利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Chhò-gō͘ Hoān-chōe Hiàn Sio̍k-chè ê Kui-tēng
" Pó͘ kòe-si̍t ê chè ê kui-lē to̍h-sī ánne, chit-ê sī chì-sèng ê.
7:2 Tī thâi sio-chè ê só͘-chāi, mā tio̍h tī hia thâi pó͘ kòe-si̍t ê chè; i ê hoeh tio̍h hiù tī tôaⁿ-.ni̍h ê sì-kho͘-ûi.
7:3 I ê iû tio̍h lóng hiàn, hit-ê pûi ê bóe kah khàm pak-lāi ê iû, í-ki̍p nn̄g lia̍p io-chí,
7:4 kah in só͘-ū ê iû, to̍h-sī óa-kīn io siang pêng ê iû kah koaⁿ-.ni̍h ê bāng-se, í-ki̍p io-chí, it-khài tio̍h the̍h khí-.lâi.
7:5 Chè-si tio̍h tī tôaⁿ téng sio hiahê mi̍h, chò hiàn hō͘ Siōng-chú ê hóe-chè, che sī pó͘ kòe-si̍t ê chè.
7:6 Chè-si tiong ê chapo͘ teng lóng tio̍h chia̍h chiahê mi̍h, tī sèng ê só͘-chāi chia̍h, che sī chì-sèng ê.
7:7 " Sio̍k-chōe-chè siáⁿ-mi̍h khoán, pó͘ kòe-si̍t ê chè mā sī ánne, in ê kui-lē sī sio-siâng, ēng hit-ê lâi sio̍k-chōe ê chè-si, chiū tit tio̍h chit-ê mi̍h.
7:8 Chè-si kā lâng hiàn sio-chè, i só͘ hiàn sio-chè ê chengseⁿ ê phôe, chiū kui tī chè-si pún-sin.
7:9 Kiàn-nā tī hóe-lô͘ piak ê sò͘-chè kah tī tiáⁿ á-.sī tī chian-pôaⁿ chún-pī ê, lóng tio̍h kui tī hiàn hit-ê chè ê chè-si.
7:10 Kiàn-nā sò͘-chè, bô-lūn sī chham iû ê á-.sī ta ê, lóng tio̍h kui A-lông ê kiáⁿ-sun, tāi-ke pêⁿ-pun.
7:11 Pêng-an-chè ê Kui-tēng
" Lâng hiàn siā-un-chè hō͘ Siōng-chú, hit-ê kui-lē to̍h-sī ánne.
7:12 I nā ūi tio̍h kám-siā lâi hiàn, chiū tio̍h ēng tiâu-hô iû ê bô-kàⁿ piáⁿ kah boah iû bô-kàⁿ ê po̍h piáⁿ, í-ki̍p chhiau hō͘ i chiâu ê mī-hún, ēng iû tiâu-hô chò ê piáⁿ kah kám-siā ê chè chò-hóe lâi hiàn.
7:13 Tio̍h ēng ū kàⁿ ê piáⁿ kah ūi tio̍h kám-siā lâi hiàn ê siā-un-chè, kah i ê lé-mi̍h chò-hóe lâi hiàn.
7:14 Tio̍h tùi ta̍k hāng lé-mi̍h ê tiong-kan, the̍h chi̍t hāng hiàn hō͘ Siōng-chú chò kí-chè, che tio̍h kui tī hiù siā-un-chè ê hoeh ê chè-si.
7:15 Ūi tio̍h kám-siā lâi hiàn ê siā-un-chè ê bah, tio̍h tī hiàn lé-mi̍h ê ji̍t chia̍h-oân, chi̍t-tiám-á to m̄ thang lâu kàu thiⁿ-kng.
7:16 " Nā i só͘ hiàn ê lé-mi̍h, sī ūi tio̍h siā goān á-.sī kam-sim hiàn ê, tio̍h tī i hiàn chè ê ji̍t chia̍h, só͘ chhun lo̍h-.lâi ê bîn-á-chài thang koh chia̍h.
7:17 To̍k-to̍k só͘ chhun lo̍h-.lâi ê chè-bah, kàu tē-saⁿ ji̍t tio̍h ēng hóe sio-tiāu.
7:18 Kàu tē-saⁿ ji̍t nā chia̍h siā-un-chè ê bah, chit-ê chè bô tit tio̍h chiap-la̍p, mā bô kā hiàn ê sǹg gia̍h, tian-tò sī chò thang thó-ià ê, chia̍h ê lâng chiū tio̍h tam-tng i ê chōe.
7:19 " Chè-bah nā kha̍p tio̍h bô chheng-khì ê mi̍h, chiū m̄ thang chia̍h, tio̍h ēng hóe sio-tiāu. Kóng tio̍h chè ê bah, kiàn-nā chheng-khì ê lâng lóng thang chia̍h.
