腓立比書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
4:1 Tī Chú ê Bīn-chêng Khiā Chāi
Só͘-í, góa só͘ thiàⁿ só͘ siàu-liām ê hiaⁿ-tī chí-mōe, lín sī góa ê hoaⁿ-hí, góa ê êng-kng. Lín tio̍h óa-khò Chú khiā chāi.
4:2 Góa khó͘-khǹg Iû-o͘-tia kah Sûn-tu-ke nn̄g-ūi chí-mōe, lín tī Chú ê lāi-bīn tio̍h tâng-sim.
4:3 Tiong-si̍t ê tâng-phōaⁿ, góa mā kiû lí pang-chān chit nn̄g-ê chí-mōe, in-ūi in tī hok-im ê kang-chok siōng, bat kah Kek-lé-meh í-ki̍p kî-tha ê tâng-kang kah góa chò-hóe chhut-la̍t kòe; in ê miâ í-keng kì-chài tī Siōng-tè ê oa̍h-miā-chheh.
4:4 Tio̍h tiāⁿtiāⁿ kah Chú kiat-liân lâi hoaⁿ-hí. Góa koh kóng chi̍t pái, tio̍h hoaⁿ-hí!
4:5 Tio̍h hō͘ chèng lâng khòaⁿ-chhut lín ê sûn-liông. Chú teh beh chài-lîm ā.
4:6 Lín lóng m̄ thang chhau-hoân siáⁿ-mi̍h, bān sū tio̍h ēng kám-siā ê sim lâi kî-tó khún-kiû, kā lín só͘ kiû ê hō͘ Siōng-tè chai.
4:7 Án-ne, lâng só͘ liāu-sióng bōe kàu ê Siōng-tè ê pêng-an, ē thong-kòe Ki-tok I-é-su lâi pó-siú lín ê sim-su ì-liām.
4:8 Hiaⁿ-tī chí-mōe, chóng-kóng chi̍t kù, hiahê chin-si̍t ê, khó-kèng ê, kong-gī ê, chheng-kiat ê, thang thiàⁿ ê, hó miâ-siaⁿ ê, hó tek-hēng ê, thang oló ê, lín lóng tio̍h sî-sî khek-khek tì-ì tī sim-lāi.
4:9 Lín tùi góa só͘ ha̍k-si̍p, só͘ niá-siū, só͘ thiaⁿ-.tio̍h, só͘ khòaⁿ-.tio̍h ê, lóng tio̍h kè-sio̍k lâi si̍t-hêng. Án-ne, siúⁿ-sù pêng-an ê Siōng-tè chiū ē kah lín tông-chāi.
4:10 Páu-lô Kám-siā Lé-mi̍h
Góa tī Chú ê lāi-bīn tōa-tōa hoaⁿ-hí, in-ūi lín siàu-liām góa ê sim-chì taⁿ ū koh puh-íⁿ. Kî-si̍t lín ū teh siàu-liām góa, m̄ koh, lín bô ki-hōe thang piáu-sī.
4:11 Án-ne m̄-sī teh kóng góa bô kàu-ēng, in-ūi góa í-keng o̍h ē-hiáu, bô-lūn siáⁿ-mi̍h kéng-gū lóng ti chiok.
4:12 Góa chai-iáⁿ án-chóaⁿ kòe pi-chiān ê seng-oa̍h, mā chai-iáⁿ án-chóaⁿ kòe hù-jū ê seng-oa̍h. Bô-lūn sī pá á-.sī iau, sī hù-jū á-.sī khiàm-khoeh, góa ê pì-koat to̍h-sī ta̍k hāng ti chiok.
4:13 Góa óa-khò siúⁿ-sù góa khùi-la̍t ê Ki-tok, góa ū khùi-la̍t thang èng-hù kok chióng kéng-gū.
4:14 Sûi-jiân sī ánne, lín ū lâi hun-tam góa ê khùn-kéng, ánne si̍t-chāi chin hó.
4:15 Hui-li̍p-póe lâng, lín kakī mā lóng chai, tī góa thoân hok-im ê khí-thâu, góa lī-khui Ma-ke-tó-niah ê sî, kantaⁿ lín ê kàu-hōe ū chi-oân góa ê seng-oa̍h hùi-iōng.
4:16 Liân góa tī The-sa-lô-nî-ke ê sî, lín mā kúi-nā pái chhe lâng lâi kiong-kip góa ê su-iàu.
4:17 Góa m̄-sī teh kiû lâng sàng mi̍h-kiāⁿ, sī teh kiû lín kiat khah chē kóe-chí, lâi kì lo̍h-khì lín tī thiⁿ-téng ê siàu-phō͘.
4:18 Lín hō͘ góa ê mi̍h í-keng kàu-gia̍h koh ū chhun. Góa ū tùi Ē-pa-hu-ló-tit siu tio̍h lín kià-.lâi ê mi̍h, chhin-chhiūⁿ hoat-chhut phang-phang ê bī, chiâⁿ-chò Siōng-tè só͘ hoaⁿ-hí ê chè-mi̍h.
4:19 Góa ê Siōng-tè ē chiàu I hong-hù ê êng-iāu, thong-kòe Ki-tok I-é-su lâi pó͘-chiok lín it-chhè ê su-iàu.
4:20 Goān êng-iāu kui tī lán ê Siōng-tè, lán ê Thiⁿ-pē, tāi-tāi bô chīn. A-men!
4:21 Kiat-bóe ê Chhéng-an
Chhiáⁿ thè góa kā sio̍k Ki-tok I-é-su só͘-ū ê sìn-tô͘ chhéng-an kah góa tī chia ê hiaⁿ-tī chí-mōe mā beh kā lín chhéng-an.
4:22 Tī chia só͘-ū ê sìn-tô͘, te̍k-pia̍t sī Lô-má hông-kiong lāi ê sìn-tô͘, lóng beh kā lín chhéng-an.
4:23 Goān Chú I-é-su Ki-tok ê un-tián kah lín tông-chāi!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。