利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
16:1 Sio̍k-chōe-ji̍t ê Kui-tēng
A-lông nn̄g-ê kiáⁿ kīn-óa Siōng-chú ê bīn-chêng lâi sí, in sí liáu-āu Siōng-chú hoan-hù Mô͘-se, tùi Mô͘-se kóng,
16:2 " Tio̍h kā lí ê a-hiaⁿ A-lông kóng, m̄ thang sûi-piān sî ji̍p-khì sèng-só͘ ê tiùⁿ-lî lāi, á-.sī kàu iok-kūi téng si-un-só͘ ê bīn-chêng, chiah bián-tit sí, in-ūi Góa beh tī hûn tiong hián-hiān tī si-un-só͘ ê téng-bīn.
16:3 A-lông beh ji̍p sèng-só͘ tio̍h ánne, tio̍h tòa chi̍t chiah gû-káng-á-kiáⁿ chò sio̍k-chōe-chè, chi̍t chiah mî-iûⁿ-káng chò sio-chè.
16:4 I tio̍h chhēng iù-tē pò͘ sèng ê lāi-saⁿ, mā tio̍h chhēng iù-tē pò͘ ê khò͘ tī seng-khu-.ni̍h, io hâ iù-tē pò͘ ê tòa, thâu tì iù-tē pò͘ ê bō. Che lóng sī sèng ê saⁿ-khò͘, i tio̍h ēng chúi sé seng-khu, jiân-āu chiah chhēng.
16:5 I tio̍h tùi I-su-la-el lâng ê hōe tiong chhú nn̄g chiah soaⁿ-iûⁿ-káng, chò sio̍k-chōe-chè, chi̍t chiah mî-iûⁿ-káng chò sio-chè.
16:6 " A-lông tio̍h hiàn ūi pún-sin chò sio̍k-chōe-chè ê gû-káng, ūi tio̍h pún-sin kah i ê ke sio̍k-chōe.
16:7 Mā tio̍h kā hit nn̄g chiah soaⁿ-iûⁿ-káng an-tì tī hōe-bō͘ mn̂g-kháu, Siōng-chú ê bīn-chêng.
16:8 A-lông tio̍h ūi tio̍h hit nn̄g chiah soaⁿ-iûⁿ liam-khau, liam chi̍t chiah kui Siōng-chú, liam chi̍t chiah kui A-cha-chel( chù: Hi-bú-lâi bûn ê im-e̍k, ì-sù sī" Keng-kòe sià-chōe ê iûⁿ tī sio̍k-chōe-ji̍t hòng-seng khì khòng-iá, siōng-teng oân-choân ê sià-bián.") .
16:9 A-lông tio̍h ēng hit chiah liam-khau kui Siōng-chú ê soaⁿ-iûⁿ, hiàn chò sio̍k-chōe-chè.
16:10 M̄ koh, hit chiah liam-khau kui A-cha-chel ê soaⁿ-iûⁿ, tio̍h oa̍h-oa̍h an-tì tī Siōng-chú ê bīn-chêng, thè i sio̍k-chōe, pàng i khì khòng-iá, kui tī A-cha-chel.
16:11 " A-lông tio̍h khan ūi kakī chò sio̍k-chōe-chè ê gû-káng-á, ūi tio̍h kakī kah i ê ke sio̍k-chōe, mā tio̍h thâi ūi kakī chò sio̍k-chōe-chè ê gû-káng-á.
16:12 Mā tio̍h the̍h hiuⁿ-lô͘, tùi Siōng-chú ê bīn-chêng tôaⁿ téng té teh to̍h ê hóe-thòaⁿ móa-móa, mā tio̍h ēng phang ê hiuⁿ-boa̍h chi̍t phóng, tòa ji̍p-khì tiùⁿ-lî lāi,
16:13 Koh tī Siōng-chú ê bīn-chêng, kā hiuⁿ hē tī hóe-.ni̍h, hō͘ hiuⁿ-ian jia-khàm iok-kūi téng ê si-un-só͘, i chiah bián-tit sí.
16:14 Mā tio̍h the̍h tām-po̍h gû-káng-á ê hoeh, ēng chéng-thâu-á hiù tī si-un-só͘ ê tang pêng, koh ēng chéng-thâu-á tī si-un-só͘ ê bīn-chêng hiù hoeh chhit pái.
16:15 " Koh tio̍h thâi hit chiah ūi tio̍h jîn-bîn chò sio̍k-chōe-chè ê soaⁿ-iûⁿ-káng, tòa i ê hoeh ji̍p-khì tiùⁿ-lî lāi, ēng i ê hoeh hiù tī si-un-só͘ kah si-un-só͘ ê bīn-chêng, kah hiù gû-káng-á ê hoeh sio-siâng.
16:16 Koh tio̍h in-ūi I-su-la-el lâng ê ù-òe, kòe-sit kah in só͘-ū ê chōe-ok, thè sèng-só͘ sio̍k-chōe, mā tio̍h ūi tio̍h in tī ù-òe ê tiong-kan tòa chò-hóe ê hōe-bō͘, chiàu ánne kiâⁿ.
16:17 A-lông ji̍p-khì sèng-só͘ sio̍k-chōe ê sî, hōe-bō͘ lāi m̄ thang ū lâng tī-.leh, thèng-hāu i ūi tio̍h pún-sin kah i ê ke, í-ki̍p I-su-la-el ê hōe-chiòng í-keng sio̍k-chōe, chiah thang chhut-.lâi.
