彼得後書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
2:1 Ké Kàu-su ê Chin Bīn-māu
Í-chêng ū ké sian-ti tī bîn-kan chhut-hiān, chitmá kāng-khoán mā ū ké kàu-su tī lín ê tiong-kan chhut-hiān. In àm-tiong ín-chìn húi-bia̍t-sèng ê īⁿ-toan ji̍p-.lâi, sīm-chì m̄ sêng-jīn kā in sio̍k-hôe ê Chú-cháiⁿ, tì-sú kakī chin kín chiū bia̍t-bông.
2:2 M̄ koh, iáu-sī ū chin chē lâng o̍h in ê îm-loān seng-oa̍h, chin-lí ê tō-lō͘ soah ūi tio̍h in lâi siū húi-pòng.
2:3 Chiahê ké kàu-su in-ūi tham-sim, ē liap-chō kò͘-sū lâi pián lín ê chîⁿ-châi. Siōng-tè tùi in ê sím-phòaⁿ chá to̍h koat-tēng ā, in liâmpiⁿ to̍h ē bia̍t-bông.
2:4 Siōng-tè pēng bô iông-ín hoān chōe ê thiⁿ-sài, só͘-í kā in hiat lo̍h-khì im-hú, kā in koaiⁿ tī o͘-àm ê chhim kheⁿ, tī hia thèng-hāu sím-phòaⁿ.
2:5 Siōng-tè mā bô iông-ín kó͘-chá ê sè-kài, só͘-í ēng tōa-chúi im-bia̍t hiahê bô kèng-ùi Siōng-tè ê sè-kan lâng, kantaⁿ chín-kiù soan-iông kong-gī ê Nó͘-ah hit peh lâng.
2:6 Siōng-tè chhú-hoa̍t So͘-tóm kah Am-mo͘-la̍h ê siâⁿ-chhī, ēng hóe kā in húi-bia̍t, hō͘ āu-lâi bô kèng-ùi Siōng-tè ê lô͘-po̍k chò kéng-kài.
2:7 Siōng-tè ū chín-kiù gī lâng Ló-toh, in-ūi i tiāⁿtiāⁿ ūi tio̍h siâ-ok îm-loān ê lâng lâi chhim-chhim iu-būn.
2:8 Chit-ê gī lâng Ló-toh tòa tī in tiong-kan, ta̍k ji̍t khòaⁿ tio̍h mā thiaⁿ tio̍h hiahê siâ-ok ê tāichì, sim-lāi hui-siông thòng-khó͘.
2:9 Siōng-tè chai tio̍h cháiⁿ-iūⁿ chín-kiù kèng-khiân ê lâng thoat-lī chhì-liān, mā chai kā put-gī ê lâng lâu kàu sím-phòaⁿ ê ji̍t khì siū hêng-hoa̍t,
2:10 Te̍k-pia̍t sī hiahê hòng-chhiòng jio̍k-thé chêng-io̍k koh biáu-sī Siōng-tè koân-ui ê lâng. Ké Kàu-su ê Siâ-ok Kak-sek
Chiahê ké kàu-su tōa táⁿ koh kiau-ngō͘, sīm-chì siat-to̍k chun-kùi ê thiⁿ-sài.
2:11 Sûi-jiân thiⁿ-sài ê khùi-la̍t kah koân-lêng pí hiahê ké kàu-su khah tōa, i mā bô tī Siōng-tè ê bīn-chêng ēng húi-pòng ê ē kā in khòng-kò.
2:12 M̄ koh, chiahê lâng chhin-chhiūⁿ bô lêng-sèng ê tōng-bu̍t, seng-sêng tio̍h hō͘ lâng lia̍h-khì thâi. In húi-pòng kakī m̄-chai ê tāichì. In ē kah tōng-bu̍t kāng-khoán siū húi-bia̍t, siū tio̍h kakī put gī-hêng ūi ê pò-èng.
2:13 Tùi in lâi kóng, hióng-lo̍k to̍h-sī tī ji̍t-sî chiū tîm-lûn tī chêng-io̍k ê boán-chiok lâi hoaⁿ-hí. Kah lín chò-hóe chia̍h-toh ê sî, in m̄-chai thang kiàn-siàu koh bô kò͘ thé-biān, hòng-chhiòng iàn-lo̍k.
2:14 In ê ba̍k-chiu kantaⁿ ài khòaⁿ siâ-îm; in hoān chōe bô soah; in bê-he̍k sim bô kian-kò͘ ê lâng; in ê sim koàn-sì tham-châi, eng-kai tio̍h siū Siōng-tè ê chiù-chó͘.
2:15 In lī-khui chiàⁿ lō͘ lâi kiâⁿ bê-lō͘, kiâⁿ Boh-ol ê kiáⁿ Pa-lân só͘ kiâⁿ ê lō͘. Pa-lân tham-ài put-gī ê chîⁿ-châi,
2:16 M̄ koh, ūi tio̍h kakī ê hoān-hoat lâi siū chek-pī; chi̍t chiah bē kóng-ōe ê lî-á, kèng-jiân ēng lâng ê siaⁿ lâi chó͘-chí sian-ti Pa-lân ê lāmsám.
2:17 Chiahê lâng chhin-chhiūⁿ bô chúi ê chôaⁿ, chhin-chhiūⁿ hō͘ kông hong sàu-kòe ê hûn-bū. Siōng-tè í-keng tī o͘-àm ê chhim-ian kā in lâu chi̍t-ê só͘-chāi teh thèng-hāu in.
2:18 In kóng khoa-kháu ê gōng ōe, ēng jio̍k-thé ê chêng-io̍k kah siâ-îm lâi iú-he̍k hiahê tútú thoat-lī sit-bê seng-oa̍h ê lâng.
2:19 In èng-ín hō͘ lâng chū-iû, m̄ koh, kakī chò hú-pāi seng-oa̍h ê lô͘-lē, in-ūi lâng nā siū siáⁿ-mi̍h khòng-chè, chiū ē chò hit-hāng ê lô͘-lē.
2:20 Lâng jīn-bat kiù Chú I-é-su Ki-tok, lâi thoat-lī sè-kan hiahê ù-òe í-āu, nā koh-chài hō͘ hiahê hú-pāi ê sè-le̍k tîⁿ-sin, koh-chài siū ap-chè, chit khoán lâng ê kiat-kio̍k ē pí í-chêng koh khah chhám.
2:21 In kì-jiân jīn-bat kong-gī ê tō-lō͘, kèng-jiân koh lâi ûi-pōe só͘ thoân hō͘ in ê sîn-sèng kài-bēng, ánne lêng-khó tùi khí-thâu to̍h lóng m̄ bat khah hó.
2:22 Hit khoán lâng ê chêng-hêng tú chhin-chhiūⁿ sio̍k-gí só͘ kóng, " Káu-á tò tńg-khì chia̍h kakī só͘-thò͘ ê mi̍h, ti-á sé chheng-khì sûi-sî koh khì nòa tī thô͘-môe ê tiong-ng. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。