú só͘ tiāⁿ tio̍h ê An-hioh-ji̍t í-gōa, koh tī lín ê lé-mi̍h í-gōa, kah lín só͘ hē ê goān í-gōa, kah kam-sim hiàn ê í-gōa, lín tio̍h koh hiàn chiahê hō͘ Siōng-chú.
23:39 " Koh tī chhit goe̍h cha̍p-gō͘, lín ê lông-sán-bu̍t siu-sêng ê sî, tio̍h siú Siōng-chú ê cheh chhit ji̍t. Thâu chi̍t ji̍t chò sèng ê an-hioh, tē-peh ji̍t mā chò sèng ê an-hioh.
23:40 Thâu chi̍t ji̍t tio̍h bán hó-chhiū ê kóe-chí kah chó chhiū ê ki, í-ki̍p ām-chhiū ê oe kah hô piⁿ ê liú-ki, tī Siōng-chú — lín ê Siōng-tè ê bīn-chêng hoaⁿ-hí chhit ji̍t.
23:41 Ta̍k nî chhit goe̍h kan, lín tio̍h chhit ji̍t kā Siōng-chú siú chit-ê cheh, che sī lín ta̍k sè-tāi éng-oán ê lē.
23:42 Lín tio̍h tòa tī chháu-liâu-á lāi chhit ji̍t; kiàn-nā I-su-la-el pún-tē-lâng lóng tio̍h tòa tī chháu-liâu-á lāi.
23:43 Thang hō͘ lín ta̍k tāi chai Góa chhōa I-su-la-el lâng chhut Ai-gi̍p tē ê sî, Góa hō͘ in tòa tī chháu-liâu-á lāi. Góa sī Siōng-chú — lín ê Siōng-tè."
23:44 Mô͘-se chiū kā Siōng-chú ê cheh-kî thoân hō͘ I-su-la-el lâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。