提多書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Ki-tok-tô͘ ê Hêng-ûi
Tio̍h thê-chhéⁿ tāi-ke ho̍k-chiông chip-chèng-chiá kah chèng-hú koaⁿ-oân, ài sūn-ho̍k chiah ē-tàng sûi-sî piān-piān lâi chò ta̍k hāng hó sū.
3:2 Tio̍h khǹg in m̄ thang húi-pòng, m̄ thang oan-ke; tio̍h un-hô iú-siān, ēng un-jiû lâi tùi-thāi só͘-ū ê lâng.
3:3 In-ūi lán kakī í-chêng mā sī bû-ti, pōe-ge̍k, siū bê-he̍k, chò kok chióng su-io̍k kah hióng-lo̍k ê lô͘-lē, tī ok-to̍k kah oàn-tò͘ ê tiong-kan teh seng-oa̍h, hō͘-siong oàn-hūn, pí-chhú thó-ià.
3:4 M̄ koh, lán ê Kiù-chú Siōng-tè ê chû-pi kah jîn-ài hián-bêng chhut-.lâi ê sî,
3:5 I chiū chín-kiù lán, m̄-sī in-ūi lán kakī ê hó hêng-ûi, sī in-ūi I ê liân-bín. I thong-kòe têng-thâu-seⁿ ê sé-lé kah Sèng Sîn ê ōaⁿ sin lâi chín-kiù lán.
3:6 Sèng Sîn to̍h-sī Siōng-tè thong-kòe lán ê kiù Chú I-é-su Ki-tok, hong-hong hù-hù siúⁿ-sù hō͘ lán ê,
3:7 Hō͘ lán thang thong-kòe I ê un-tián lâi chheng-chò gī lâng, lâi sêng-siū lán só͘ ǹg-bāng ê éng-oán ê oa̍h-miā.
3:8 Chiahê ōe si̍t-chāi kóng liáu chin tio̍h. Góa ài lí te̍k-pia̍t kiông-tiāu chiahê tāichì, thang hō͘ sìn Siōng-tè ê lô͘-po̍k choan-sim chò hó sū. Chiahê tāichì lóng sī hó, koh tùi lâng ū lī-ek.
3:9 Chóng-.sī, lí tio̍h siám-phiah gû-gōng ê cheng-lūn, cho̍k-phó͘ ê hun-cheng kah lu̍t-hoat ê cheng-chip, in-ūi chiahê tāichì lóng sī bô lī-ek koh bô kè-ta̍t.
3:10 Tùi hiahê chè-chō hun-cheng ê lâng, kā i kéng-kài chi̍t-nn̄g pái liáu-āu, chiū m̄ thang koh kah i óng-lâi.
3:11 Lí chai chit khoán lâng í-keng pāi-hoāi, i ánne kè-sio̍k hoān chōe sī teh gí-tiāⁿ kakī ê chōe.
3:12 Chòe-āu ê Kà-sī kah Chhéng-an
Góa chhe-phài A-tê-má á-.sī Tu-khi-kó͘ khì lí hia ê sî, lí tio̍h kóaⁿ-kín lâi Nî-ko-po-lī chhōe góa, in-ūi góa í-keng koat-tēng beh khì hia kòe kôaⁿ-thiⁿ.
3:13 Lí tio̍h chīn-liōng pang-chān lu̍t-hoat-su Se-la̍p kah A-po-lô lí-hêng sî ê su-iàu, hō͘ in thang an-sim chhut-hoat.
3:14 Lí mā tio̍h hoan-hù lán kakī ê lâng, tio̍h ha̍k-si̍p chò hó sū, lâi kiong-kip hiahê si̍t-chāi ū su-iàu ê lâng, chiah bián-tit bô kiat kóe-chí.
3:15 Kah góa tī chia ê lâng lóng beh kā lí chhéng-an, mā chhiáⁿ thè goán kā hiahê tâng-sìn ê hó pêng-iú chhéng-an.
3:16 Goān Siōng-tè ê un-tián kah lín tāi-ke tông-chāi!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。