帖撒羅尼迦前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 Hō͘ Siōng-tè Hoaⁿ-hí ê Seng-oa̍h
Hiaⁿ-tī chí-mōe, goán iáu-ū ōe beh kā lín kóng. Lín í-chêng bat tùi goán ha̍k-si̍p tio̍h án-chóaⁿ seng-oa̍h, lâi hō͘ Siōng-tè hoaⁿ-hí. Kî-si̍t lín í-keng ū chiàu ánne teh seng-oa̍h, goán hōng Chú I-é-su ê miâ lâi khún-kiû koh khó͘-khǹg lín, taⁿ tio̍h koh khah ló͘-le̍k.
4:2 In-ūi lín mā chai, goán ū hōng Chú I-é-su ê miâ kā lín kà-sī siáⁿ-mi̍h.
4:3 Siōng-tè ê chí-ì sī ài lín chiâⁿ chò sèng-kiat, lī-khui îm-loān;
4:4 I ài lín ta̍k lâng ē-hiáu ēng sèng-kiat kah chun-kùi, lâi siú kakī ê seng-khu,
4:5 M̄-thang chhin-chhiūⁿ m̄ bat Siōng-tè ê gōa-pang lâng teh hòng-chhiòng su-io̍k.
4:6 Koan-hē chit-hāng tāichì, mā m̄ thang chò pháiⁿ lâi chhim-hoān tâng-sìn ê hiaⁿ-tī chí-mōe. Goán bat kā lín kóng kòe, mā ū kā lín kéng-kò, Chú ē kā chò chit khoán tāichì ê lâng chhú-hoa̍t.
4:7 Siōng-tè m̄-sī tiàu lán lâi kòe ù-òe ê seng-oa̍h, sī tiàu lán lâi kòe sèng-kiat ê seng-oa̍h.
4:8 Só͘-í, kī-choa̍t chit-ê kà-sī, m̄-sī kī-choa̍t lâng, sī teh kī-choa̍t siúⁿ-sù hō͘ lín Sèng Sîn ê Siōng-tè.
4:9 Koan-hē hiaⁿ-tī chí-mōe hō͘-siong thiàⁿ-sioh ê tāichì, goán m̄-bián koh siá siáⁿ-mi̍h hō͘ lín, in-ūi lín kakī í-keng siū tio̍h Siōng-tè ê kà-sī, ū teh sio-thiàⁿ.
4:10 Kî-si̍t lín ū chiàu chit-ê kà-sī thiàⁿ choân Ma-ke-tó-niah ê hiaⁿ-tī chí-mōe, chóng-.sī, hiaⁿ-tī chí-mōe, goán khǹg lín tio̍h koh khah ló͘-le̍k.
4:11 Lín mā tio̍h chiàu goán í-chêng kā lín hoan-hù ê, tio̍h li̍p-chì kòe pêng-chēng ê seng-oa̍h, chīn kakī ê pún-hūn chhin-chhiú chò-kang lâi î-chhî kakī ê seng-oa̍h,
4:12 Án-ne, lín chiū ē-tàng hō͘ kàu-hōe gōa ê lâng chun-kèng, mā m̄-bián óa-khò pa̍t lâng.
4:13 Sí-khì ê Sìn-tô͘
Hiaⁿ-tī chí-mōe, koan-hē sí-.khì ê lâng, goán ài lín chai, ánne lín chiah bē chhin-chhiūⁿ hiahê bô ǹg-bāng ê lâng teh pi-siong.
4:14 Lán kì-jiân siong-sìn I-é-su sí-khì koh-chài oa̍h khí-.lâi, lán mā siong-sìn Siōng-tè ē thong-kòe I-é-su chhōa hiahê sí-.khì ê lâng kah I-é-su chò-hóe lâi.
4:15 Goán chiàu Chú ê ōe kā lín kóng chit-hāng tāichì, to̍h-sī lán chiahê tī Chú koh-chài-lîm ê sî iáu oa̍h-.leh ê lâng, bē pí hiahê í-keng sí-.khì ê lâng khah tāi-seng kìⁿ tio̍h Chú.
4:16 In-ūi Chú pún-sin beh tùi thiⁿ kàng-lîm, thiⁿ-sài-tiúⁿ tōa-siaⁿ hoah, Siōng-tè ê sàu-kak chi̍t-ē hiáng, hiahê sio̍k Ki-tok í-keng sí ê lâng ē tāi-seng koh-oa̍h.
4:17 Jiân-āu lán chiahê iáu oa̍h-.leh ê lâng ē kah in siū chiap-khì hûn lāi, tī khong-tiong kah Chú kìⁿ-bīn, ánne, lán chiū éng-oán kah Chú chò-hóe.
4:18 Só͘-í, lín tio̍h ēng chiahê ōe hō͘-siong kó͘-lē.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。