雅各書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 Sè-kan kah Siōng-tè ê Chhiong-tu̍t
Lín tiong-kan ê tàu-cheng kah oan-ke sī tùi tó-ūi lâi? Kám m̄-sī tùi lín ki-thé tiong-kan put-sî teh tàu-cheng kah oan-ke ê io̍k-bōng lâi ê?
4:2 Lín siàu-siūⁿ ê mi̍h-kiāⁿ tit bē tio̍h, chiū beh thâi-sí-lâng; lín tham-châi tit bē tio̍h, chiū tàu-cheng oan-ke. Kî-si̍t, lín tit bē tio̍h só͘ ài ê mi̍h-kiāⁿ, sī in-ūi lín bô tùi Siōng-tè kiû.
4:3 Lín sûi-jiân ū kiû, m̄ koh tit bē tio̍h, sī in-ūi lín kiû ê tōng-ki bô hó, sī kantaⁿ teh kiû boán-chiok kakī ê hióng-lo̍k.
4:4 Lín chiahê îm-loān ê lâng, lín kám m̄-chai kah sè-kan chò pêng-iú to̍h-sī kah Siōng-tè chò tùi-te̍k? Só͘-í, ài beh chò sè-kan ê pêng-iú ê lâng, to̍h-sī Siōng-tè ê te̍k-jîn.
4:5 Keng-tián kóng, Siōng-tè ài I siúⁿ-sù hō͘ lán ê Sèng Sîn, ài kah khí chi̍t-tò͘. Lín kám siūⁿ kóng chit kù ōe bô ì-sù?
4:6 M̄ koh, Siōng-tè siúⁿ-sù hō͘ lán ê un-tián koh khah tōa, in-ūi keng-tián ū kì-chài, Siōng-tè kah kiau-ngō͘ ê lâng tùi-te̍k, siúⁿ-sù un-tián hō͘ khiam-pi ê lâng. (chù, ChG 3:34)
4:7 Só͘-í, lín tio̍h sūn-ho̍k Siōng-tè, hoán-khòng Mô͘-kúi, Mô͘-kúi chiū ē siám-phiah lín.
4:8 Lâi chhin-kīn Siōng-tè, Siōng-tè chiū ē chhin-kīn lín. Chōe-jîn, lín tio̍h sé lín ê chhiú; sam-sim lióng-ì ê lâng, tio̍h kiat-chēng lín ê sim.
4:9 Tio̍h pi-siong, thî-khàu lâu ba̍k-sái, kā lín ê chhiò-bīn piàn-chò ai-siong, hoaⁿ-hí piàn-chò iu-chhiû.
4:10 Tio̍h tī Chú ê bīn-chêng khiam-pi, I chiū ē kā lín ko-seng.
4:11 M̄-thang Phoe-phêng Hiaⁿ-tī Chí-mōe
Hiaⁿ-tī chí-mōe, lín m̄ thang hō͘-siong kóng pháiⁿ ōe; kóng hiaⁿ-tī chí-mōe ê pháiⁿ ōe á-.sī phoe-phêng hiaⁿ-tī chí-mōe ê lâng, to̍h-sī teh kóng lu̍t-hoat ê pháiⁿ ōe, teh phoe-phêng lu̍t-hoat. Lí nā phoe-phêng lu̍t-hoat, chiū m̄-sī siú lu̍t-hoat ê lâng, sī teh phoe-phêng lu̍t-hoat.
4:12 Lu̍t-hoat ê chè-tēng-chiá kah sím-phòaⁿ chiá chí ū chi̍t ūi, I ē chín-kiù mā ē húi-bia̍t. Lí sī siáⁿ lâng, ná káⁿ phoe-phêng lí ê chhù-piⁿ?
4:13 M̄-thang Khoa-kháu
Ū lâng ánne kóng, " Kin-á-ji̍t á-.sī bîn-á-chài, goán beh khì bó͘ chi̍t-ê siâⁿ, tī hia tòa chi̍t nî, chò senglí thàn chîⁿ. " Taⁿ lín tio̍h thiaⁿ góa kóng,
4:14 Lín liân bîn-á-chài sèⁿ-miā ē piàn án-chóaⁿ to m̄-chai. Lín kahná hûn-bū, chhut-hiān chi̍t-sî-á, liâmpiⁿ chiū siau-sit-.khì.
4:15 Lín eng-kai tio̍h ánne kóng, " Chú nā goān-ì, goán chiū ē oa̍h, mā ē-tàng chò chit-hāng, chò hit-hāng. "
4:16 Lín chitmá teh phòng-hong khoa-kháu; chit khoán ê khoa-kháu lóng sī siâ-ok.
4:17 Só͘-í, lâng chai-iáⁿ tio̍h chò hó sū, nā m̄ khì chò, to̍h-sī hoān chōe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。