啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
13:1 Tùi Hái Lâi ê Béng-siù
Góa koh khòaⁿ tio̍h chi̍t chiah béng-siù tùi hái-.ni̍h khí-.lâi; i ū cha̍p ki kak, chhit-ê thâu, ta̍k ki kak lóng ū tì chi̍t téng ông-koan, thâu-khak téng ū húi-pòng Siōng-tè ê miâ-hō.
13:2 Góa só͘ khòaⁿ-.tio̍h ê hit chiah béng-siù chhin-chhiūⁿ pà; i ê kha chhin-chhiūⁿ hîm ê kha, chhùi chhin-chhiūⁿ sai ê chhùi. Hit bóe liông kā i ê châi-lêng, chō-ūi kah tōa koân-pèng hō͘ hit chiah béng-siù.
13:3 Hit chiah béng-siù ê chi̍t-ê thâu-khak, ná chhin-chhiūⁿ ū siū-kòe tì-miā-siong; i ê tì-miā-siong ū tit tio̍h i hó. Choân-sè-kài ê lâng lóng kám-kak kî-koài, chiū lâi tòe hit chiah béng-siù kiâⁿ.
13:4 Chèng lâng pún-té to̍h teh pài hit bóe liông, in-ūi liông kā koân-pèng kau hō͘ béng-siù, só͘-í, in mā pài béng-siù, kóng, " Siáⁿ lâng ē-tàng kah chit chiah béng-siù sio pí-phēng? Siáⁿ lâng ē-tàng kah i kau-chiàn? "
13:5 Hit chiah béng-siù ū tit tio̍h chi̍t-ê kóng tōa-ōe kah húi-pòng ê chhùi, koh tit tio̍h ín-chún ē-tàng tī sì-cha̍p-jī goe̍h-ji̍t tiong-kan lâi chò chiahê tāichì.
13:6 I chiū khui chhùi kóng-chhut siat-to̍k Siōng-tè ê ōe, lâi siat-to̍k I ê miâ kah I ê hōe-bō͘, í-ki̍p hiahê tiàm tī thiⁿ-téng ê.
13:7 I mā ū tit tio̍h koân-pèng thang kah sìn-tô͘ kau-chiàn, lâi kā in cheng-ho̍k, mā ū tit tio̍h koân-pèng lâi tī-lí ta̍k-ê cho̍k-kûn, ta̍k-ê jîn-bîn, ta̍k chióng gí-giân ê lâng kah ta̍k-ê pang-kok.
13:8 Só͘-ū tòa tī tē-bīn chiūⁿ ê lâng, to̍h-sī chhòng-sè í-lâi in ê miâ bô kì-chài tī siū sat-hāi ê iûⁿ-ko ê oa̍h-miā-chheh ê, lóng ē pài hit chiah béng-siù.
13:9 Ū hīⁿ-khang ê lâng lóng tio̍h thiaⁿ,
13:10 Hiahê chù-tiāⁿ siū lia̍h ê lâng, lóng ē hō͘ lâng lia̍h-.khì; hiahê chù-tiāⁿ siū sat-hāi ê lâng, lóng ē hō͘ to thâi-sí. In-ūi ánne, sìn-tô͘ lóng tio̍h ū nāi-sim kah sìn-sim.
13:11 Tùi Lio̍k-tē Lâi ê Béng-siù
Góa koh khòaⁿ tio̍h lēng-gōa chi̍t chiah béng-siù tùi tē-chiūⁿ khí-.lâi, ū nn̄g ki chhin-chhiūⁿ iûⁿ ê kak, kóng-ōe chhin-chhiūⁿ liông.
13:12 I tī thâu chi̍t-chiah béng-siù ê bīn-chêng, chip-hêng thâu chi̍t-chiah béng-siù ê koân-pèng; i kiò tē kah tòa tī tē-chiūⁿ ê lâng khì pài thâu chi̍t-chiah béng-siù, to̍h-sī hit chiah siū tio̍h tì-miā-siong koh tit tio̍h i hó ê hit chiah béng-siù.
13:13 Chit tē-jī chiah béng-siù koh kiâⁿ tōa kî-chek, tī lâng ê bīn-chêng kiò hóe tùi thiⁿ kàng lo̍h tē-chiūⁿ.
13:14 I koh ēng tit tio̍h ín-chún tī thâu chi̍t-chiah béng-siù bīn-chêng só͘ kiâⁿ ê kî-chek lâi bê-he̍k tòa tī tē-chiūⁿ ê lâng, kiò in tio̍h kā hit chiah tio̍h-siong iáu oa̍h-.leh ê béng-siù chō ngó͘-siōng.
13:15 I koh tit tio̍h ín-chún thang ēng oa̍h-khì pûn ji̍p-khì béng-siù ê ngó͘-siōng, hō͘ béng-siù ê ngó͘-siōng ē kóng-ōe, koh sat-hāi só͘ ū bô pài béng-siù ngó͘-siōng ê lâng.
13:16 I koh kiông-pek chèng lâng, bô-lūn tōa-sè, hó-gia̍h á-.sī sànchhiah, chū-iû ê á-.sī chò lô͘-po̍k ê, lóng tio̍h tī chiàⁿ chhiú á-.sī thâu-hia̍h khàm ìn chò kì-hō.
13:17 Chit-ê kì-hō to̍h-sī béng-siù ê miâ, á-.sī tāi-piáu i ê miâ ê sò͘-jī; nā bô kì-hō, chiū bē tàng chò bé-bē.
13:18 Tī chia su-iàu ū tì-hūi. Chhong-bêng ê lâng ē-tàng sǹg-chhut hit chiah béng-siù ê sò͘-jī, in-ūi hit-ê sò͘-jī tāi-piáu chi̍t-ê lâng. Hitê sò͘-jī to̍h-sī la̍k-pah la̍k-cha̍p-la̍k.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。