哥林多後書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
12:1 Páu-lô ê Ī-siōng kah Siōng-tè ê Khé-sī
Sûi-jiân bô lī-ek, góa it-tēng tio̍h khoa-kháu; góa beh kóng-khí Chú hō͘ góa ê ī-siōng kah khé-sī.
12:2 Góa chai ū chi̍t-ê Ki-tok-tô͘, cha̍p-sì nî chêng hō͘ Chú chhōa kàu tē-saⁿ chàn thiⁿ. Góa m̄-chai i ê seng-khu sī m̄-sī ū chiūⁿ thiⁿ, á-.sī i kantaⁿ khòaⁿ-kìⁿ ī-siōng, chí ū Siōng-tè chai.
12:3 Góa koh kóng chi̍t pái, chit-ê lâng hông chhōa-khì-kàu lo̍k-hn̂g, i sī seng-khu siū chiap chiūⁿ thiⁿ á-.sī kantaⁿ khòaⁿ-kìⁿ ī-siōng, góa m̄-chai, chí ū Siōng-tè chai.
12:4 Tī lo̍k-hn̂g, i thiaⁿ tio̍h bē tit thang kóng ê ōe, to̍h-sī lâng só͘ m̄ thang kóng ê tāichì.
12:5 Góa beh ūi tio̍h chit-ê lâng lâi khoa-kháu; m̄ koh, tû-liáu góa ê loán-jio̍k í-gōa, góa bē ūi tio̍h kakī khoa-kháu.
12:6 Kî-si̍t góa nā beh khoa-kháu, mā bô sǹg sī khong-khám, in-ūi góa beh kóng ê sī sū-si̍t; chóng-.sī, góa kakī iok-sok, chiah bián hō͘ lâng tùi góa ê phoe-phêng, chhiau-kòe i só͘ khòaⁿ tio̍h kah só͘ thiaⁿ-.tio̍h ê.
12:7 Ūi tio̍h beh hō͘ góa bē in-ūi tit tio̍h chin chē te̍k-pia̍t ê khé-sī, lâi kòe-thâu kiau-ngō͘, tī góa ê seng-khu ū chi̍t ki chhì, chhin-chhiūⁿ Sa-tán ê sù-chiá teh kā góa phah, bián-tit góa kòe-thâu kiau-ngō͘.
12:8 Ūi tio̍h chit-hāng tāichì, góa bat saⁿ pái khún-kiû Chú, hō͘ hit ki chhì lī-khui góa.
12:9 Siōng-tè ìn kóng, " Góa ê un-tián kàu-gia̍h lí ēng, in-ūi lí loán-jio̍k ê sî, góa ê khùi-la̍t ē-tàng oân-choân hoat-hui. " Só͘-í, góa chin hoaⁿ-hí, khah ài khoa-kháu góa chiahê loán-jio̍k, thang hō͘ Ki-tok ê khùi-la̍t tiàm tī góa ê sin chiūⁿ.
12:10 Ūi tio̍h Ki-tok ê iân-kò͘, góa hoaⁿ-hí jím-siū loán-jio̍k, bú-jio̍k, pek-hāi, khùn-khó͘, in-ūi góa loán-jio̍k ê sî, tian-tò ū khùi-la̍t.
12:11 Góa it-ti̍t chiâⁿ-chò gōng lâng, che sī lín kā góa pek ê. Góa eng-kai hō͘ lín oló chiah tio̍h. Góa sûi-jiân bô siáⁿ-mi̍h liáu-put-khí, si̍t-chāi mā bô khah su hiahê" Te̍k-pia̍t ê sù-tô͘ ".
12:12 Góa tī lín tiong-kan, ū ēng chióng-chióng ê jím-nāi, koh kiâⁿ sîn-jiah, kî-sū kah koân-lêng, lâi chèng-bêng góa sī sù-tô͘.
12:13 Tû-liáu góa bô mâ-hoân lín pang-chān góa í-gōa, góa tùi-thāi lín ū tó chi̍t hāng pí kî-tha ê kàu-hōe khah bô kàu-gia̍h? Chhiáⁿ lín goân-liōng góa " Bô kong-tō "ê só͘-chāi.
12:14 Páu-lô ê Hóng-būn Kè-ōe kah Kéng-kò
Taⁿ góa tē-saⁿ pái chún-pī beh khì lín hia, góa bē chiâⁿ-chò lín ê hū-tām, góa tùi lín bô siáⁿ-mi̍h iau-kiû. Góa só͘ ì-ài ê sī lín, m̄-sī lín ê kim-chîⁿ. Kî-si̍t kiáⁿ-jî bô eng-kai ūi tio̍h pē-bú chek-chū, eng-kai sī pē-bú ūi tio̍h kiáⁿ-jî chek-chū châi-bu̍t.
12:15 Góa chin hoaⁿ-hí hù-chhut it-chhè lâi pang-chān lín, sīm-chì hù-chhut góa kakī ê sèⁿ-miā. Kám kóng góa jú thiàⁿ lín, tit tio̍h lín ê thiàⁿ chiū jú chió?
12:16 Án-ne, lín tio̍h sêng-jīn góa m̄ bat kā lín thoa-lūi. Ū lâng kóng góa kî-khiáu, ēng kúi-chà ê pō͘-sò͘ lâi kā lín tîⁿ tiâu-tiâu.
12:17 Góa kám ū phài siáⁿ lâng khì kā lín phiⁿ?
12:18 Góa ū khǹg Tî-to khì lín hia, mā chhe-phài chi̍t-ê hiaⁿ-tī kah i chò-hóe khì. Tî-to kám bat kā lín phiⁿ? Goán kám m̄-sī kāng chi̍t-ê sim-sîn teh chò? Kāng chi̍t-ê kha-pō͘ teh kiâⁿ?
12:19 Lín it-ti̍t siūⁿ kóng goán hiòng lín teh ūi kakī piān-kái, kî-si̍t m̄-sī! Goán tī Siōng-tè ê bīn-chêng, kóng Ki-tok ài goán kóng ê ōe. Chhin-ài ê hiaⁿ-tī chí-mōe, goán it-chhè só͘ chò ê, lóng sī ūi tio̍h beh kā lín chō-chiū.
12:20 Góa khióng-kiaⁿ khì lín hia ê sî, kiámchhái ē khòaⁿ-kìⁿ lín kah góa só͘ kî-thāi ê bô kāng-khoán, lín mā khòaⁿ-kìⁿ góa kah lín só͘ kî-thāi ê bô kāng-khoán. Góa koh khióng-kiaⁿ lín ū hun-cheng, oàn-tò͘, siū-khì, kiat-tóng, húi-pòng, kóng kha-chiah-āu ōe, phòng-hong, hun-loān.
12:21 Góa mā khióng-kiaⁿ góa āu-piàn koh khì lín hia ê sî, góa ê Siōng-tè ē hō͘ góa tī lín ê bīn-chêng kiàn-siàu, góa mā ē ūi tio̍h chin chē lâng thî-khàu, in-ūi in tùi í-chêng só͘ hoān ê chōe, ù-òe, kan-îm kah hòng-tōng, kàu taⁿ iáu-bōe hóe-kái.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。