啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
14:1 Iûⁿ-ko kah hit Cha̍p-sì Bān Sì-chheng Lâng
Góa koh khòaⁿ, ū khòaⁿ tio̍h iûⁿ-ko khiā tī Si-óng soaⁿ, ū cha̍p-sì bān sì-chheng lâng kah I chò-hóe; in ê thâu-hia̍h lóng ū iûⁿ-ko ê miâ kah I ê Thiⁿ-pē ê miâ.
14:2 Góa thiaⁿ tio̍h ū siaⁿ tùi thiⁿ-téng chhut-.lâi, chhin-chhiūⁿ tōa-chúi teh chhiâng ê siaⁿ, mā chhin-chhiūⁿ lûi teh tân ê siaⁿ; góa só͘ thiaⁿ tio̍h chit-ê siaⁿ, chhin-chhiūⁿ khîm-chhiú teh tôaⁿ khiā-khîm ê siaⁿ.
14:3 In tī pó-chō kah sì chiah oa̍h-mi̍h í-ki̍p tiúⁿ-ló ê bīn-chêng, chhiùⁿ chi̍t siú sin koa; chit siú koa tû-liáu tùi tē-chiūⁿ sio̍k-hôe hit cha̍p-sì bān sì-chheng lâng í-gōa, bô lâng ē-hiáu o̍h.
14:4 Chiahê lâng sī m̄ bat bak tio̍h lú-sek ê tông-lâm, chiahê lâng kin-tòe iûⁿ-ko khì ta̍k só͘-chāi. In sī tùi jîn-lūi tiong-kan sio̍k-hôe, lâi chò khí-thâu se̍k ê kóe-chí, hiàn hō͘ Siōng-tè kah iûⁿ-ko ê.
14:5 In m̄ bat kóng pe̍h-chha̍t, lóng bô khoat-tiám.
14:6 Saⁿ-ê Thiⁿ-sài ê Sìn-sit
Góa koh khòaⁿ tio̍h lēng-gōa chi̍t-ê thiⁿ-sài tī khong-tiong teh poe. I ū éng-oán ê sìn-sit beh thoân hō͘ tē-chiūⁿ ê lâng, mā hō͘ ta̍k pang-kok, ta̍k chióng-cho̍k, ta̍k-khoán gí-giân kah ta̍k-ê bîn-cho̍k.
14:7 Chit-ê thiⁿ-sài tōa-siaⁿ kóng, " Tio̍h kèng-ùi Siōng-tè, kui êng-kng hō͘ I! In-ūi I sím-phòaⁿ jîn-lūi ê sî-khek kàu à. Tio̍h kèng-pài chhòng-chō thiⁿ, tē, hái kah chúi-goân ê Siōng-tè. "
14:8 Koh ū lēng-gōa tē-jī-ê thiⁿ-sài sòa lo̍h-khì kóng, " Tó lo̍h-khì lò͘! Hō͘ bān-pang lim i îm-loān lia̍t-chiú ê Ba-bú-lông, tó lo̍h-khì lò͘! "
14:9 Koh ū lēng-gōa tē-saⁿ-ê thiⁿ-sài sòa lo̍h-khì tōa-siaⁿ kóng, " Nā ū pài hit chiah béng-siù kah i ê chō-siōng, í-ki̍p tī thâu-hia̍h á-.sī chhiú-.ni̍h siū khàm ìn chò kì-hō ê lâng,
14:10 Mā tio̍h lim Siōng-tè tōa siū-khì ê chiú, to̍h-sī thîn tī Siōng-tè siū-khì chiú-poe ê bô chham chúi ê sûn-chiú; in ē tī sèng thiⁿ-sài kah iûⁿ-ko ê bīn-chêng, siū tio̍h hóe kah liû-hông ê khok-hêng.
14:11 In siū khó͘-to̍k ê ian ē chhèng koân, éng-oán bô soah; hiahê pài hit chiah béng-siù kah i ê chō-siōng, í-ki̍p siū i ê miâ khàm ìn chò kì-hō ê lâng, mê-ji̍t lóng bô thang an-hioh. "
14:12 In-ūi ánne, hiahê chun-siú Siōng-tè ê kài-bēng koh tùi I-é-su tiong-si̍t ê sìn-tô͘ tio̍h ū nāi-sim.
14:13 Góa koh thiaⁿ tio̍h tùi thiⁿ-téng ū siaⁿ kóng, " Lí tio̍h siá lo̍h-.lâi! Tùi taⁿ í-āu, ūi tio̍h Chú lâi sòng-sit sèⁿ-miā ê lâng si̍t-chāi ū hok-khì! " Sèng Sîn hôe-èng kóng, " Sī à, in ē kiat-sok in ê lô-khó͘ lâi an-hioh, in-ūi in lô-khó͘ ê sêng-kó ē kin-tòe in khì. "
14:14 Tē chiūⁿ ê Nn̄g-pái Siu-sêng
Góa koh khòaⁿ, ū khòaⁿ tio̍h chi̍t-phiàn pe̍h-hûn, hûn téng chē chi̍t-ê lâng chhin-chhiūⁿ Jîn-chú, thâu-khak tì kim ê bián-liû, chhiú gia̍h chi̍t ki lāi ê liâm-le̍k'á.
14:15 Koh ū lēng-gōa chi̍t-ê thiⁿ-sài tùi sèng-tiān chhut-.lâi, tùi chē tī hûn téng hit ūi tōa-siaⁿ hoah, " Tio̍h ēng Lí ê liâm-le̍k'á lâi siu-koah, in-ūi siu-koah ê sî-kî í-keng kàu, tē-chiūⁿ ê lông-chok-bu̍t lóng kàu se̍k à. "
14:16 Chē tī hûn téng hit ūi chiū kā liâm-le̍k'á hiat lo̍h-khì tē-chiūⁿ, tē-chiūⁿ ê lông-chok-bu̍t chiū hō͘ I siu koah khí-.lâi.
14:17 Koh ū lēng-gōa chi̍t-ê thiⁿ-sài tùi thiⁿ-téng ê sèng-tiān chhut-.lâi, i mā gia̍h chi̍t ki lāi ê liâm-le̍k'á.
14:18 Koh ū lēng-gōa chi̍t-ê teh chiáng-koán hóe ê thiⁿ-sài tùi chè-tôaⁿ chhut-.lâi, tùi gia̍h lāi ê liâm-le̍k'á hit-ê thiⁿ-sài tōa-siaⁿ hoah, " Ēng lí hit ki lāi ê liâm-le̍k'á khì siu-koah tē-chiūⁿ kui pha ê phû-tô, in-ūi phû-tô í-keng kàu se̍k à. "
14:19 Hitê thiⁿ-sài chiū kā liâm-le̍k'á hiat lo̍h-khì tē-chiūⁿ, kā tē-chiūⁿ ê phû-tô koah khí-.lâi, koh kā phû-tô hiat lo̍h-khì Siōng-tè tōa siū-khì ê chiú-khut.
14:20 Hitê chiú-khut tī siâⁿ gōa hō͘ lâng thún-ta̍h, chiū ū hoeh tùi chiú-khut lâu chhut-.lâi, koân tāi-iok nn̄g kong-chhioh, tn̂g chha-put-to ū saⁿ-pah kong-lí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。