16:18 I tio̍h chhut-lâi-kàu Siōng-chú ê bīn-chêng ê tôaⁿ hia, kiat-chēng chè-tôaⁿ, mā tio̍h the̍h tām-po̍h gû-káng-á ê hoeh kah soaⁿ-iûⁿ-káng ê hoeh, boah tī tôaⁿ téng hiahê kak ê sì-kho͘-ûi.
16:19 Mā tio̍h ēng i ê chéng-thâu-á hiù hoeh tī tôaⁿ-.ni̍h chhit pái, hō͘ i chheng-khì, lī-khui I-su-la-el lâng ê bô chheng-khì, kā i hun-pia̍t chò sèng. "
16:20 Tāi-chōe ê Iûⁿ-ko
" I ūi tio̍h sèng-só͘, hōe-bō͘ kah chè-tôaⁿ sio̍k-chōe liáu-āu, tio̍h khan hit chiah oa̍h ê soaⁿ-iûⁿ-káng lâi.
16:21 A-lông tio̍h ēng siang chhiú hōaⁿ tī oa̍h ê soaⁿ-iûⁿ ê thâu-khak, tī i ê téng-bīn sêng-jīn I-su-la-el lâng só͘-ū ê pháiⁿ, kòe-sit kah in só͘-ū ê chōe-kò; lóng kui tī soaⁿ-iûⁿ ê thâu-khak, kau-tài só͘ phài ê lâng, sàng-khì khòng-iá.
16:22 Hit chiah soaⁿ-iûⁿ beh tam-tng in só͘-ū ê pháiⁿ kàu bô lâng tòa ê só͘-chāi, i chiū pàng soaⁿ-iûⁿ tī khòng-iá.
16:23 " A-lông tio̍h ji̍p-khì hōe-bō͘, thǹg i ji̍p sèng-só͘ ê sî só͘ chhēng iù-tē ê saⁿ-khò͘, lâu tī hia,
16:24 Koh tio̍h tī sèng ê só͘-chāi ēng chúi sé seng-khu, chhēng i ê chè-si ho̍k chhut-.lâi, hiàn i ê sio-chè kah jîn-bîn ê sio-chè, ūi tio̍h pún-sin kah jîn-bîn sio̍k-chōe.
16:25 Sio̍k-chōe-chè ê iû tio̍h kā i sio tī tôaⁿ téng.
16:26 Hitê pàng soaⁿ-iûⁿ kui tī A-cha-chel ê lâng, tio̍h sé i ê saⁿ, ēng chúi sé seng-khu, jiân-āu chiah thang ji̍p-khì iâⁿ lāi.
16:27 Chò sio̍k-chōe-chè ê gû-káng kah sio̍k-chōe-chè ê soaⁿ-iûⁿ, in ê hoeh í-keng tòa ji̍p-khì sèng-só͘ sio̍k-chōe, in ê seng-khu tio̍h tòa chhut-khì iâⁿ gōa, ēng hóe sio in ê phôe, in ê bah, in ê sái.
16:28 Sio in ê lâng tio̍h sé i ê saⁿ, ēng chúi sé seng-khu, jiân-āu chiah thang ji̍p-khì iâⁿ lāi.
16:29 Tio̍h Siú Sio̍k-chōe-ji̍t
" Ta̍k pái tú tio̍h chhit goe̍h chhe-cha̍p, lín tio̍h khek-khó͘ lín ê sim, bô-lūn sī pún-tē-lâng á-.sī kià-kha tī lín tiong-kan ê chhut-gōa lâng, lóng m̄ thang chò siáⁿ-mi̍h kang, che beh chò lín éng-oán ê lē.
16:30 In-ūi Siōng-chú tī chit ji̍t beh kā lín sio̍k-chōe, hō͘ lín chheng-khì, lín ē tī Siōng-chú ê bīn-chêng tit tio̍h chheng-khì, thoat-lī it-chhè ê chōe-kò.
16:31 Chit ji̍t, lín tio̍h siú-chò tōa ê An-hioh-ji̍t, lín tio̍h khek-khó͘ lín ê sim, che sī chò éng-oán ê lē.
16:32 Hitê siū boah iû lâi siat-li̍p i tng sèng-chit ê chè-si, to̍h-sī sêng-chiap i ê lāu-pē chò chè-si ê, tio̍h kiâⁿ sio̍k-chōe ê lé, tio̍h chhēng iù-tē pò͘ ê saⁿ, to̍h-sī sèng-saⁿ.
16:33 I tio̍h ūi tio̍h sèng ê sèng-só͘ sio̍k-chōe, mā ūi tio̍h hōe-bō͘ kah chè-tôaⁿ sio̍k-chōe, koh ūi tio̍h só͘-ū ê chè-si kah choân hōe-chiòng ê jîn-bîn sio̍k-chōe.
16:34 Che tio̍h chò lín éng-oán ê lē, to̍h-sī in-ūi I-su-la-el lâng it-chhè ê chōe, tio̍h chi̍t nî chi̍t pái ūi tio̍h in sio̍k-chōe." A-lông chiū chiàu Siōng-chú só͘ bēng-lēng Mô͘-se ê lâi kiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。