啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
22:1 Thiⁿ-sài koh pò góa khòaⁿ siâⁿ lāi ke-lō͘ tiong ū oa̍h-miā-chúi ê hô, chheng kah ná chhin-chhiūⁿ chúi-chiⁿ, tùi Siōng-tè kah iûⁿ-ko ê pó-chō lâu chhut-.lâi.
22:2 Hô ê siang pêng ū oa̍h-miā-chhiū, múi nî kiat cha̍p-jī pái ê kóe-chí, múi kò-goe̍h kiat chi̍t pái, chhiū-hio̍h ē-tàng chò i-tī lia̍t kok ê lō͘-ēng.
22:3 Siâⁿ lāi lóng bô koh ū chiù-chó͘. Siōng-tè kah iûⁿ-ko ê pó-chō ē an-tì tī siâⁿ lāi.
22:4 I ê lô͘-po̍k ē ho̍k-sāi I, mā ē khòaⁿ tio̍h I ê bīn, I ê miâ ē siá tī in ê thâu-hia̍h.
22:5 Tī hia bô koh ū àm-sî, mā bô su-iàu teng ê kng kah ji̍t-thâu ê kng, in-ūi Chú — Siōng-tè ē kā in chiò-kng, in ē éng-oán chiáng-koân chò ông.
22:6 Ki-tok Liâm-piⁿ Ē Kàng-lîm
Hitê thiⁿ-sài koh kā góa kóng, " Chiahê ōe chin-si̍t khó-khò, siúⁿ-sù I ê Sèng Sîn hō͘ chèng sian-ti ê Chú — Siōng-tè ū chhe I ê thiⁿ-sài, kā it-tēng sûi-sî ē hoat-seng ê tāichì chí-sī I ê lô͘-po̍k. "
22:7 I-é-su kóng, " Lín tio̍h chù-ì thiaⁿ, góa liâmpiⁿ ē kàu lín tiong-kan. Chun-siú chit pún chheh ī-giân ê ōe ê lâng, chin ū hok-khì! "
22:8 Góa — Iô-há-neh sī chhin-sin thiaⁿ tio̍h koh khòaⁿ tio̍h chiahê tāichì ê lâng. Góa thiaⁿ tio̍h koh khòaⁿ tio̍h liáu-āu, chiū phak lo̍h-khì hit-ê kā chiahê tāichì kā góa chí-sī ê thiⁿ-sài kha chêng, beh kā i pài.
22:9 I kā góa kóng, " Chhian-bān m̄ thang! Góa kah lí í-ki̍p hiahê ūi I-é-su chò kiàn-chèng ê lâng, pêⁿ-pêⁿ lóng sī chò lô͘-po̍k ê, lí tio̍h pài Siōng-tè! "
22:10 Thiⁿ-sài koh kā góa kóng, " M̄-thang kā chit pún chheh ī-giân ê ōe hong ba̍t, in-ūi ī-giân si̍t-hiān ê ji̍t-kî teh beh kàu à.
22:11 Hō͘ put-gī ê lâng kè-sio̍k chò put-gī, hō͘ ù-òe ê lâng kè-sio̍k ù-òe, hō͘ hó lâng kè-sio̍k chò hó, hō͘ sèng-kiat ê lâng kè-sio̍k sèng-kiat. "
22:12 I-é-su kóng, " Góa liâmpiⁿ kàu! Góa beh tòa pò-siúⁿ lâi, chiàu ta̍k lâng ê só͘ chò kā i pò-èng.
22:13 Góa sī khí-thâu ê Al-hoah (A) kah kiat-bóe ê O͘-mè-gah (Ω), sī khai-sí kah kiat-sok.
22:14 Hiahê kā kakī ê saⁿ-á-khò͘ sé chheng-khì ê lâng chin ū hok-khì! In ū koân thang chia̍h oa̍h-miā-chhiū ê kóe-chí, koh ē-tàng tùi chiahê mn̂g ji̍p siâⁿ.
22:15 Hiahê káu-lūi, kiâⁿ siâ-su̍t-ê, kiâⁿ kan-îm ê, thâi lâng ê, pài ngó͘-siōng ê kah só͘-ū ài kóng pe̍h-chha̍t koh kan-chà ê lâng, tio̍h lâu tī siâⁿ gōa.
22:16 " Góa — I-é-su í-keng chhe-phài góa ê thiⁿ-sài khì chiahê kàu-hōe, tùi lín chèng-bêng chiahê tāichì, góa sī Ta-bi̍t ê kin-thâu, koh sī i ê kiáⁿ-sun, sī kng iàⁿiàⁿ ê khé-bêng-chheⁿ. "
22:17 Sèng Sîn kah sin-niû lóng kóng, " Lâi! Thiaⁿ-kìⁿ ê lâng lóng tio̍h kóng, " Lâi! " Chhùi-ta ê lâng tio̍h lâi! Ì-ài ê lâng thang pe̍h-pe̍h niá-siū oa̍h-miā ê chúi.
22:18 Kiat-lūn
Góa — Iô-há-neh giâm-siok kéng-kò thiaⁿ tio̍h chit pún chheh ī-giân ê ōe ê lâng, nā ū lâng kā i ke-thiⁿ, Siōng-tè ē kā chit pún chheh só͘ kì-chài ê chai-hō ke-thiⁿ hō͘ i;
22:19 Nā ū lâng san-tû chit pún ī-giân ê chheh ê ōe, Siōng-tè mā ē kā chit pún chheh só͘ kì-chài, goân-pún i eng-kai tit ê oa̍h-miā-chhiū kah sèng-siâⁿ ê hūn-gia̍h san-tû.
22:20 Ūi tio̍h chiahê tāichì chò kiàn-chèng hit ūi kóng, " Tio̍h, góa liâmpiⁿ lâi! " A-men! Chú I-é-su, kiû Lí kàng-lîm!
22:21 Goān Chú I-é-su ê un-tián kah lín tāi-ke tông-chāi! A-men!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。