提摩太前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
2:1 Kàu-hōe ê Chông-pài
Só͘-í, góa tāi-seng khoàn-bián lí, tio̍h thè só͘-ū ê lâng hiòng Siōng-tè khún-kiû, kî-tó, tāi-tó kah kám-siā.
2:2 Mā tio̍h thè kun-ông kah só͘-ū ê koaⁿ-oân kî-tó, hoân-sū kèng-khiân toan-chiàⁿ, hō͘ lán thang an-jiân pêng-chēng lâi kòe-ji̍t.
2:3 Án-ne chò chin hó, sī lán ê Kiù-chú Siōng-tè hoaⁿ-hí chiap-la̍p ê.
2:4 Siōng-tè ài lán lóng ē-tàng tit-kiù, jīn-bat chin-lí.
2:5 In-ūi Siōng-tè sī chi̍t ūi, Siōng-tè kah lâng tiong-kan ê tiong-pó mā sī chi̍t ūi, to̍h-sī chiâⁿ-chò lâng ê Ki-tok I-é-su.
2:6 I hi-seng kakī ê sèⁿ-miā lâi sio̍k-hôe chèng lâng, chit-ê tāichì tī Siōng-tè chí-tēng ê ji̍t-chí ē tit tio̍h chèng-si̍t.
2:7 Ūi tio̍h ánne, góa siū siat-li̍p chò thoân-tō-chiá, chò sù-tô͘ kah gōa-pang lâng ê kàu-su, hō͘ in siong-sìn Siōng-tè, jīn-bat chin-lí. Góa sī teh kóng chin-si̍t-ōe, bô kóng pe̍h-chha̍t.
2:8 Tùi Lâm-jîn kah Lú-jîn ê Kà-sī
Só͘-í, góa ài chapo͘ lâng bô-lūn tī siáⁿ-mi̍h só͘-chāi, lóng bô siū-khì, mā bô giâu-gî, gia̍h-khí sîn-sèng ê siang chhiú lâi kî-tó.
2:9 Góa mā ài hū-jîn-lâng chhēng-chhah pho̍k-sò͘ chéng-chê; tio̍h ēng liâm-thí siú-kí ê thài-tō͘, m̄ thang ēng kî-hêng koài-chōng ê thâu-mn̂g, kim-khì, chin-chu, á-.sī ta̍t-chîⁿ ê saⁿ-khò͘ lâi táⁿ-pān kakī.
2:10 Tio̍h ēng hó hêng-ûi chò táⁿ-pān, piáu-sī kakī sī kèng-ùi Siōng-tè ê hū-jîn-lâng.
2:11 Hū-jîn lâng tio̍h tiām-tiām-á ha̍k-si̍p, ta̍k hāng tāichì lóng tio̍h khiam-pi sūn-ho̍k.
2:12 Góa m̄-chún hū-jîn-lâng kà-sī tō-lí á-.sī koán-hat chapo͘ lâng; in tio̍h tiām-tiām.
2:13 In-ūi Siōng-tè seng chō A-tám liáu-āu chiah chō E-bah;
2:14 Jî-chhiáⁿ m̄-sī A-tám siū khi-phiàn, sī hū-jîn-lâng siū iú-he̍k lâi hām-lo̍h chōe.
2:15 M̄ koh, hū-jîn-lâng nā an-hūn siú-kí, chhî-siú sìn-gióng, ū thiàⁿ-sim koh sèng-kiat, chiū ē in-ūi seⁿ kiáⁿ lâi tit tio̍h kiù.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。