利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 Ná-tap kah A-mí-huh ê Chōe
A-lông ê kiáⁿ Ná-tap kah A-mí-huh, ta̍k-ê the̍h kakī ê hiuⁿ-lô͘, té hóe kah hiuⁿ, tī Siōng-chú ê bīn-chêng hiàn pa̍t chióng ê hóe, sī I só͘ bô bēng-lēng in ê.
10:2 Chiū ū hóe tùi Siōng-chú ê bīn-chêng hoat-chhut, lâi kā in sio, in chiū sí tī Siōng-chú ê bīn-chêng.
10:3 Mô͘-se tùi A-lông kóng, " Che sī Siōng-chú só͘ kóng ê, I kóng: Góa ē tī chhin-kīn Góa ê lâng hián-bêng chò sèng, tī chèng lâng ê bīn-chêng, Góa ē tit tio̍h êng-kng. " A-lông mā tiām-tiām bô chhut siaⁿ.
10:4 Mô͘-se kiò A-lông ê a-chek U-chi-el ê kiáⁿ Mi-sa-el kah E-li-cha-hoán lâi, kā in kóng, " Chìn-chêng lâi kā lín ê chhin-lâng tùi sèng-só͘ ê bīn-chêng kng khì iâⁿ gōa. "
10:5 In nn̄g lâng kiâⁿ chìn-chêng lâi, chiū khiú in só͘ chhēng ê saⁿ, kā si-thé kng chhut-khì iâⁿ gōa, sī chiàu Mô͘-se só͘ bēng-lēng ê.
10:6 Mô͘-se tùi A-lông kah i ê kiáⁿ Ê-lī-a-chal, I-tha-mal kóng, " M̄-thang phah-sòaⁿ thâu-mn̂g, mā m̄ thang thiah-li̍h saⁿ, bián-tit lín sí-bông, koh bián-tit Siōng-chú tùi hōe-chiòng siū-khì; chóng-.sī, lín ê hiaⁿ-tī I-su-la-el choân ke ūi tio̍h Siōng-chú só͘ hoat-chhut ê hóe lâi ai-khàu.
10:7 Lín mā m̄ thang chhut hōe-bō͘ ê mn̂g, khióng-kiaⁿ lín ē sí, in-ūi Siōng-chú ê iû boah tī lín ê seng-khu. " In chiū chiàu Mô͘-se ê ōe lâi kiâⁿ.
10:8 Chè-si ê Kui-tēng
Siōng-chú hoan-hù A-lông kóng,
10:9 " Lí kah lí ê kiáⁿ ji̍p-khì hōe-bō͘ ê sî, po̍h chiú, kāu chiú lóng m̄ thang lim, bián-tit lín ē sí-bông, che beh chò lín ta̍k sè-tāi éng-oán ê lē.
10:10 Hō͘ lín thang hun-pia̍t sèng kah bô sèng ê, chheng-khì kah bô chheng-khì ê.
10:11 Koh hō͘ lín thang kā Siōng-chú kau-thok Mô͘-se hoan-hù I-su-la-el lâng it-chhè ê lu̍t-lē kā in kà-sī. "
10:12 Mô͘-se tùi A-lông kah i só͘ chhun lo̍h-.lâi ê kiáⁿ Ê-lī-a-chal, I-tha-mal kóng, " Lín the̍h Siōng-chú hóe-chè só͘ chhun lo̍h-.lâi ê sò͘-chè, tio̍h tī tôaⁿ piⁿ chia̍h, m̄ thang chham kàⁿ, in-ūi che sī chì-sèng ê.
10:13 Lín tio̍h tī sèng ê só͘-chāi chia̍h, in-ūi tī hiàn hō͘ Siōng-chú ê hóe-chè tiong, che sī lí ê hūn-gia̍h kah lí ê kiáⁿ ê hūn-gia̍h; Siōng-chú só͘ bēng-lēng góa ê to̍h-sī ánne.
10:14 Só͘ iô ê heng kah só͘ kí-khí ê thúi, lín tio̍h tī chheng-khì ê só͘-chāi chia̍h, lí kah lí ê kiáⁿ, í-ki̍p lí ê chabó͘ kiáⁿ, lóng tio̍h chò-hóe chia̍h, in-ūi chiahê sī tùi I-su-la-el lâng siā-un-chè tiong hō͘ lí ê, chò lí ê hūn-gia̍h kah lí ê kiáⁿ ê hūn-gia̍h.
10:15 Só͘ kí-khí ê thúi kah só͘ iô ê heng, in tio̍h kah hóe-chè ê iû chò-hóe tòa-.lâi, tī Siōng-chú ê bīn-chêng iô lâi chò iô-chè; che tio̍h kui lí kah lí ê kiáⁿ, chò éng-oán tit tio̍h ê hūn-gia̍h, lóng sī chiàu Siōng-chú só͘ bēng-lēng ê. "
10:16 Hit sî, Mô͘-se tì-ì chhōe chò sio̍k-chōe-chè ê soaⁿ-iûⁿ-káng, lí khòaⁿ, í-keng sio-.khì, chiū tùi A-lông só͘ chhun lo̍h-.lâi ê kiáⁿ Ê-lī-a-chal kah I-tha-mal siū-khì, kóng,
10:17 " Chit-ê sio̍k-chōe-chè í-keng sī chì-sèng ê, Siōng-chú koh kā hit-ê kui hō͘ lín, lâi tam-tng hōe-chiòng ê chōe-kò, tī Siōng-chú ê bīn-chêng kā in sio̍k-chōe, lín án-chóaⁿ bô tī sèng ê só͘-chāi chia̍h hiahê mi̍h-kiāⁿ?
10:18 Lí khòaⁿ, hit-ê hoeh bô tòa-ji̍p sèng-só͘ lāi, lín pún-lâi tio̍h chiàu góa só͘ bēng-lēng ê, tī sèng-só͘ chia̍h hiahê mi̍h-kiāⁿ. "
10:19 A-lông tùi Mô͘-se kóng, " Lí khòaⁿ, kin-á-ji̍t in tī Siōng-chú ê bīn-chêng hiàn in ê sio̍k-chōe-chè kah sio-chè, góa koh tú tio̍h chhin-chhiūⁿ ánne, góa nā kin-á-ji̍t chia̍h sio̍k-chōe-chè, Siōng-chú kám ē khòaⁿ-chò sī hó? "
10:20 Mô͘-se thiaⁿ-.tio̍h, chiū lia̍h chit-ê ōe chò hó.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。