聖經閱讀

查字典本章地圖影像 [ 條列 | 表格 | 整段 ] 繁簡語態度量衡其他閱讀計畫

新版查詢或移至：說明

利未記線上收聽:中文和合本現代中文譯本修訂版現代台語台語聖經客語福州話希伯來文讀經下載檔案關於語音聖經

14:1

Thái-ko Pēⁿ ê Kiat-chēng Kui-tēng

Siōng-chú hoan-hù Mô͘-se kóng,
14:2 " Thái-ko ê tit tio̍h chheng-khì ê ji̍t, i ê kui-lē to̍h-sī ánne: tio̍h chhōa i khì kìⁿ chè-si.
14:3 Chè-si tio̍h chhut-lâi iâⁿ gōa, chè-si tio̍h kā i giām, lí khòaⁿ, thái-ko ê, nā i ê thái-ko chèng í-keng hó,
14:4 chè-si tio̍h hoan-hù lâng ūi tio̍h hit-ê beh tit tio̍h chheng-khì ê, chhú nn̄g chiah chheng-khì oa̍h-oa̍h ê chiáu kah pek-hiuⁿ chhâ, chu-âng sek ê liāu kah gû-chhek-chháu.
14:5 Chè-si tio̍h hoan-hù lâng tī oa̍h-chúi ê téng-bīn thâi hit nn̄g chiah chiáu ê chi̍t chiah, tī hûi-khì lāi.
14:6 Koan-hē hit chiah oa̍h-chiáu, i tio̍h lia̍h-. lâi, ēng pek-hiuⁿ chhâ, chu-âng sek ê liāu, gû-chhek-chháu kah oa̍h-chiáu, lóng ùn tī hit chiah tī oa̍h-chúi téng-bīn thâi ê chiáu ê hoeh.
14:7 Tio̍h hiù hit-ê thái-ko beh tit tio̍h chheng-khì ê lâng chhit pái, chiū toàn-tēng i chò chheng-khì, koh pàng hit chiah oa̍h-chiáu khì soaⁿ-.ni̍h.
14:8 Beh tit tio̍h chheng-khì ê lâng tio̍h sé i ê saⁿ-khò͘, thì i choân-pō͘ ê mn̂g, ēng chúi sé seng-khu chiū chheng-khì; jiân-āu thang ji̍p-khì iâⁿ lāi, chóng-.sī, tio̍h tī kakī ê pò͘-pêⁿ gōa tòa chhit ji̍t.
14:9 Kàu tē-chhit ji̍t, tio̍h thì i choân-pō͘ ê thâu-mn̂g kah chhùi-chhiu, ba̍k-bâi, to̍h-sī thì i só͘-ū ê mn̂g, koh tio̍h sé i ê saⁿ-khò͘, ēng chúi sé seng-khu, chiū chheng-khì.
14:10 " Kàu tē-peh ji̍t, i tio̍h chhú nn̄g chiah bô khoat-tiám ê iûⁿ-káng-á kah chi̍t chiah bī-móa-nî bô khoat-tiám ê iûⁿ-chéng-á, koh tio̍h ēng tiâu-hô iû ê mī-hún cha̍p-hūn chi saⁿ e-hoat chò sò͘-chè kah iû chi̍t lok.
14:11 Kiâⁿ chheng-khì ê lé ê chè-si, tio̍h kā hit-ê ài tit tio̍h chheng-khì ê lâng kah hiahê mi̍h, an-tì tī hōe-bō͘ mn̂g-kháu, Siōng-chú ê bīn-chêng.
14:12 Chè-si tio̍h chhú iûⁿ-káng-á chi̍t chiah, hiàn chò pó͘ kòe-si̍t ê chè kah iû chi̍t lô-kek, lóng iô tī Siōng-chú ê bīn-chêng chò iô-chè.
14:13 Koh tio̍h thâi iûⁿ-káng-á tī sèng-só͘ ê só͘-chāi, to̍h-sī thâi sio̍k-chōe-chè kah sio-chè ê só͘-chāi. Pó͘ kòe-si̍t chè tio̍h kui hō͘ chè-si, chhin-chhiūⁿ sio̍k-chōe-chè kāng-khoán, sī chì-sèng ê.
14:14 Chè-si tio̍h the̍h tām-po̍h-á pó͘ kòe-si̍t chè ê hoeh, boah tī ài tit tio̍h chheng-khì ê lâng chiàⁿ pêng ê hīⁿ-á-sôe kah chiàⁿ chhiú ê tōa-thâu-bú, í-ki̍p chiàⁿ-kha ê tōa-thâu-bú.
14:15 Chè-si tio̍h tùi hit chi̍t lô-kek ê iû tiong-kan the̍h tām-po̍h-á, tò tī kakī tò chhiú ê chhiú tiong-sim.
14:16 Chè-si tio̍h ēng chiàⁿ chhiú ê chi̍t ki chéng-thâu-á ùn tò chhiú tiong-sim ê iû, tī Siōng-chú ê bīn-chêng, ēng chéng-thâu-á hiù iû chhit pái.
