利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
22:1 Chè-mi̍h ê Sèng-kiat
Siōng-chú hoan-hù Mô͘-se kóng,
22:2 " Lí tio̍h kā A-lông kah i hiahê kiáⁿ kóng: Tio̍h lī-khui I-su-la-el lâng só͘ hun-pia̍t chò sèng kui hō͘ Góa ê sèng-mi̍h, bián-tit siat-to̍k Góa ê sèng-miâ. Góa sī Siōng-chú.
22:3 Tio̍h kā in kóng: Lín tāi-tāi ê kiáⁿ-sun, kiàn-nā seng-khu ū ù-òe lâi chhin-kīn I-su-la-el lâng só͘ hun-pia̍t chò sèng, kui hō͘ Siōng-chú chò sèng-mi̍h ê, hit-ê lâng tio̍h tī Góa ê bīn-chêng chián-tû. Góa sī Siōng-chú.
22:4 " A-lông ê kiáⁿ-sun, kiàn-nā ū thái-ko ê á-.sī ē-sin lâu-lâng ê, m̄ thang chia̍h sèng-mi̍h, tio̍h thèng-hāu i chheng-khì. Bô-lūn siáⁿ lâng bong tio̍h hit-ê tùi si-thé bak tio̍h lahsap ê mi̍h á-.sī bāng-siat ê lâng,
22:5 á-.sī bong tio̍h siáⁿ-mi̍h bô chheng-khì ē pê ê mi̍h, á-.sī bong tio̍h hiahê hō͘ i bô chheng-khì ê lâng, put-koán hit-ê lâng ū siáⁿ-mi̍h bô chheng-khì,
22:6 bong tio̍h hiahê ê lâng, it-tēng bô chheng-khì-kàu ê-hng; nā bô ēng chúi sé seng-khu, chiū m̄ thang chia̍h sèng ê mi̍h.
22:7 Ji̍t-lo̍h ê sî, i chiū chheng-khì, jiân-āu chiū thang chia̍h sèng-mi̍h, in-ūi che sī i ê chia̍h-mi̍h.
22:8 Ka-kī sí ê á-.sī hō͘ iá-siù thiah-li̍h ê, i m̄ thang chia̍h, in-ūi chit-ê ē òe lahsap kakī. Góa sī Siōng-chú.
22:9 " Só͘-í, in tio̍h siú Góa só͘ kau-tài ê, bián-tit in kā I siat-to̍k, chiū ánne tam-tng chōe lâi sí. Góa sī hō͘ in chiâⁿ-sèng ê Siōng-chú.
22:10 " Só͘-ū ê chhut-gōa lâng m̄ thang chia̍h sèng-mi̍h, hioh tī chè-si ê ke ê á-.sī chò-kang lâng, lóng m̄ thang chia̍h sèng-mi̍h.
22:11 Siat-sú chè-si bé lâng lâi, sī i ēng gîn bé-ê, hit-ê lâng thang chia̍h sèng-mi̍h; chhut-sì tī i ê ke ê mā thang chia̍h i ê bí-niûⁿ.
22:12 Chè-si ê chabó͘ kiáⁿ nā-sī kè chhut-gōa lâng, chiū m̄ thang chia̍h só͘ kí khí-.lâi ê sèng-mi̍h.
22:13 Chóng-.sī, chè-si ê chabó͘ kiáⁿ nā-sī kóaⁿ-hū á-.sī hông lî-chhut ê, bô kiáⁿ-jî koh tńg-lâi lāu-pē ê ke kah i siàu-liân ê sî sio-siâng, chiū thang chia̍h i ê lāu-pē ê chia̍h-mi̍h, chóng-.sī, chhut-gōa lâng m̄ thang chia̍h.
22:14 " Nā ū lâng bô tiuⁿ-tî chia̍h sèng-mi̍h, tio̍h chiàu hiahê sèng-mi̍h ke gō͘-hūn chi-it kau hō͘ chè-si.