7:20 To̍k-to̍k sio̍k tī Siōng-chú siā-un-chè ê bah, lâng nā seng-khu bak tio̍h bô chheng-khì lâi chia̍h, chit-ê lâng tio̍h tùi i ê jîn-bîn tiong chián tû-.khì.
7:21 Ū lâng bong tio̍h siáⁿ-mi̍h bô chheng-khì ê mi̍h, á-.sī lâng ê bô chheng-khì, á-.sī bô chheng-khì ê chengseⁿ, á-.sī bô chheng-khì khó-ò͘ⁿ ê mi̍h, lâi chia̍h tio̍h sio̍k tī Siōng-chú siā-un-chè ê bah, chit-ê lâng tio̍h tùi i ê jîn-bîn tiong chián tû-.khì.
7:22 Siōng-chú hoan-hù Mô͘-se kóng,
7:23 " Lí tio̍h hoan-hù I-su-la-el lâng kóng, bô-lūn sī gû, á-.sī mî-iûⁿ, á-.sī soaⁿ-iûⁿ ê iû, lín lóng m̄ thang chia̍h.
7:24 Ka-kī sí ê ê iû kah hō͘ iá-siù thiah sin ê ê iû, thang chò pa̍t mi̍h ê lō͘-ēng, chí-sī lín chhian-bān m̄ thang chia̍h.
7:25 Ē-tàng hiàn hō͘ Siōng-chú chò hóe-chè ê chengseⁿ ê iû, kiàn-nā chia̍h i ê lâng, hit-ê lâng tio̍h tùi i ê jîn-bîn tiong chián tû-.khì.
7:26 Tī lín it-chhè só͘ tòa ê só͘-chāi, bô-lūn sī chiáu á-.sī iá-siù ê hoeh, lín lóng m̄ thang chia̍h.
7:27 Bô-lūn siáⁿ lâng chia̍h siáⁿ-mi̍h hoeh, hit-ê lâng tio̍h tùi i ê jîn-bîn tiong chián tû-.khì.
7:28 Siōng-chú hoan-hù Mô͘-se kóng,
7:29 " Lí tio̍h hoan-hù I-su-la-el lâng kóng, kiàn-nā hiàn siā-un-chè hō͘ Siōng-chú ê lâng, tio̍h tùi i ê siā-un-chè tiong, tòa i ê lé-mi̍h lâi hō͘ Siōng-chú.
7:30 I tio̍h chhin-chhiú tòa hiàn hō͘ Siōng-chú ê hóe-chè lâi, to̍h-sī tòa iû kah heng lâi, thang ēng heng tī Siōng-chú ê bīn-chêng chò iô-chè lâi iô.
7:31 Chè-si tio̍h kā iû sio tī tôaⁿ téng, to̍k-to̍k heng tio̍h kui tī A-lông kah i ê kiáⁿ-sun.
7:32 Lín tio̍h tùi lín ê siā-un-chè, ēng chiàⁿ-thúi chò kí-chè, kui hō͘ chè-si.
7:33 A-lông ê kiáⁿ-sun tiong, hiàn siā-un-chè ê hoeh kah iû ê, tio̍h tit tio̍h chit-ê chiàⁿ-thúi chò in ê hūn-gia̍h.
7:34 In-ūi Góa tùi I-su-la-el lâng siā-un-chè ê tiong-kan, chhú chit-ê iô ê heng kah kí-khí ê thúi, hō͘ chè-si A-lông kah i ê kiáⁿ-sun, chò in tùi I-su-la-el lâng só͘ éng-oán tit tio̍h ê hūn-gia̍h.
7:35 " Che sī tùi Siōng-chú hóe-chè tiong, the̍h chhut-lâi chò A-lông siū boah-iû ê hūn-gia̍h kah i ê kiáⁿ-sun siū boah-iû ê hūn-gia̍h, tī i chhōa in lâi tng chè-si ê chit ho̍k-sāi Siōng-chú ê ji̍t.
7:36 Chiū-sī i kā in boah iû ê ji̍t, Siōng-chú hoan-hù I-su-la-el lâng kiong-kip in ê, chò in ta̍k sè-tāi éng-oán tit tio̍h ê hūn-gia̍h.
7:37 " Che sī sio-chè, sò͘-chè, sio̍k-chōe-chè, pó͘ kòe-si̍t ê chè, siat-li̍p sèng-chit ê chè kah siā-un-chè ê kui-lē.
7:38 Lóng sī Siōng-chú tī Si-nái soaⁿ só͘ bēng-lēng Mô͘-se ê, to̍h-sī i tī Si-nái khòng-iá bēng-lēng I-su-la-el lâng hiàn lé-mi̍h hō͘ Siōng-chú ê ji̍t. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。