雅各書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 Chhéng-an
Góa — Iâ-kop, sī Siōng-tè kah Chú I-é-su Ki-tok ê lô͘-po̍k, beh kā só͘-ū sì-sòaⁿ tī ta̍k só͘-chāi ê Siōng-tè ê chú-bîn chhéng-an.
1:2 Sìn-gióng kah Tì-hūi
Hiaⁿ-tī chí-mōe, lín tú tio̍h chióng-chióng ê chhì-thàm ê sî, lóng tio̍h kā i siūⁿ-chò sī thang hoaⁿ-hí ê tāichì,
1:3 In-ūi góa chai, lín ê sìn-gióng keng-kòe khó-giām ē sán-seng jím-nāi.
1:4 Tio̍h jím-nāi kàu-té, chiah ē-tàng hō͘ lín ta̍t-kàu si̍p-choân si̍p-bí, bô siáⁿ-mi̍h khiàm-khoeh.
1:5 Lín tiong-kan nā ū lâng khiàm-khoeh tì-hūi, tio̍h tùi Siōng-tè kî-kiû, in-ūi Siōng-tè chin khóng-khài koh chû-pi teh siúⁿ-sù chèng lâng.
1:6 To̍k-to̍k lín tio̍h khò sìn-sim lâi kiû, m̄ thang giâu-gî; in-ūi giâu-gî ê lâng, ná chhin-chhiūⁿ hái-éng hō͘ hong sàu kah khí-khí lo̍h-lo̍h.
1:7 Chit khoán lâng bián siūⁿ kóng tùi Chú ū thang tit tio̍h siáⁿ-mi̍h,
1:8 In-ūi sam-sim lióng-ì ê lâng, bô-lūn chò siáⁿ-mi̍h lóng bô tēng-sèng.
1:9 Sàn-chhiah kah Hù-kùi
Pi-bî ê hiaⁿ-tī nā tit tio̍h Siōng-tè kā i thê-seng sin-hūn, eng-kai tio̍h in-ūi ánne lâi khoa-kháu;
1:10 Hó-gia̍h ê lâng nā hō͘ Siōng-tè kàng kē sin-hūn, mā tio̍h ánne, in-ūi lâng ê hù-kùi ē chhin-chhiūⁿ iá-hoe siā-.khì.
1:11 Ji̍t-thâu chi̍t-ē chhut, sio hong chi̍t ē chhoe, chháu-ba̍k chiū ta-.khì, hoe mā siā-.khì, i ê súi chiū siau-sit; hó-gia̍h lâng bô-êng phun-pho, mā ē ánne siau-sit-.khì.
1:12 Chhì-liān kah Iú-he̍k
Jím-siū chhì-liān ê lâng ū hok-khì, in-ūi keng-kòe chhì-liān chiū ē tit tio̍h oa̍h-miā; che sī Siōng-tè èng-ín beh hō͘ thiàⁿ I ê lâng ê bián-liû.
1:13 Tú tio̍h chhì-liān ê lâng m̄ thang kóng, " Góa hō͘ Siōng-tè iú-he̍k ", in-ūi Siōng-tè bē siū siâ-ok iú-he̍k, I kakī mā bē iú-he̍k lâng.
1:14 Lâng lóng sī hō͘ kakī ê su-io̍k iú-he̍k.
1:15 Su-io̍k hoâi-īn chiū seⁿ-chhut chōe-ok, chōe-ok tióng-sêng liáu-āu chiū seⁿ-chhut sí-bông.
1:16 Chhin-ài ê hiaⁿ-tī chí-mōe, m̄ thang hō͘ lâng khi-phiàn.
1:17 It-chhè bí-hó ê siúⁿ-sù kah oân-choân ê un-sù lóng sī tùi thiⁿ-téng kng-bêng ê Thiⁿ-pē siúⁿ-sù ê; I éng-oán bē kái-piàn, mā bô tńg-se̍h ê iáⁿ-chiah.
1:18 Siōng-tè chiàu kakī ê chí-ì, ēng chin-lí ê tō lâi chō lán, hō͘ lán tī I só͘ chhòng-chō ê bān-mi̍h tiong-kan, ū siōng tiōng-iàu ê tē-ūi.
1:19 Thiaⁿ Tō-lí kah Kiâⁿ Tō-lí
Chhin-ài ê hiaⁿ-tī chí-mōe, lín tio̍h ē kì-tit, ta̍k lâng tio̍h thiaⁿ lâng ê ì-kiàn, kóng-ōe tio̍h kín-sīn, m̄ thang khoài siū-khì.
1:20 In-ūi lâng ê siū-khì bē tàng si̍t-hiān Siōng-tè ê kong-gī.
1:21 Só͘-í, lín tio̍h tû-khì it-chhè ê pháiⁿ si̍p-koàn kah siâ-ok ê hêng-ûi, ēng un-jiû ê sim lâi chiap-la̍p hit-ê chèng tī lín ê sim-lāi, ē kiù lín lêng-hûn ê tō-lí.
1:22 Tio̍h si̍t-hiān tō-lí, m̄-sī khi-phiàn kakī kóng kantaⁿ thiaⁿ tō-lí to̍h hó.
1:23 Kan-taⁿ thiaⁿ tō-lí bô khì si̍t-hêng ê lâng, tú chhin-chhiūⁿ lâng tī kiàⁿ-.ni̍h siông-sè khòaⁿ i kakī ê bīn,
1:24 Siông-sè khòaⁿ liáu-āu chiū chò i khì, sûi-sî bē kì-tit i seⁿ-chò siáⁿ-mi̍h khoán.
1:25 M̄ koh, chù-sîn chhâ-khó hit-ê hō͘ lâng tit tio̍h chū-iû ê lu̍t-hoat, koh kè-sio̍k chun-hêng ê lâng, it-tēng ē tit tio̍h Siōng-tè ê chiok-hok; in-ūi i ū si̍t-chāi khì chiàu tō-lí kiâⁿ, m̄-sī thiaⁿ-liáu chiū bē kì-.tit.
1:26 Nā ū lâng siūⁿ kóng kakī chin kèng-khiân, ā bô iok-sok kakī ê chhùi-chi̍h, he sī teh khi-phiàn kakī; chit chióng lâng ê kèng-khiân lóng bô chhái-kang.
1:27 Khòaⁿ-kò͘ khó͘-lān tiong ê ko͘-jî, kóaⁿ-hū, koh pó-siú kakī, bô hō͘ sè-sio̍k ê hú-pāi ù-jiám, tī Thiⁿ-pē Siōng-tè ê gán-tiong, che chiah sī chheng-khì bô lahsap ê kèng-khiân.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。