14:17 Chè-si kā chhiú tiong só͘ chhun lo̍h-.lâi ê iû, boah tī hit-ê ài tit tio̍h chheng-khì ê lâng chiàⁿ pêng ê hīⁿ-á-sôe kah chiàⁿ chhiú ê tōa-thâu-bú, í-ki̍p chiàⁿ-kha ê tōa-thâu-bú, to̍h-sī boah tha̍h tī pó͘ kòe-si̍t chè ê hoeh téng-bīn.
14:18 Chè-si chhiú tiong só͘ chhun lo̍h-.lâi ê iû, tio̍h piàⁿ tī hit-ê ài tit tio̍h chheng-khì ê lâng ê thâu-khak téng, chè-si tī Siōng-chú ê bīn-chêng kā i sio̍k-chōe.
14:19 " Chè-si tio̍h hiàn sio̍k-chōe-chè, kā hit-ê ài tit tio̍h chheng-khì ê lâng, ūi tio̍h i ê bô chheng-khì sio̍k-chōe, jiân-āu thâi hit-ê sio-chè ê chengseⁿ.
14:20 Chè-si tio̍h tī tôaⁿ téng hiàn sio-chè kah sò͘-chè, chè-si tio̍h ūi i sio̍k-chōe, i chiū chheng-khì.
14:21 " I nā sànchhiah bē tàng chún-pī kàu hiah chē, chiū tio̍h chhú chi̍t chiah iûⁿ-káng-á chò pó͘ kòe-si̍t ê chè, thang iô lâi ūi i sio̍k-chōe, mā tio̍h tòa tiâu-hô iû ê iù mī-hún cha̍p-hūn chi-it e-hoat kah iû chi̍t lô-kek lâi chò sò͘-chè.
14:22 Koh chiàu i ê khùi-la̍t chhú nn̄g chiah pan-kah á-.sī nn̄g chiah hún-chiáu-kiáⁿ, chi̍t chiah chò sio̍k-chōe-chè, chi̍t chiah chò sio-chè.
14:23 Kàu tē-peh ji̍t, ūi tio̍h i tit tio̍h chheng-khì, kā chiahê tòa kàu hōe-bō͘ mn̂g-kháu, Siōng-chú ê bīn-chêng, kau-tài chè-si.
14:24 Chè-si tio̍h chhú pó͘ kòe-si̍t ê iûⁿ-á kah iû chi̍t lô-kek, chè-si tio̍h tī Siōng-chú ê bīn-chêng iô, lâi chò iô-chè.
14:25 I tio̍h thâi pó͘ kòe-si̍t chè ê iûⁿ-á, chè-si chhú tām-po̍h-á pó͘ kòe-si̍t chè ê hoeh, boah tī hit-ê ài tit tio̍h chheng-khì ê lâng chiàⁿ pêng ê hīⁿ-á-sôe kah chiàⁿ chhiú ê tōa-thâu-bú kah chiàⁿ-kha ê tōa-thâu-bú.
14:26 Chè-si tio̍h kā tām-po̍h iû tò tī kakī tò chhiú ê chhiú tiong-sim.
14:27 Chè-si ēng tò chhiú-.ni̍h ê iû, tī Siōng-chú ê bīn-chêng, ēng chiàⁿ chhiú ê chi̍t ki chéng-thâu-á hiù iû chhit pái.
14:28 Chè-si koh ēng chhiú tiong ê iû boah tām-po̍h tī hit-ê ài tit tio̍h chheng-khì ê lâng chiàⁿ pêng ê hīⁿ-á-sôe kah chiàⁿ chhiú ê tōa-thâu-bú, í-ki̍p chiàⁿ-kha ê tōa-thâu-bú, to̍h-sī boah tī pó͘ kòe-si̍t chè ê hoeh ê goân ūi.
14:29 Chè-si chhiú tiong só͘ chhun lo̍h-.lâi ê iû, tio̍h boah tī hit-ê ài tit tio̍h chheng-khì ê lâng ê thâu-khak, tī Siōng-chú ê bīn-chêng ūi i sio̍k-chōe.
14:30 I tio̍h chiàu i ê khùi-la̍t hiàn hiahê pan-kah ê chi̍t chiah á-.sī hún-chiáu-kiáⁿ ê chi̍t chiah, to̍h-sī chiàu i só͘ ē ê,
14:31 Chi̍t chiah chò sio̍k-chōe-chè, chi̍t chiah chò sio-chè kah sò͘-chè chò-hóe hiàn; chè-si tio̍h tī Siōng-chú ê bīn-chêng, kā hit-ê ài tit tio̍h chheng-khì ê lâng sio̍k-chōe.
14:32 Lâng hoān tio̍h thái-ko ê chèng-thâu, mā bô la̍t thang chún-pī tit tio̍h chheng-khì ê lé-mi̍h, hit-ê kui-lē sī ánne. "
14:33

