雅各書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
5:1 Kéng-kò Hó-gia̍h Lâng
Taⁿ lín chiahê hó-gia̍h lâng tio̍h chù-ì thiaⁿ, lín ê chai-lān teh beh kàu à, lín tio̍h pi-siong thî-khàu!
5:2 Lín ê chîⁿ-châi í-keng pāi-hoāi, lín ê saⁿ-khò͘ mā hō͘ chiù-thâng chiù phòa-khì.
5:3 Lín ê kim-gîn siⁿ-sian, hiahê sian ē chiâⁿ-chò kā lín kong-kek ê chèng-kì, beh chhin-chhiūⁿ hóe sio-bia̍t lín ê seng-khu. Lín tī chit-ê boa̍t-sè kantaⁿ chai-iáⁿ chek-chū châi-pó.
5:4 Lín khek-khui hiahê tī lín ê chhân-hn̂g teh siu-koah ê lâng, bô hō͘ in kang-chîⁿ. In chhut siaⁿ teh kā lín khòng-kò! Βān-kun ê Chú í-keng ū thiaⁿ tio̍h chiahê ai-oàn ê siaⁿ.
5:5 Lín tī tē-chiūⁿ hióng-siū chhia-hoa iàn-lo̍k, kā kakī chhī kah pûi chut-chut, teh thèng-hāu siū tô͘-sat ê ji̍t-chí.
5:6 Lín kā hiahê gī lâng tēng chōe, koh kā in thâi-sí, in mā bô kā lín tí-khòng.
5:7 Jím-nāi kah Kî-tó
Hiaⁿ-tī chí-mōe, só͘-í, lín tio̍h kè-sio̍k jím-nāi kàu Chú ê chài-lîm. Lín khòaⁿ, choh-sit lâng án-chóaⁿ teh thèng-hāu chhân-.ni̍h pó-pòe ê siu-sêng, án-chóaⁿ nāi-sim teh thèng-hāu chhiu-lîm chhun-hō͘.
5:8 Lín mā tio̍h kè-sio̍k jím-nāi, kian-kò͘ lín ê sìn-sim, in-ūi Chú chài-lîm ê ji̍t-chí teh beh kàu à.
5:9 Hiaⁿ-tī chí-mōe, m̄ thang hō͘-siong oàn-tò͘, chiah bián siū Siōng-tè sím-phòaⁿ; lín khòaⁿ, sím-phòaⁿ chiá í-keng khiā tī mn̂g-kháu à.
5:10 Hiaⁿ-tī chí-mōe, lín tio̍h ēng hiahê hōng Chú ê miâ lâi kóng-ōe ê sian-ti chò lín jím-siū khó͘-lān ê bô͘-iūⁿ.
5:11 Lán kā hiahê jím-nāi kàu-té ê lâng khòaⁿ-chò ū hok-khì. Lín bat thiaⁿ-kòe Io-buh ê jím-nāi, mā chai Chú kàu bóe án-chóaⁿ kā i chiàu-kò͘, in-ūi Chú ū móa-pak ê chû-pi kah liân-bín.
5:12 Kiat-bóe ê Kà-sī
Góa ê hiaⁿ-tī chí-mōe, siōng iàu-kín ê sī, M̄-thang kí thiⁿ á-.sī tē á-.sī siáⁿ-mi̍h mi̍h-kiāⁿ lâi chiùchōa. " Sī " To̍h kóng " Sī ", " M̄-sī " To̍h kóng " M̄-sī ", ánne chiah bián siū Siōng-tè sím-phòaⁿ.
5:13 Lín tiong-kan ū lâng siū khó͘ bô? Nā ū, i tio̍h kî-tó; lín tiong-kan ū lâng hoaⁿ-hí bô? Nā ū, i tio̍h gîm oló ê si-koa.
5:14 Lín tiong-kan ū lâng phòa-pēⁿ bô? Nā ū, i tio̍h chhiáⁿ kàu-hōe ê tiúⁿ-ló lâi thè i kî-tó, hōng Chú ê miâ kā i boah iû.
5:15 Ū sìn-sim ê kî-tó ē kiù phòa-pēⁿ ê lâng, Chú ē hō͘ i khiā khí-.lâi; i nā ū chōe, mā ē tit tio̍h sià-bián.
5:16 Lín tio̍h hō͘-siong jīn chōe, sio-thè kî-tó, thang tit tio̍h i hó. Gī lâng ê kî-tó ū chin tōa ê kong-hāu.
5:17 E-li-iah kah lán pêⁿ-pêⁿ sī lâng. I pek-chhiat kî-tó, khún-kiû Siōng-tè m̄ thang lo̍h hō͘, kó-jiân tē-chiūⁿ ū saⁿ nî pòaⁿ bô lo̍h hō͘.
5:18 I koh kî-tó, thiⁿ kó-jiân lo̍h tōa hō͘, tē chiū chhut-sán ngó͘-kok.
5:19 Chhin-ài ê hiaⁿ-tī chí-mōe, lín tiong-kan nā ū lâng phian-lī chin-lí, tio̍h ū lâng koh kā i chhōa tò tńg-.lâi.
5:20 Lín tio̍h chai, hō͘ chi̍t-ê sit-bê ê lâng tò tńg-.lâi ê lâng, ē kiù hit-ê chōe-jîn ê lêng-hûn thoat-lī sí-bông, koh hō͘ chin chē chōe tit tio̍h sià-bián.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。