利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
15:1 Cha-po͘ Lâng Ē-sin Lâu-lâng ê Kui-tēng
Siōng-chú hoan-hù Mô͘-se kah A-lông kóng,
15:2 " Lín tio̍h hoan-hù I-su-la-el lâng, kā in kóng, ' Lâng nā hoān tio̍h ē-sin lâu-lâng ê chèng-thâu, i in-ūi chit-ê ē-sin lâu-lâng ê chèng-thâu chiū bô chheng-khì.
15:3 I in-ūi ē-sin lâu-lâng ê bô chheng-khì sī chit khoán, bô-lūn sī iáu teh lâu á-.sī í-keng thêng-chí lâu, lóng sī bô chheng-khì.
15:4 Kiàn-nā hoān tio̍h ē-sin lâu-lâng ê, i só͘ tó ê chhn̂g lóng sī bô chheng-khì, i só͘ chē ê mi̍h, mā sī bô chheng-khì.
15:5 Kiàn-nā bong tio̍h i ê chhn̂g ê, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:6 Hitê chē tio̍h ē-sin lâu-lâng ê lâng só͘ bat chē ê mi̍h ê, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:7 Hitê bong tio̍h ē-sin lâu-lâng ê lâng ê seng-khu ê, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:8 Nā ē-sin lâu-lâng ê lâng phùi nōa tī chheng-khì ê lâng ê seng-khu, hit-ê lâng tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:9 Ē-sin lâu-lâng ê lâng só͘ khiâ ê bé-oaⁿ mā sī bô chheng-khì.
15:10 Kiàn-nā bong tio̍h i seng-khu só͘ óa-.tio̍h ê mi̍h ê lâng, it-tēng ē bô chheng-khì-kàu ê-hng; the̍h tio̍h hit-ê mi̍h ê lâng tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:11 Ē-sin lâu-lâng ê lâng iáu-bōe ēng chúi sé-chhiú, i só͘ bong-.tio̍h ê lâng tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:12 Ē-sin lâu-lâng ê lâng só͘ bong-.tio̍h ê hûi khì-kù tio̍h kòng-phòa, chhâ-ê khì-kū tio̍h ēng chúi sé.
15:13 " Ē-sin lâu-lâng ê lâng ê ē-sin lâu-lâng nā í-keng hó, ūi tio̍h beh chheng-khì kakī, tio̍h sǹg chhit ji̍t, mā tio̍h sé i ê saⁿ, ēng oa̍h-chúi sé seng-khu, chiū tit tio̍h chheng-khì.
15:14 Kàu tē-peh ji̍t, i tio̍h ūi tio̍h kakī chhú nn̄g chiah pan-kah á-.sī nn̄g chiah hún-chiáu-kiáⁿ, kàu hōe-bō͘ mn̂g-kháu Siōng-chú ê bīn-chêng, kau-tài chè-si;
15:15 chè-si tio̍h hiàn, chi̍t chiah chò sio̍k-chōe-chè, chi̍t chiah chò sio-chè; chè-si tio̍h in-ūi i ê ē-sin lâu-lâng ê chèng-thâu, tī Siōng-chú ê bīn-chêng kā i sio̍k-chōe.
15:16 " Lâng nā bāng-siat, tio̍h ēng chúi sé seng-khu, it-tēng bô chheng-khì-kàu ê-hng.
15:17 Bô-lūn saⁿ-á-khò͘ á-.sī phôe-hu bak tio̍h cheng-chúi, tio̍h ēng chúi sé, it-tēng bô chheng-khì-kàu ê-hng.
15:18 Nā lâm-lí kau-ha̍p, nn̄g lâng tio̍h ēng chúi sé, it-tēng bô chheng-khì-kàu ê-hng. "
15:19 Cha-bó͘ Lâng Goe̍h-keng ê Kui-tēng
" Cha-bó͘ lâng kiâⁿ-keng lâu hoeh, it-tēng ù-òe kàu chhit ji̍t; kiàn-nā bong tio̍h i ê, it-tēng bô chheng-khì-kàu ê-hng.
15:20 Tī i ù-òe ê sî-kan, kiàn-nā i só͘ tó ê mi̍h lóng sī bô chheng-khì, kiàn-nā i só͘ chē ê mi̍h mā sī bô chheng-khì.
15:21 Kiàn-nā bong tio̍h i ê bîn-chhn̂g ê, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:22 Kiàn-nā bong tio̍h i só͘ chē ê mi̍h ê, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:23 Hitê mi̍h nā-sī tī chhn̂g-.ni̍h á-.sī tī chabó͘ lâng só͘ chē ê mi̍h, bong tio̍h i ê, it-tēng bô chheng-khì-kàu ê-hng.
15:24 Cha-po͘ lâng nā kah hit-ê chabó͘ lâng tâng-pâng, hō͘ i ê lahsap bak-.tio̍h, tio̍h chhit ji̍t bô chheng-khì, kiàn-nā i só͘ tó ê chhn̂g mā bô chheng-khì.
15:25 " Cha-bó͘ lâng nā tī keng-kî í-gōa hoān tio̍h chin chē ji̍t ê hiat-lāu á-.sī keng-kî í-āu ū hiat-lāu, i chiū in-ūi chit-ê hiat-lāu bô chheng-khì ê ji̍t kah i keng-kî ê ji̍t sio-siâng, i sī bô chheng-khì.
15:26 Tī i hiat-lāu só͘-ū ê ji̍t, kiàn-nā i só͘ tó ê chhn̂g, i tio̍h khòaⁿ chhin-chhiūⁿ keng-kî ê chhn̂g sio-siâng, kiàn-nā i só͘ chē ê mi̍h mā it-tēng bô chheng-khì kah i keng-kî ê sî bô chheng-khì sio-siâng.
15:27 Kiàn-nā bong tio̍h hiahê mi̍h ê chiū bô chheng-khì, tio̍h sé i ê saⁿ, kakī tī chúi-.ni̍h sé, bô chheng-khì-kàu ê-hng.
15:28 Cha-bó͘ lâng hiat-lāu nā í-keng hó, tio̍h ūi kakī sǹg chhit ji̍t, jiân-āu chiah chheng-khì.
15:29 Kàu tē-peh ji̍t, i tio̍h ūi kakī chhú nn̄g chiah pan-kah á-.sī nn̄g chiah hún-chiáu-kiáⁿ, tòa kàu hōe-bō͘ mn̂g-kháu, kau-tài chè-si.
15:30 Chè-si tio̍h hiàn chi̍t chiah chò sio̍k-chōe-chè, chi̍t chiah chò sio-chè; chè-si un-ūi hit-ê lâng hiat-lāu bô chheng-khì, tio̍h tī Siōng-chú ê bīn-chêng ūi tio̍h i sio̍k-chōe.
15:31 " Lín tio̍h ánne hō͘ I-su-la-el lâng kah in ê bô chheng-khì keh-tn̄g, bián-tit in òe lahsap tī in tiong-kan ê Góa ê hōe-bō͘, in-ūi in ê bô chheng-khì tì-sú sí-bông. "
15:32 " Che sī hoān tio̍h ē-sin lâu-lâng chèng kah bāng-siat tì-sú i bô chheng-khì ê kah hiahê ū keng-kî ê pēⁿ ê chabó͘ lâng kah hoān tio̍h ē-sin lâu-lâng ê, bô-lūn lâm-lí, í-ki̍p lâng kah bô chheng-khì ê chabó͘ lâng tâng-pâng ê kui-lē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。