Chhù lāi Seⁿ Ko͘ ê Kui-tēng

Siōng-chú hoan-hù Mô͘-se kah A-lông kóng,
14:34 " Lín kàu Góa siúⁿ-sù hō͘ lín chò sán-gia̍p ê Ka-nân tē ê sî, Góa ēng thái-ko chèng jiám tio̍h chi̍t keng chhù, tī lín só͘ tit tio̍h chò sán-gia̍p ê tē;
14:35 chhù-chú tio̍h khì thong-ti chè-si, kā i kóng, ' Chiàu góa khòaⁿ, chhù lāi chhin-chhiūⁿ ū chèng-thâu. '
14:36 Chè-si iáu-bōe ji̍p-khì giām chèng-thâu ê chìn-chêng, chè-si chiū tio̍h hoan-hù lâng, kā chhù piàⁿ khang, bián-tit chhù lāi só͘-ū ê bak tio̍h bô chheng-khì, jiân-āu chè-si tio̍h ji̍p-khì giām hit keng chhù.
14:37 I tio̍h giām hit-ê chèng-thâu, lí khòaⁿ, chèng-thâu nā tī chhù ê piah ū hián-chhut chheⁿ á-.sī âng ê nah-hûn, khoán-sit chhim-ji̍p chhiûⁿ-piah,
14:38 chè-si tio̍h chhut hit keng chhù, kàu chhù mn̂g-kháu, hong hit keng chhù chhit ji̍t. "
14:39

