彼得前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 Chhéng-an
Góa — Piat-tò͘, sī I-é-su Ki-tok ê sù-tô͘, siá chit tiuⁿ phoe kià hō͘ sì-sòaⁿ pī-lān, tī Pong-to͘, Ga-la̍h-tia, Ge-bah-to-kiah, A-si-a kah Pí-chhui-nî teh khiā-khí ê Siōng-tè soán-bîn.
1:2 Lín siū kéng-soán, sī chiàu Thiⁿ-pē Siōng-tè ī-tēng ê chí-ì, koh óa-khò Sèng Sîn lâi chiâⁿ chò sèng-kiat, thang sūn-ho̍k I-é-su Ki-tok, koh tùi I ê hoeh tit tio̍h kiat-chēng. Goān Siōng-tè ê un-tián kah pêng-an chhiong-móa lín tāi-ke!
1:3 Sin Oa̍h-miā ê Ǹg-bāng
Goān lán ê Chú I-é-su Ki-tok ê Thiⁿ-pē Siōng-tè, tit tio̍h oló! Chiàu I bô hān ê chû-pi, thong-kòe I-é-su Ki-tok tùi sí-lâng tiong koh-oa̍h, I hō͘ lán têng-thâu-seⁿ, thang tit tio̍h sin oa̍h-miā ê ǹg-bāng,
1:4 Lâi sêng-siū hit-ê ūi tio̍h lán pó-chûn tī thiⁿ-téng, bē pāi-hoāi, bē lahsap, koh bē soe-thè ê hok-khì.
1:5 Che sī beh hō͘ lín chiahê thong-kòe sìn lâi siū Siōng-tè tōa koân-lêng pó-siú ê lâng, thang tī boa̍t-ji̍t tit tio̍h hit-ê í-keng chún-pī hó-sè, teh beh si̍t-hiān ê chín-kiù.
1:6 Lín chitmá sûi-jiân iáu teh siū chióng-chióng ê chhì-liān, chiām-sî sim kan-khó͘, mā tio̍h in-ūi ánne lâi hoaⁿ-hí.
1:7 Chiahê chhì-liān sī beh chèng-bêng lín ê sìn-sim ē kham-tit khó-giām, pí hiahê keng-kòe hóe toàn-liān, iû-goân ē pāi-hoāi ê kim koh khah pó-kùi, hō͘ lín thang tī I-é-su Ki-tok chài-lîm ê sî, tit tio̍h oló, êng-kng kah chun-kùi.
1:8 Lín sûi-jiân m̄ bat khòaⁿ-kòe I-é-su, mā teh thiàⁿ I; chitmá sûi-jiân bô khòaⁿ-kìⁿ I, mā iáu koh teh sìn I. Lín ū ēng giân-gí bô hoat-tō͘ piáu-ta̍t ê hí-lo̍k,
1:9 In-ūi lín tit tio̍h sìn-gióng ê kiat-kó, to̍h-sī lêng-hûn ê tit-kiù.
1:10 Koan-hē chit-ê chín-kiù, hiahê ī-giân lín ē tit tio̍h un-tián ê sian-ti í-keng ū gián-kiù koh ū siông-sè chhâ-khó.
1:11 Chèng sian-ti ê sim-lāi ū Ki-tok ê Sèng Sîn tùi in chí-sī, lâi chhâ-khó Ki-tok ê siū khó͘ kah āu-lâi tit tio̍h êng-kng ê ī-giân, ē tī tang-sî-kî, ē án-chóaⁿ si̍t-hiān.
1:12 Siōng-tè ū khé-sī hiahê sian-ti, hō͘ in chai in ê ho̍k-sāi m̄-sī ūi tio̍h kakī, sī ūi tio̍h lín. Chiahê sìn-sit chitmá í-keng óa-khò tùi thiⁿ chhe lâi ê Sèng Sîn, thong-kòe hok-im ê sù-chiá thoân hō͘ lín; chiahê tāichì liân thiⁿ-sài mā pek-chhiat teh thèng-hāu ài beh chai.
1:13 Sèng-kiat ê Seng-oa̍h
Só͘-í, lín ê sim tio̍h chún-pī piān, tio̍h kín-sīn, choan-sim ǹg-bāng tī I-é-su Ki-tok chài-lîm ê sî, só͘ beh siúⁿ-sù hō͘ lín ê un-tián.
1:14 Tio̍h chò sūn-ho̍k ê kiáⁿ-jî, m̄ thang chhin-chhiūⁿ chá-chêng lín m̄ bat Siōng-tè ê sî teh hòng-chhiòng su-io̍k.
1:15 Ho͘-tiàu lín ê sī sèng-kiat ê Siōng-tè; lín pún-sin mā tio̍h tī it-chhè ê hêng-ûi sèng-kiat.
1:16 Keng-tián ū kì-chài, Lín tio̍h sèng-kiat, in-ūi góa sī sèng-kiat. (chù, LBK 19:2)
1:17 Lín kî-tó ê sî, kiò hit ūi bô phian-sim koh chiàu ta̍k lâng ê hêng-ûi lâi sím-phòaⁿ ê chò Thiⁿ-pē, lín tio̍h ēng kèng-ùi ê sim, tī lín kià-kha ê sè-kan seng-oa̍h.
1:18 In-ūi lín chai, lín siū sio̍k-hôe, thoat-lī chó͘ thoân bô lō͘-ēng ê thoân-thóng, m̄-sī ēng ē pāi-hoāi ê kim-gîn,
1:19 Sī ēng Ki-tok ê pó-hoeh, chhin-chhiūⁿ bô khoat-tiám koh bô ù-tiám ê iûⁿ-ko ê hoeh.
1:20 Ki-tok tī chhòng-chō ú-tiū í-chêng to̍h hō͘ Siōng-tè kéng-soán, tī chit-ê boa̍t-sè chiah ūi tio̍h lín hián-hiān chhut-.lâi.
1:21 Lín thong-kòe Ki-tok lâi sìn Siōng-tè, to̍h-sī hit ūi hō͘ Ki-tok tùi sí-lâng tiong koh-oa̍h, koh hō͘ I êng-kng ê, só͘-í, lín ê sìn-sim kah ǹg-bāng lóng chāi tī Siōng-tè.
1:22 Lín í-keng tùi sūn-ho̍k chin-lí lâi kiat-chēng kakī, koh kah kî-tha ê sìn-tô͘ ū sûn chin ê chhiú-chiok-chi-chêng, lín tio̍h tùi sim-té jia̍t-chhiat sio-thiàⁿ.
1:23 Lín í-keng têng-thâu-seⁿ, m̄-sī tùi ē pāi-hoāi ê chéng-chí, sī tùi bē pāi-hoāi ê chéng-chí, to̍h-sī thong-kòe Siōng-tè oa̍h-oa̍h koh éng-oán chûn-chāi ê chin-lí.
1:24 In-ūi ū kì-chài, jio̍k-thé lóng chhin-chhiūⁿ chháu, in ê êng-kng lóng chhin-chhiūⁿ iá-hoe; chháu ē ta, hoe ē siā.
1:25 Chóng-.sī, Chú ê tō-lí éng-oán chûn-chāi. (chù, ISI 40:6-8) Chit-ê sìn-sit to̍h-sī thoân hō͘ lín ê hok-im.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。