彼得後書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 Góa — Sí-mòng Piat-tò͘, sī I-é-su Ki-tok ê sù-tô͘ kah lô͘-po̍k, siá chit tiuⁿ phoe kià hō͘ hiahê óa-khò lán ê Siōng-tè kah kiù Chú I-é-su Ki-tok ê gī kah goán chò-hóe hun-hióng kāng-khoán pó-pòe sìn-gióng ê lâng.
1:2 In-ūi lín ū jīn-bat Siōng-tè kah lán ê Chú I-é-su, goān lín tit tio̍h hong-hong hù-hù ê un-tián kah pêng-an!
1:3 Siōng-tè ê Ho͘-tiàu kah Kéng-soán
Siōng-tè ê koân-lêng í-keng kā lán kòe kèng-khiân seng-oa̍h só͘ su-iàu ê it-chhè siúⁿ-sù hō͘ lán; chit-ê un-sù sī thong-kòe chin-chiàⁿ jīn-bat hit ūi ho͘-tiàu lán lâi hun-hióng I kakī ê êng-kng kah liông-siān ê Siōng-tè chiah tit tio̍h ê.
1:4 Siōng-tè í-keng kā I èng-ín ê pó-pòe kah ke̍k tōa ê un-tián siúⁿ-sù hō͘ lán, hō͘ lín thong-kòe chiahê èng-ín thang thoat-lī sè-kan ê chêng-io̍k só͘ chō-sêng ê pāi-hoāi, lâi hun-hióng Siōng-tè ê sîn-sèng.
1:5 Ūi tio̍h ánne, lín tio̍h chīn-la̍t phah-piàⁿ, ēng tek-hēng lâi ke-thiⁿ lín ê sìn-sim; ēng tì-sek lâi ke-thiⁿ lín ê tek-hēng;
1:6 Ēng chún-chat lâi ke-thiⁿ tì-sek; ēng jím-nāi lâi ke-thiⁿ chún-chat; ēng kèng-khiân lâi ke-thiⁿ jím-nāi;
1:7 Ēng chhiú-chiok-chi-chêng lâi ke-thiⁿ kèng-khiân; ēng thiàⁿ-sim lâi ke-thiⁿ chhiú-chiok-chi-chêng.
1:8 Lín nā lóng ū chiahê tek-hēng koh ná chhiong-si̍t, chiū ē hō͘ lín koh khah chek-ke̍k, koh khah ū hāu-lêng lâi jīn-bat lán ê Chú I-é-su Ki-tok.
1:9 Nā bô chiahê tek-hēng ê lâng, to̍h-sī kīn-sī á-.sī chheⁿmê, bē kì-tit in í-chêng ê chōe í-keng siū sé chheng-khì.
1:10 Hiaⁿ-tī chí-mōe, só͘-í, lín tio̍h koh khah phah-piàⁿ, lâi chèng-bêng Siōng-tè tùi lín ê ho͘-tiàu kah kéng-soán sī khak-si̍t ê; lín nā ánne chò, chiū éng-oán bē tūi-lo̍h.
1:11 Án-ne, Siōng-tè chiū ē tōa-tōa sù-hok, hō͘ lín thang chìn-ji̍p lán ê kiù Chú I-é-su Ki-tok éng-oán ê kok-tō͘.
1:12 Lín sûi-jiân í-keng chai chiahê tāichì, koh kian-tēng chip-siú lín só͘ niá-siū ê chin-lí, góa iáu koh tio̍h tiāⁿtiāⁿ kā lín thê-chhéⁿ.
1:13 Góa siūⁿ, tī góa iáu oa̍h-.leh ê sî, góa eng-kai tio̍h tiāⁿtiāⁿ kā lín thê-chhéⁿ.
1:14 Chiàu lán ê Chú I-é-su Ki-tok kā góa chí-sī ê, góa kakī chai góa lī-khui sè-kan ê ji̍t-chí í-keng teh beh kàu.
1:15 Góa mā beh chīn-la̍t siūⁿ pān-hoat hō͘ lín tī góa kòe-sin liáu-āu, iáu put-sî ē kì-tit chiahê tāichì.
1:16 Ki-tok Êng-kng ê Kiàn-Chèng-jîn
Goán tùi lín kóng koan-hē lán ê Chú I-é-su Ki-tok ê tōa koân-lêng kah chài-lîm, m̄-sī kin-kì kî-khiáu hi-ké ê thoân-soat, sī goán ū chhin-ba̍k khòaⁿ tio̍h I ê tōa ui-giâm.
1:17 I tùi Thiⁿ-pē Siōng-tè tit tio̍h chun-kùi kah êng-kng ê sî, hit ūi chì-chun koh êng-kng ê Siōng-tè ū chhut siaⁿ tùi I kóng, " Chit-ê sī góa só͘ thiàⁿ ê Kiáⁿ, I sī góa chin-chiàⁿ kah-ì ê. "
1:18 Goán kah I tī sèng-soaⁿ ê sî, ū chhin-sin thiaⁿ tio̍h chit-ê siaⁿ tùi thiⁿ-téng hoat chhut-.lâi.
1:19 Só͘-í, goán tùi sian-ti só͘ soan-pò͘ ê sìn-sit koh khah khak-sìn. Lín tio̍h chù-ì thiaⁿ, in-ūi chit-ê sìn-sit chhin-chhiūⁿ teng-hóe chiò tī o͘-àm, chiàu kàu thiⁿ-kng, it-ti̍t kàu khé-bêng-chheⁿ chhut-hiān tī lín ê sim hit sî.
1:20 Siōng iàu-kín ê sī lín tio̍h chai, m̄ thang sûi-piān chiàu kakī ê ì-sù lâi kái-soeh keng-tián tiong sian-ti só͘ kóng ê ōe.
1:21 In-ūi sian-ti ê ōe m̄-sī tùi lâng ê ì-sù kóng-chhut, sī lâng hō͘ Sèng Sîn kám-tōng lâi kóng-chhut Siōng-tè ê ōe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。