Chhù Jiám tio̍h Thái-ko Chèng ê Kui-tēng

" Kàu tē-chhit ji̍t, chè-si tio̍h koh khì giām, lí khòaⁿ, chèng-thâu nā thòaⁿ tī chhù ê chhiûⁿ-piah,
14:40 chè-si chiū tio̍h hoan-hù lâng kā hiahê jiám tio̍h chèng-thâu ê chio̍h iah khí-.lâi, hiat tī siâⁿ gōa bô chheng-khì ê só͘-chāi.
14:41 Mā tio̍h kiò lâng khau chhù lāi ê sì-kho͘-ûi, só͘ khau khí-.lâi ê hoe-thô͘, tio̍h piàⁿ tī siâⁿ gōa bô chheng-khì ê só͘-chāi.
14:42 Koh tio̍h ēng pa̍t tè chio̍h tāi-thè hiahê chio̍h, koh ēng hoe-thô͘ boah hit keng chhù.
14:43 " I iah chio̍h, khau chhù, boah hoe liáu-āu, chèng-thâu nā koh kàu, koh hoat-hiān tī hit keng chhù,
14:44 chè-si tio̍h koh ji̍p-khì giām, chèng-thâu nā thòaⁿ tī hit keng chhù, hit keng chhù sī jiám tio̍h ok ê thái-ko, sī bô chheng-khì.
14:45 I chiū tio̍h thiah hit keng chhù, i ê chio̍h, i ê chhâ kah i só͘-ū ê hoe-thô͘, lóng poaⁿ chhut-khì siâⁿ gōa, kàu bô chheng-khì ê só͘-chāi.
14:46 Hit keng chhù hong ba̍t ê sî-kan, lâng nā ji̍p-khì chiū bô chheng-khì, kàu ê-hng.
14:47 Khùn tī hit keng chhù ê, tio̍h sé i ê saⁿ-khò͘; tī hit keng chhù chia̍h ê mā tio̍h sé i ê saⁿ-khò͘.
14:48 " Hit keng chhù boah hoe liáu-āu, chè-si ji̍p-khì giām, lí khòaⁿ, nā chèng-thâu bô thòaⁿ tī chhù lāi, chè-si chiū tio̍h toàn-tēng hit keng chhù chò chheng-khì, in-ūi chèng-thâu í-keng siau-bia̍t-.khì.
14:49 Ūi tio̍h chheng-khì hit keng chhù, tio̍h chhú nn̄g chiah chiáu kah pek-hiuⁿ chhâ, chu-âng sek liāu kah gû-chhek-chháu.
14:50 Tio̍h tī oa̍h-chúi téng, hûi-khì ê lāi-bīn thâi hit nn̄g chiah chiáu ê chi̍t chiah.
14:51 I tio̍h the̍h hit-ê pek-hiuⁿ chhâ, gû-chhek-chháu, chu-âng sek ê liāu kah hit chiah oa̍h-chiáu, lóng ùn tī hit chiah siū thâi ê chiáu ê hoeh kah oa̍h-chúi, lâi hiù hit keng chhù chhit pái.
14:52 I tio̍h ēng hit chiah chiáu ê hoeh, oa̍h-chúi, oa̍h-chiáu, pek-hiuⁿ chhâ, gû-chhek-chháu kah chu-âng sek liāu, lâi chheng-khì hit keng chhù.
14:53 Chóng-.sī, tio̍h kā hit chiah oa̍h-chiáu pàng tī siâⁿ gōa ê soaⁿ-.ni̍h, ánne kā hit keng chhù sio̍k-chōe, hit keng chhù chiū chheng-khì.
14:54 " Che sī ūi tio̍h ta̍k chióng thái-ko ê chèng-thâu kah chhng,
14:55 saⁿ-khò͘ kah chhù ê thái-ko,
14:56 í-ki̍p chéng, sián, hóe-pan só͘ li̍p ê kui-lē,
14:57 lâi chí-bêng tang-sî sī bô chheng-khì, tang-sî sī chheng-khì, che sī thái-ko ê kui-lē. "

查詢或移至：說明

[ 條列 | 表格 | 整段 ] 繁簡語態重新查詢影像本章地圖度量衡其他

中文:和合本和合本2010現代中文譯本1995版現代中文譯本2019版新譯本恢復本思高譯本呂振中譯本NET聖經中譯本深文理和合本官話和合本北京官話譯本文理和合本神天聖書文理委辦譯本施約瑟淺文理譯本馬殊曼譯本四人小組譯本高連茨基聖詠經郭實臘新遺詔書和舊遺詔聖書太平天國文理譯本原文直譯(參考用)
英文:ESVKJVBBEWEBASVDarbyERV
原文與古譯本:舊約馬索拉原文七十士譯本
台客語:現代台語2021版漢字現代台語2021版全羅聖經公會巴克禮台漢本巴克禮全羅巴克禮漢羅聖經公會現代客語全羅聖經公會現代客語漢字全民台語聖經全羅全民台語聖經漢羅全民台語聖經Ruby
其他:聖經公會布農語聖經聖經公會泰雅爾語聖經聖經公會魯凱語聖經賽德克族Tgdaya語聖經公會阿美語1997聖經公會太魯閣語聖經印尼聖經越南聖經俄文聖經韓文聖經日語聖經藏語聖經武加大譯本新武加大譯本

各聖經譯本著作權如版權說明。

本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。

信望愛站使用cookies 技術來強化網站功能，您使用本網站，表示您同意我們使用 cookies 技術.