利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
9:1 A-lông Hiàn-chè
Kàu tē-peh ji̍t, Mô͘-se tiàu A-lông kah i ê kiáⁿ, í-ki̍p I-su-la-el hiahê tiúⁿ-ló lâi.
9:2 Tùi A-lông kóng, " Lí tio̍h chhú chi̍t chiah sè chiah gû-káng-á chò sio̍k-chōe-chè, chi̍t chiah mî-iûⁿ-káng chò sio-chè, tio̍h chhú bô khoat-tiám ê, hiàn tī Siōng-chú ê bīn-chêng.
9:3 Lí mā tio̍h hoan-hù I-su-la-el lâng kóng, ' Lín tio̍h chhú chi̍t chiah soaⁿ-iûⁿ-káng chò sio̍k-chōe-chè, koh chhú chi̍t chiah gû-á kiáⁿ kah chi̍t chiah mî-iûⁿ-á, lóng tio̍h bī-móa-nî, koh tio̍h bô khoat-tiám ê, lâi chò sio-chè.
9:4 Koh chhú chi̍t chiah gû-káng kah chi̍t chiah mî-iûⁿ-káng lâi chò siā-un-chè, hiàn tī Siōng-chú ê bīn-chêng kah chhú tiâu-hô iû ê sò͘-chè, in-ūi kin-á-ji̍t Siōng-chú beh hián-hiān hō͘ lín khòaⁿ. '"
9:5 In chiū chiàu Mô͘-se só͘ bēng-lēng ê tòa kàu hōe-bō͘ chêng, hōe-chiòng lóng kiâⁿ óa-lâi khiā tī Siōng-chú ê bīn-chêng.
9:6 Mô͘-se kóng, " Che sī Siōng-chú bēng-lēng lín só͘ tio̍h chò ê, Siōng-chú ê êng-kng chiū ē hián-hiān hō͘ lín khòaⁿ. "
9:7 Mô͘-se tùi A-lông kóng, " Lí tio̍h kàu tôaⁿ chêng, hiàn lí ê sio̍k-chōe-chè kah lí ê sio-chè, ūi pún-sin kah jîn-bîn sio̍k-chōe, koh hiàn jîn-bîn ê lé-mi̍h, thè in sio̍k-chōe, lóng sī chiàu Siōng-chú só͘ bēng-lēng ê. "
9:8 A-lông chiū kàu tôaⁿ chêng, thâi hit chiah gû-á kiáⁿ, ūi pún-sin chò sio̍k-chōe-chè ê.
9:9 A-lông chiahê kiáⁿ phâng hit-ê hoeh hō͘ i, i chiū ēng chéng-thâu-á ùn hoeh, boah tī tôaⁿ téng hiahê kak, koh kā hoeh tò tī tôaⁿ-kha-.ni̍h.
9:10 To̍k-to̍k sio̍k-chōe-chè ê iû kah io-chí, í-ki̍p koaⁿ-.ni̍h ê bāng-se, i lóng hē tī tôaⁿ téng sio, chiàu Siōng-chú só͘ bēng-lēng Mô͘-se ê.
9:11 I koh ēng hóe kā bah kah phôe tī iâⁿ gōa sio.
9:12 Chiū thâi sio-chè ê chengseⁿ, A-lông chiahê kiáⁿ phâng hoeh hō͘ i, i chiū hiù tī tôaⁿ téng ê sì-kho͘-ûi.
9:13 In koh ēng sio-chè ê bah, chi̍t tè chi̍t tè liân thâu the̍h hō͘ i, i lóng tī tôaⁿ téng sio.
9:14 I koh sé pak-lāi kah thúi, hē tī tôaⁿ téng sio-chè ê téng-bīn sio.
9:15 I tòa jîn-bîn ê lé-mi̍h, thâi hit chiah chò jîn-bîn sio̍k-chōe-chè ê soaⁿ-iûⁿ-káng, ūi tio̍h chōe lâi hiàn, kah khí-thâu ê sio-siâng.
9:16 Mā tòa sio-chè chiàu lē lâi hiàn.
9:17 I koh tòa sò͘-chè, tùi hit tiong-kan mi chi̍t pé, che sī tī chá-khí sî ê sio-chè í-gōa.
9:18 Koh thâi gû-káng kah mî-iûⁿ-káng chò jîn-bîn ê siā-un-chè, A-lông chiahê kiáⁿ phâng hoeh hō͘ i, i chiū hiù tī tôaⁿ téng ê sì-kho͘-ûi.
9:19 Koh the̍h gû-káng ê iû kah mî-iûⁿ-káng pûi ê bóe, í-ki̍p khàm pak-lāi ê iû kah io-chí kah koaⁿ-.ni̍h ê bāng-se.
9:20 In kā chiahê iû hē tī hiahê heng ê téng-bīn, i chiū kā iû sio tī tôaⁿ téng.
9:21 Chiahê heng kah chiàⁿ-thúi, A-lông ēng i chò iô-chè, tī Siōng-chú ê bīn-chêng iô, lóng sī chiàu Mô͘-se só͘ bēng-lēng ê.
9:22 A-lông ǹg jîn-bîn gia̍h-khí chhiú lâi, kā in chiok-hok; i í-keng hiàn sio̍k-chōe-chè, sio-chè kah siā-un-chè, chiū lo̍h-.lâi.
9:23 Mô͘-se kah A-lông chìn-ji̍p hōe-bō͘, koh chhut-lâi kā jîn-bîn chiok-hok, Siōng-chú ê êng-kng chiū hián-hiān hō͘ chèng lâng khòaⁿ-.tio̍h.
9:24 Ū hóe tùi Siōng-chú ê bīn-chêng chhut-.lâi, sio tôaⁿ téng ê sio-chè kah iû; chèng lâng khòaⁿ-.tio̍h, chiū chhut tōa hoaⁿ-hí ê siaⁿ, phak tī tē-.ni̍h.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。