啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
19:1 Tī Thiⁿ téng ê Khèng-chiok
Jiân-āu, góa koh thiaⁿ tio̍h tī thiⁿ-téng ū chhin-chhiūⁿ chi̍t-tōa-tīn lâng tōa-siaⁿ teh hoah, " Halélúiah! O-ló Chú! Chín-kiù, êng-kng, koân-lêng lóng sio̍k lán ê Siōng-tè!
19:2 I ê sím-phòaⁿ chin-si̍t koh kong-gī, in-ūi I bat sím-phòaⁿ hit-ê ēng îm-loān pāi-hoāi tē-chiūⁿ ê tōa îm-hū, koh hêng-hoa̍t i lâu Siōng-tè lô͘-po̍k ê hoeh ê chōe. "
19:3 In koh-chài hoah, " Halélúiah! O-ló Chú! Siâⁿ hō͘ hóe sio ê ian ti̍t-ti̍t chhèng koân, éng-oán bē thêng! "
19:4 Hit jī-cha̍p sì ê tiúⁿ-ló kah sì chiah oa̍h-mi̍h phak lo̍h-khì kèng-pài chē tī pó-chō ê Siōng-tè, kóng, " A-men! Halélúiah! O-ló Chú! "
19:5 Iûⁿ-ko ê Hun-iàn
Ū siaⁿ tùi pó-chō chhut-.lâi, kóng, " Só͘-ū Siōng-tè ê lô͘-po̍k kah kèng-pài I ê lâng, bô-lūn tōa-sè lóng tio̍h oló lán ê Chú! "
19:6 Góa koh ū thiaⁿ tio̍h chhin-chhiūⁿ chi̍t-tōa-tīn lâng ê siaⁿ, chhin-chhiūⁿ chin-chē tiâu hô-liû ê siaⁿ, chhin-chhiūⁿ lûi tōa-tân ê siaⁿ, kóng, " Halélúiah! In-ūi lán ê Chú — choân-lêng Siōng-tè í-keng chò ông ā!
19:7 Lán tio̍h hoaⁿ-hí khoài-lo̍k, kā êng-kng kui hō͘ I, in-ūi iûⁿ-ko hun-in ê kî í-keng kàu à, I ê sin-niû í-keng chún-pī hó-sè à.
19:8 Siōng-tè í-keng hō͘ i chhēng pe̍h-siaksiak koh chheng-khì ê iù-môa-pò͘ saⁿ. "( iù-môa-pò͘ sī teh chí sìn-tô͘ só͘ kiâⁿ ê chiàⁿ gī-hêng ūi. )
19:9 Jiân-āu thiⁿ-sài kā góa kóng, " Lí tio̍h siá lo̍h-.lâi, siū iau-chhiáⁿ lâi hù iûⁿ-ko hun-iàn ê lâng, chin ū hok-khì. " I koh kā góa kóng, " Che sī Siōng-tè chin-si̍t ê ōe. "
19:10 Góa chiū phak tī thiⁿ-sài ê kha chêng beh kā i pài. I kā góa kóng, " Chhian-bān m̄ thang! Góa kah lí, í-ki̍p hiahê ūi I-é-su chò kiàn-chèng ê lâng, pêⁿ-pêⁿ lóng sī chò lô͘-po̍k ê, lí tio̍h pài Siōng-tè! " In-ūi hiahê ūi I-é-su chò kiàn-chèng ê lâng kah sian-ti kāng-khoán, lóng sī siū tio̍h Sèng Sîn ê kám-tōng.
19:11 Ki-tok Phah-pāi Béng-siù
Góa koh khòaⁿ tio̍h thiⁿ khui, tī hia ū chi̍t chiah pe̍h bé, khiâ tī bé-téng hit ūi kiò-chò " Tiong-sìn " Kah" Chin-si̍t ", I chiàu kong-gī lâi sím-phòaⁿ, lâi kau-chiàn.
19:12 I ê ba̍k-chiu chhin-chhiūⁿ hóe-iām, thâu-khak téng tì chin chē ông-koan, seng-khu koh ū siá chi̍t-ê miâ, I pún-sin í-gōa bô lâng bat chit-ê miâ.
19:13 I chhēng ê hit niá tn̂g-phàu bak kah choân-sī hoeh. I ê miâ kiò-chò " Siōng-tè ê tō ".
19:14 Thiⁿ téng ê kun-peng khiâ pe̍h bé lâi tòe I, in lóng chhēng pe̍h koh chheng-khì ê iù-môa-pò͘ saⁿ.
19:15 Tùi I ê chhùi thò͘-chhut chi̍t ki lāi-kiàm, ēng lâi cheng-ho̍k lia̍t kok. I beh ēng thih-koái tī-lí in, I mā beh ta̍h choân-lêng Siōng-tè tōa siū-khì ê chiú-khut.
19:16 Tī I ê tn̂g-phàu kah kha-thúi ū siá chi̍t-ê miâ, to̍h-sī " Bān-ông ê Ông, bān-chú ê Chú ".
19:17 Góa koh khòaⁿ tio̍h chi̍t-ê thiⁿ-sài khiā tī ji̍t-thâu ê tiong-ng, tùi khong-tiong só͘-ū ê poe-chiáu tōa-siaⁿ hoah, " Lâi! Chò-hóe lâi chham-ka Siōng-tè ê tōa iàn-se̍k!
19:18 Lâi chia̍h chiahê kun-ông, chiong-kun kah ióng-sū ê bah, bé kah khiâ bé ê lâng ê bah, só͘-ū chū-iû ê lâng kah lô͘-lē ê bah, sī-sè kah sī-tōa ê bah. "
19:19 Góa koh khòaⁿ tio̍h hit chiah béng-siù kah tē-chiūⁿ ê kun-ông, í-ki̍p in ê kun-peng lóng chū-chi̍p, beh kah khiâ bé hit ūi, í-ki̍p I ê kun-peng kau-chiàn.
19:20 Hit chiah béng-siù kah í-chêng tī i bīn-chêng kiâⁿ kî-chek ê ké sian-ti chò-hóe siū lia̍h. Chit-ê ké sian-ti bat ēng kî-chek lâi bê-he̍k hiahê ū béng-siù ê kì-hō kah pài béng-siù chō-siōng ê lâng. Hit chiah béng-siù kah hit-ê ké sian-ti, in nn̄g-ê hông oa̍h-oa̍h hiat lo̍h-khì ū liû-hông teh sio ê hóe-ô͘.
19:21 Chhun lo̍h-.lâi ê kun-peng lóng hō͘ khiâ bé hit ūi ê chhùi thò͘-chhut ê kiàm sat-hāi. Só͘-ū ê poe-chiáu lóng lâi chia̍h in ê bah, chia̍h kàu pá.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。