約翰一書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 Chin kah Ké ê Lêng
Chhin-ài ê hiaⁿ-tī chí-mōe, m̄ thang siong-sìn só͘-ū ê lêng, tio̍h kā i cha-giām, khòaⁿ i sī m̄-sī tùi Siōng-tè lâi ê, in-ūi ū chin chē ké sian-ti, chhut-hiān tī chit sè-kan.
4:2 Lín ē-tàng ēng ē-bīn ê hong-hoat, lâi hun-pia̍t hit-ê lêng sī m̄-sī Siōng-tè ê Sèng Sîn, kong-khai sêng-jīn I-é-su Ki-tok tō chiâⁿ jio̍k-thé lîm-kàu chit sè-kan ê hit-ê lêng, to̍h-sī tùi Siōng-tè lâi ê Sèng Sîn.
4:3 M̄ kong-khai sêng-jīn chit-hāng tāichì ê, chiū m̄-sī tùi Siōng-tè lâi ê Sèng Sîn, mā sī kah Ki-tok tùi-te̍k ê lêng. Lín ū thiaⁿ tio̍h chit-ê lêng teh beh lâi, kî-si̍t chitmá í-keng lâi tī sè-kan à.
4:4 Sè-kiáⁿ, lín sī sio̍k Siōng-tè, koh í-keng iâⁿ-kòe hiahê ké sian-ti, in-ūi tiàm tī lín lāi-bīn ê Sèng Sîn, pí tiàm tī sè-kan lâng lāi-bīn ê lêng khah ū la̍t.
4:5 Ké sian-ti sī sio̍k sè-kan, kóng sè-kan-sū, só͘-í, sè-kan lâng chiah thiaⁿ in ê ōe.
4:6 Lán sī sio̍k Siōng-tè. Jīn-bat Siōng-tè ê lô͘-po̍k thiaⁿ lán, bô sio̍k Siōng-tè ê lô͘-po̍k m̄-thiaⁿ lán. Án-ne, lán chiū ē-tàng hun-pia̍t chin-lí ê Sèng Sîn kah chhò-gō͘ ê lêng.
4:7 Siōng-tè Sī Thiàⁿ
Chhin-ài ê hiaⁿ-tī chí-mōe, lán tio̍h sio-thiàⁿ, in-ūi thiàⁿ sī tùi Siōng-tè lâi ê. Ū thiàⁿ-sim ê lâng sī Siōng-tè ê kiáⁿ-jî, mā bat Siōng-tè.
4:8 Bô thiàⁿ-sim ê lâng m̄ bat Siōng-tè, in-ūi Siōng-tè sī thiàⁿ.
4:9 Siōng-tè chhe I to̍k-seⁿ ê Kiáⁿ lâi-kàu sè-kan, hō͘ lán tùi I lâi tit tio̍h oa̍h-miā. Siōng-tè ēng ánne tùi lán hián-bêng I ê thiàⁿ tī lán tiong-kan.
4:10 M̄-sī lán thiàⁿ Siōng-tè, sī I ū thiàⁿ lán, chhe I ê Kiáⁿ chò sio̍k-chōe-chè, lâi sio̍k lán ê chōe. Che to̍h-sī Siōng-tè ê thiàⁿ.
4:11 Chhin-ài ê hiaⁿ-tī chí-mōe, Siōng-tè hiahni̍h thiàⁿ lán, lán mā tio̍h sio-thiàⁿ.
4:12 Bô lâng bat khòaⁿ tio̍h Siōng-tè; lán nā sio-thiàⁿ, Siōng-tè chiū tiàm tī lán lāi-bīn, I ê thiàⁿ chiū thong-kòe lán oân-choân si̍t-hiān.
4:13 Siōng-tè í-keng ū kā Sèng Sîn siúⁿ-sù hō͘ lán, ánne lán ē-tàng khak-sìn lán kah Siōng-tè kiat-liân.
4:14 Thiⁿ-pē chhe I ê Kiáⁿ lâi chò sè-kan ê Kiù-chú, goán ū khòaⁿ-.tio̍h, chitmá teh chò kiàn-chèng.
4:15 Sêng-jīn I-é-su sī Siōng-tè ê Kiáⁿ ê lâng, chiū kah Siōng-tè kiat-liân.
4:16 Só͘-í, lán chai koh siong-sìn Siōng-tè thiàⁿ lán. Siōng-tè to̍h-sī thiàⁿ; sèⁿ-miā lāi ū thiàⁿ ê lâng, to̍h-sī oa̍h tī Siōng-tè lāi-bīn, Siōng-tè mā kah i kiat-liân.
4:17 Thiàⁿ chiū ánne tī lán tiong-kan oân-choân si̍t-hiān, hō͘ lán tī sím-phòaⁿ ê ji̍t thang hó-táⁿ bô kiaⁿ-hiâⁿ, in-ūi lán tī chit sè-kan ū kah I-é-su kāng-khoán ê oa̍h-miā.
4:18 Ū thiàⁿ chiū bô kiaⁿ-hiâⁿ; oân-choân ê thiàⁿ kā kiaⁿ-hiâⁿ kóaⁿ chhut-.khì. In-ūi kiaⁿ-hiâⁿ kah hêng-hoa̍t ū koan-liân, ū kiaⁿ-hiâⁿ ê lâng iáu-bōe kā thiàⁿ oân-choân si̍t-hiān chhut-.lâi.
4:19 Lán tio̍h sio-thiàⁿ, in-ūi Siōng-tè tāi-seng thiàⁿ lán.
4:20 Nā ū lâng kóng, " Góa thiàⁿ Siōng-tè", m̄ koh, oàn-hūn i ê hiaⁿ-tī á-.sī chí-mōe, i sī teh kóng pe̍h-chha̍t, in-ūi bô thiàⁿ khòaⁿ ē tio̍h ê hiaⁿ-tī á-.sī chí-mōe ê lâng, ná ē thiàⁿ khòaⁿ bē tio̍h ê Siōng-tè?
4:21 Thiàⁿ Siōng-tè, mā tio̍h thiàⁿ hiaⁿ-tī á-.sī chí-mōe, che sī lán tùi Ki-tok niá-siū ê kài-bēng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。