22:15 M̄-thang siat-to̍k I-su-la-el lâng só͘ hiàn hō͘ Siōng-chú ê sèng-mi̍h,
22:16 bián-tit in tī chia̍h sèng-mi̍h ê sî, tam-tng kòe-sit ê chōe-kò, in-ūi Góa sī hō͘ in chiâⁿ-sèng ê Siōng-chú. "
22:17 Siōng-chú hoan-hù Mô͘-se kóng,
22:18 " Lí tio̍h hoan-hù A-lông kah i hiahê kiáⁿ, í-ki̍p I-su-la-el ê kûn-chiòng, tùi in kóng: I-su-la-el ê chú-bîn, á-.sī tī I-su-la-el tiong kià-kha ê, kiàn-nā hiàn lé-mi̍h, bô-lūn sī só͘ hē ê goān, á-.sī kam-sim hiàn ê, to̍h-sī hiàn hō͘ Siōng-chú chò sio-chè ê,
22:19 chiū tio̍h hiàn gû, á-.sī mî-iûⁿ, á-.sī soaⁿ-iûⁿ, lóng tio̍h ēng kang ê, bô khoat-tiám ê, chiah ē tit tio̍h hoaⁿ-hí chiap-la̍p.
22:20 Kiàn-nā ū khoat-tiám ê, lín m̄ thang hiàn, in-ūi che bô beh kā lín chiap-la̍p.
22:21 Kiàn-nā tùi gû-kûn á-.sī iûⁿ-kûn tiong, kā siā-un-chè hiàn hō͘ Siōng-chú, ūi tio̍h beh siā te̍k-pia̍t hē ê goān, á-.sī chò kam-sim hiàn ê, só͘ hiàn ê tio̍h sûn-choân, bô khoat-tiám, chiah ē tit tio̍h chiap-la̍p.
22:22 Chheⁿ-mê-ê, tio̍h-siong ê, phòa-siùⁿ ê, seⁿ liû ê, seⁿ chhng ê, seⁿ sián ê, chiahê lóng m̄ thang hiàn hō͘ Siōng-chú, mā m̄ thang tī tôaⁿ téng hiàn hō͘ Siōng-chú chò hóe-chè.
22:23 Bô-lūn sī gû-káng á-.sī iûⁿ-á, nā-sī ki-thé ki-hêng ê, hit khoán thang chò kam-sim-chè lâi hiàn; chóng-.sī, ēng he lâi siā goān chiū bē tàng chiap-la̍p.
22:24 Gōa-sin sún-siong ê, á-.sī teh chhùi ê, á-.sī phòa-li̍h ê, á-.sī iam ê, m̄ thang hiàn hō͘ Siōng-chú, tī lín ê thó͘-tē mā m̄ thang ánne kiâⁿ.
22:25 Chit khoán ê mi̍h lín mā m̄ thang tùi gōa-kok lâng ê chhiú chiap-siū lâi hiàn chò lín ê Siōng-tè ê chia̍h-mi̍h, in-ūi chit khoán mi̍h lóng ū húi-hoāi, ū khoat-tiám ê, bē tàng kā lín chiap-la̍p. "
22:26 Siōng-chú hoan-hù Mô͘-se kóng,
22:27 " Gû á-.sī mî-iûⁿ, á-.sī soaⁿ-iûⁿ chhut-seⁿ liáu-āu, thâu chhit ji̍t tòe i ê bó, tùi tē-peh ji̍t í-āu, chiū thang chò Siōng-chú hóe-chè ê lé-mi̍h, ē tit tio̍h chiap-la̍p.
22:28 Bô-lūn gû-bó á-.sī iûⁿ-bó, lí m̄ thang siâng ji̍t thâi bó kah i ê kiáⁿ.
22:29 " Lín hiàn siā-un-chè hō͘ Siōng-chú ê sî, tio̍h hiàn thang tit tio̍h chiap-la̍p ê.
22:30 Tio̍h tī hit ji̍t lâi chia̍h, m̄ thang lâu chi̍t-tiám-á kàu keh kang chá-khí. Góa sī Siōng-chú.
22:31 " Só͘-í, lín tio̍h siú Góa chiahê kài-bēng lâi kiâⁿ. Góa sī Siōng-chú.
22:32 Lín m̄ thang siat-to̍k Góa ê sèng-miâ, in-ūi Góa tī I-su-la-el lâng ê tiong-kan, beh siū chun-kèng lâi chò sèng. Góa sī hō͘ lín chiâⁿ-sèng ê Siōng-chú,
22:33 Chhōa lín chhut Ai-gi̍p tē, chò lín ê Siōng-tè ê. Góa sī Siōng-chú. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。