帖撒羅尼迦前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Goán í-keng tán kah tòng bē tiâu, chiū koat-tēng kantaⁿ goán tòa tī A-thé-nè,
3:2 Tông-sî chhe-phài goán ê hiaⁿ-tī Tî-mó͘-theh khì lín hia, i sī ūi tio̍h Siōng-tè lâi thoân Ki-tok ê hok-im chò goán ê tâng-kang. I thang lâi kian-kò͘ lín ê sìn-sim, koh ūi tio̍h lín ê sìn-sim lâi an-ùi lín,
3:3 Hō͘ lín tiong-kan bô lâng ē in-ūi tú tio̍h khó͘-lān soah sìn-sim iô-tāng. Lín kakī mā chai, lán tú tio̍h khó͘-lān sī Siōng-tè ê chí-ì só͘ an-pâi.
3:4 Goán iáu tī lín hia ê sî, ū seng tùi lín kóng-khí, lán ē tú tio̍h khó͘-lān, āu-lâi kó-jiân ánne hoat-seng; che sī lín só͘ chai ê.
3:5 Só͘-í, góa tán kah tòng bē tiâu, chiah tio̍h chhe-phài Tî-mó͘-theh khì lín hia. Góa ài beh chai lín ê sìn tio̍h án-chóaⁿ chiah bē hō͘ Mô͘-kúi kā lín iú-he̍k, chiah bē hō͘ goán ê lô-khó͘ lóng óng-hùi khì.
3:6 Páu-lô Ūi The-sa-lô-nî-ke Kàu-hōe Kî-tó
Taⁿ Tî-mó͘-theh í-keng tùi lín hia tńg-.lâi, kā lín ê sìn-sim kah thiàⁿ-sim ê hó siau-sit pò goán chai, koh kóng-khí lín tiāⁿtiāⁿ teh siàu-liām goán, ài beh kah goán kìⁿ-bīn, chhin-chhiūⁿ goán ài beh kah lín kìⁿ-bīn kāng-khoán.
3:7 Só͘-í, hiaⁿ-tī chí-mōe, goán tī it-chhè ê khùn-khó͘ hoān-lān tiong, ū tùi lín ê sìn-sim tit tio̍h an-ùi.
3:8 Lín nā tùi Chú ū kian-kò͘ ê sìn-sim, goán chiū kám-kak ū chin-chiàⁿ teh oa̍h.
3:9 Goán tī lán ê Siōng-tè bīn-chêng, ūi tio̍h lín chin-chiàⁿ hoaⁿ-hí; ūi tio̍h che it-chhè ê hoaⁿ-hí, goán tio̍h án-chóaⁿ lâi kám-siā Siōng-tè chiah ū kàu-gia̍h?
3:10 Goán mê-ji̍t pek-chhiat kî-tó, ài beh kìⁿ tio̍h lín ê bīn, lâi pó͘-chiok lín sìn-sim bô kàu-gia̍h ê só͘-chāi.
3:11 Goān lán ê Thiⁿ-pē Siōng-tè kah lán ê Chú I-é-su kā goán khui lō͘, hō͘ goán thang khì lín hia.
3:12 Chhin-chhiūⁿ goán tùi lín ê thiàⁿ-sim ná ke-thiⁿ, goān Chú hō͘ lín hō͘-siong ê thiàⁿ-sim kah thiàⁿ chèng lâng ê sim mā ji̍t-ji̍t ke-thiⁿ.
3:13 Án-ne, lín ê sìn-sim ē-tàng kian-kò͘, tī lán ê Chú I-é-su kah I ê chèng sìn-tô͘ koh-chài lâi-lîm ê sî, tī lán ê Thiⁿ-pē Siōng-tè ê bīn-chêng, ē-tàng sèng-kiat bô thang hiâm.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。