彼得前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 Kái-piàn ê Sin Seng-oa̍h
Ki-tok kì-jiân tī jio̍k-thé siū khó͘, lín mā tio̍h ēng chit khoán ê sim-chì lâi chong-pī kakī; in-ūi jio̍k-thé siū khó͘ to̍h-sī kah chōe-ok toān-choa̍t koan-hē.
4:2 Án-ne, lín iáu tī sè-kan ê ji̍t-chí, chiū bô koh chiàu lâng ê chêng-io̍k, sī chiàu Siōng-tè ê chí-ì lâi seng-oa̍h.
4:3 Lín í-chêng chiàu bī-sìn-chiá só͘ ài-chò ê, teh lōng-hùi sî-kan tī îm-loān, sek-io̍k, chiú-chùi, hòng-chhiòng, iàn-lo̍k kah hiahê khó-ò͘ⁿ ê ngó͘-siōng chông-pài, í-keng kàu-gia̍h à.
4:4 Taⁿ in khòaⁿ tio̍h lín bô koh kah in kāng-khoán kòe hòng-tōng bô chiat-chè ê seng-oa̍h, in chiū kám-kak kî-koài, soah kā lín húi-pòng.
4:5 In tio̍h kah hit ūi teh beh sím-phòaⁿ oa̍h-lâng, í-ki̍p sí-lâng ê Siōng-tè sǹg-siàu.
4:6 In-ūi hok-im mā bat thoân hō͘ sí-lâng, sī beh hō͘ in tī jio̍k-thé siōng chiàu lâng ê khoán-sit siū sím-phòaⁿ, in ê lêng-hûn ē-tàng chiàu Siōng-tè ê khoán-sit lâi oa̍h.
4:7 Chò Siōng-tè Un-sù ê Hó Koán-ke
Bān sū ê kiat-kio̍k teh beh kàu à. Só͘-í, lín tio̍h kín-sīn siú-kí, kéng-séng lâi kî-tó.
4:8 Siōng iàu-kín ê sī tio̍h sêng-khún sio-thiàⁿ, in-ūi thiàⁿ ē-tàng siau-tû chin chē chōe-kò.
4:9 Lín tio̍h hō͘-siong hó khoán-thāi, m̄ thang bâi-oàn.
4:10 Ta̍k lâng tio̍h chiàu só͘ niá-siū ê un-sù hō͘-siong ho̍k-sāi, lâi chò Siōng-tè kok chióng un-sù ê hó koán-ke.
4:11 Káng tō-lí ê lâng tio̍h soan-káng Siōng-tè ê sìn-sit, ho̍k-sāi ê lâng tio̍h ēng Siōng-tè só͘ siúⁿ-sù ê khùi-la̍t lâi ho̍k-sāi, hō͘ Siōng-tè thong-kòe I-é-su Ki-tok, tī bān sū tit tio̍h êng-kng. Goān êng-kng kah koân-lêng lóng kui tī Siōng-tè, tāi-tāi bô soah. A-men!
4:12 Chò Ki-tok-tô͘ Tio̍h Jím-siū Khó͘-lān
Chhin-ài ê hiaⁿ-tī chí-mōe, lín tú tio̍h kahná hóe ê chhì-liān ê sî, m̄ thang ná-chún sī tú tio̍h kî-koài ê tāichì,
4:13 Hoán-tńg tio̍h in-ūi ū hūn tī Ki-tok ê kan-khó͘ lâi hoaⁿ-hí, hō͘ lín tī I êng-kng hián-hiān ê sî, mā thang hoaⁿ-hí khoài-lo̍k.
4:14 Lín nā ūi tio̍h Ki-tok ê miâ hō͘ lâng bú-jio̍k, lín chiū chin ū hok-khì, in-ūi ū Siōng-tè ê Sèng Sîn tiàm tī lín sin chiūⁿ.
4:15 Lín tiong-kan m̄ thang ū lâng ūi tio̍h thâi lâng, chò-chha̍t, chò pháiⁿ, á-.sī in-ūi chhap pa̍t lâng ê tāichì lâi siū khó͘.
4:16 Nā ūi tio̍h chò Ki-tok-tô͘ lâi siū khó͘, m̄-bián kám-kak kiàn-siàu, hoán-tńg tio̍h in-ūi ū chit-ê miâ lâi kui êng-kng hō͘ Siōng-tè.
4:17 Sím-phòaⁿ ê sî kàu à, Siōng-tè kakī ê chú-bîn ē tāi-seng siū sím-phòaⁿ. Nā-sī sím-phòaⁿ tùi lán khai-sí, ánne hiahê m̄-sìn Siōng-tè hok-im ê lâng kiat-kio̍k ē án-chóaⁿ?
4:18 Ū kì-chài kóng, nā-sī gī lâng bô iông-ī tit-kiù, ánne bô kèng-khiân ê lâng kah chōe-jîn ē án-chóaⁿ? ( Chù:ChG 11:31)
4:19 Só͘-í, hiahê chiàu Siōng-tè ê chí-ì siū khó͘ ê lâng, tio̍h ēng hó phín-hēng, kā in ê lêng-hûn kau-thok hō͘ sìn-si̍t ê Chō-bu̍t-chú.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。