彼得後書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Chú Chài-lîm ê Èng-ín
Chhin-ài ê hiaⁿ-tī chí-mōe, góa chitmá siá hō͘ lín ê sī tē-jī tiuⁿ phoe. Chit nn̄g tiuⁿ phoe lóng sī beh kā lín thê-chhéⁿ, beh kek-lē lín sûn-kiat ê sim-chì.
3:2 Góa ài lín ē kì-tit sîn-sèng sian-ti ī-giân ê ōe, í-ki̍p Kiù-chú thong-kòe sù-tô͘ thoân hō͘ lín ê bēng-lēng.
3:3 Siōng iàu-kín ê sī lín tio̍h chai, tī boa̍t-ji̍t ū chi̍t-kóa hòng-chhiòng su-io̍k ê lâng ē chhut-hiān lâi kā lín thí-chhiò,
3:4 Kóng, " Chú èng-ín beh chài-lîm, taⁿ tī tó-ūi? Lán ê chó͘-sian lóng sí-.khì à, m̄ koh, tùi chhòng-chō ú-tiū í-lâi, it-chhè bān-mi̍h lóng sī kāng-khoán. "
3:5 Hiahê lâng thiau-kò͘-ì bē kì-tit chit-ê sū-si̍t, to̍h-sī chū chá tùi Siōng-tè ê ōe chhòng-chō thiⁿ, koh tē sī tùi chúi chhut-.lâi, mā ēng chúi lâi hêng-sêng;
3:6 Tong-sî ê sè-kài mā sī hō͘ tōa-chúi siau-bia̍t.
3:7 M̄ koh, hiān-chhú-sî ê thiⁿ kah tē mā sī tùi Siōng-tè ê ōe pó lâu lo̍h-.lâi, it-ti̍t kàu hiahê bô kèng-khiân ê lâng siū sím-phòaⁿ kah hō͘ hóe sio bia̍t ê ji̍t-chí.
3:8 Chhin-ài ê hiaⁿ-tī chí-mōe, ū chi̍t hāng tāichì chhiáⁿ lín m̄ thang bē kì-.tit, to̍h-sī tī Chú ê gán-tiong, chi̍t ji̍t kahná chi̍t chheng nî , chi̍t chheng nî kahná chi̍t ji̍t.
3:9 Ū lâng siūⁿ kóng Chú teh iân-chhiân I ê èng-ín, kî-si̍t sī teh khoan-iông lín; I bô ài ū lâng bia̍t-bông, sī ài ta̍k lâng lóng hóe-kái.
3:10 M̄ koh, Chú chài-lîm ê ji̍t ē chhin-chhiūⁿ chha̍t-á hut-jiân lîm-kàu. Tī hit ji̍t, hiahê thiⁿ ē tī tōa ê hiáng-siaⁿ tiong siau-bia̍t, hiahê thian-thé ē hō͘ hóe sio iûⁿ-khì, tē kah kî-tiong ê bān-mi̍h mā lóng húi-bia̍t khì.
3:11 Bān mi̍h kì-jiân ē ánne siau-bia̍t, lín tio̍h án-chóaⁿ chò lâng? Lín ê seng-oa̍h tio̍h sèng-kiat koh kèng-khiân,
3:12 Lâi thèng-hāu Siōng-tè ê ji̍t kóaⁿ-kín kàu. Tī hit ji̍t, chiahê thiⁿ ē hō͘ hóe siau-bia̍t, thian-thé ē hō͘ hóe sio iûⁿ-khì.
3:13 M̄ koh, lán teh thèng-hāu ê sī Siōng-tè só͘ èng-ín ê sin thiⁿ kah sin tē, tī hia ū éng-oán ê kong-gī.
3:14 Chún-pī Chiap-siū Ki-tok Chài-lîm ê Sím-phòaⁿ
Só͘-í, chhin-ài ê hiaⁿ-tī chí-mōe, lín kì-jiân teh thèng-hāu chiahê tāichì, tio̍h tī Siōng-tè ê bīn-chêng chīn-la̍t tui-kiû sèng-kiat, kòe bô khoat-tiám ê seng-oa̍h, thang kah I hô-hó.
3:15 Tio̍h kā lán ê Chú ê khoan-iông khòaⁿ-chò sī chín-kiù ê ki-hōe, lán chhin-ài ê hiaⁿ-tī Páu-lô ēng Siōng-tè siúⁿ-sù hō͘ i ê tì-hūi, siá phoe hō͘ lín ê sî mā ū ánne kóng.
3:16 I só͘-ū ê phoe lóng ū thê-khí chiahê tāichì. I ê phoe ū chi̍t-kóa oh-tit liáu-kái ê só͘-chāi, hō͘ hiahê bô ha̍k-būn kah bô tēng-sèng ê lâng khiok-kái, chhin-chhiūⁿ in khiok-kái kî-tha ê keng-bûn kāng-khoán, kiat-kó sī in kakī lâi tîm-lûn.
3:17 Kiat-bóe ê Kà-sī
Chhin-ài ê hiaⁿ-tī chí-mōe, ánne, lín kì-jiân tāi-seng chai chiahê tāichì, tio̍h kéng-kài, chiah bián-tit hō͘ hiahê pháiⁿ lâng ēng chhò-gō͘ ê giân-lūn chhōa lín kiâⁿ-ji̍p-khì bê-lō͘, lâi sit-lo̍h lín kian-kò͘ ê sìn-gióng.
3:18 Tio̍h óa-khò lán ê kiù Chú I-é-su Ki-tok ê un-tián, lâi hō͘ lán tùi I ê jīn-bat kè-sio̍k chìn-pō͘. Goān êng-kng kui hō͘ I, tùi chitmá ti̍t-kàu éng-oán! A-men!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。