創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Siōng-tè ê Chhòng-chō
Goân-khí-thâu, Siōng-tè chhòng-chō thiⁿ kah tē ê sî,
1:2 tē sī khang-khang hūn-tūn, chhim-ian ê téng-bīn o͘-àm; Siōng-tè ê lêng ūn-hêng tī chúi-bīn.
1:3 Siōng-tè kóng, " Tio̍h ū kng ", chiū ū kng.
1:4 Siōng-tè khòaⁿ kng sī hó, chiū kā kng kah àm hun-khui.
1:5 Siōng-tè kiò hit-ê kng chò ji̍t, kiò àm chò mê. Ū ê-hng, ū chá-khí, che sī thâu chi̍t ji̍t.
1:6 Siōng-tè kóng, " Chiahê chúi ê tiong-kan tio̍h ū kiong-chhong kā chúi kah chúi hun-khui. "
1:7 Siōng-tè chiū chō kiong-chhong, lâi hun-khui kiong-chhong ē ê chúi kah kiong-chhong téng ê chúi, chiū chiàu ánne oân-sêng.
1:8 Siōng-tè kiò kiong-chhong chò thiⁿ. Ū ê-hng, ū chá-khí, sī tē-jī ji̍t.
1:9 Siōng-tè kóng, " Thiⁿ-ē chiahê chúi tio̍h chū-chi̍p kàu chi̍t-ê só͘-chāi, ta tē tio̍h chhut-hiān. " Chiū chiàu ánne oân-sêng.
1:10 Siōng-tè kiò ta tē chò tē, kiò chū-chi̍p ê chúi chò hái; Siōng-tè khòaⁿ ánne sī hó.
1:11 Siōng-tè kóng, " Tē tio̍h hoat-chháu kah kiat-chí ê chhài-se, í-ki̍p chiàu-lūi seⁿ kóe-chí ê chhiū, hit lāi-bīn ū i ê chí. " Chiū chiàu ánne oân-sêng.
1:12 Tē chiū hoat-chháu kah chiàu-lūi kiat-chí ê chhài-se, í-ki̍p chiàu-lūi seⁿ kóe-chí ê chhiū, lāi-bīn ū i ê chí. Siōng-tè khòaⁿ ánne sī hó.
1:13 Ū ê-hng, ū chá-khí, sī tē-saⁿ ji̍t.
1:14 Siōng-tè kóng, " Thiⁿ téng ê kiong-chhong tio̍h ū hoat kng ê thé, lâi hun-pia̍t mê-ji̍t, mā thang chò tiāu-thâu, sù-kùi, ji̍t, nî,
1:15 mā hō͘ in chò kng-thé tī thiⁿ ê kiong-chhong, chiò-kng tī tē-chiūⁿ. " Chiū chiàu ánne oân-sêng.
1:16 Siōng-tè chiū chō tōa ê kng-thé nn̄g-ê, tōa ê kng-thé lâi koán ji̍t-sî, sè ê kng-thé lâi koán àm-sî, mā chō chheⁿ-sîn.
1:17 Siōng-tè kā in hē tī thiⁿ-téng ê kiong-chhong, hō͘ in tī tē-.ni̍h chiò-kng,
1:18 koán-lí ji̍t kah mê, hun-pia̍t kng kah àm; Siōng-tè khòaⁿ ánne sī hó.
1:19 Ū ê-hng, ū chá-khí, sī tē-sì ji̍t.
1:20 Siōng-tè kóng, " Chúi tio̍h seng-thòaⁿ chin chē ū oa̍h-miā ê tōng-bu̍t, chiáu poe tī tē ê téng-bīn kah thiⁿ-téng ê kiong-chhong. "
1:21 Siōng-tè chiū chhòng-chō hái-.ni̍h ê tōa hî, í-ki̍p chúi só͘ seⁿ chin chē ū oa̍h-miā ê tōng-bu̍t, kok chiàu i ê lūi; koh chhòng-chō ta̍k chióng ê poe-chiáu, kok chiàu i ê lūi. Siōng-tè khòaⁿ ánne sī hó.
1:22 Siōng-tè kā in sù-hok, kóng, " Tio̍h seng-thòaⁿ ke-thiⁿ chin chē, chhiong-móa tī hái-.ni̍h ê chúi, mā hō͘ chiáu-chiah tī tē-.ni̍h seⁿ-thòaⁿ chin chē. "
1:23 Ū ê-hng, ū chá-khí, sī tē-gō͘ ji̍t.
1:24 Siōng-tè kóng, " Tē tio̍h seng ū oa̍h-miā ê tōng-bu̍t, chiàu i ê lūi, chengseⁿ, thâng-thōa, tē-chiūⁿ ê cháu-siù, chiàu i ê lūi. " Chiū chiàu ánne oân-sêng.
1:25 Siōng-tè chiū chō tē-chiūⁿ ê cháu-siù chiàu i ê lūi, chengseⁿ chiàu i ê lūi, tē-chiūⁿ it-chhè ê thâng-thōa mā chiàu i ê lūi. Siōng-tè khòaⁿ ánne sī hó.
1:26 Siōng-tè kóng, " Lán tio̍h chō lâng chhin-chhiūⁿ lán ê siōng, chiàu lán ê khoán, hō͘ in koán-lí hái-.ni̍h ê hî, thiⁿ-téng ê chiáu, chengseⁿ, í-ki̍p choân tē kah tē-chiūⁿ teh sô ê thâng-thōa. "
1:27 Siōng-tè chiū chhòng-chō lâng chhin-chhiūⁿ I kakī ê siōng, chiàu Siōng-tè kakī ê siōng chhòng-chō jîn-lūi, chhòng-chō in lâm-.ê lí-.ê.
1:28 Siōng-tè kā in sù-hok, koh tùi in kóng, " Tio̍h seng-thòaⁿ chin chē, chhiong-móa tī tē-chiūⁿ, lâi iâⁿ-kòe it-chhè, mā tio̍h tī-lí hái-.ni̍h ê hî, thiⁿ-téng ê chiáu kah tē-chiūⁿ it-chhè ē tín-tāng ê oa̍h-mi̍h. "
1:29 Siōng-tè kóng, " Góa ū hō͘ lín choân tē-chiūⁿ it-chhè kiat-chí ê chhài-se, koh ū it-chhè ê chhiū, kî-tiong ū kiat-chí ê chhiū ê kóe-chí, lóng beh hō͘ lín chò chia̍h-mi̍h.
1:30 Nā-sī tē-chiūⁿ it-chhè ê cháu-siù kah khong-tiong it-chhè ê chiáu, í-ki̍p tē-chiūⁿ it-chhè ē tín-tāng ū oa̍h-miā ê mi̍h, Góa kā it-chhè ê chheⁿ-chháu hō͘ in chò chia̍h-mi̍h. " Chiū chiàu ánne oân-sêng.
1:31 Siōng-tè khòaⁿ I it-chhè só͘ chō ê chiū kóng, " Lí khòaⁿ, chin hó. " Ū ê-hng, ū chá-khí, sī tē-la̍k ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。