哥林多後書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
6:1 Goán kah Chú tâng-kang, mā kā lín khó͘-khǹg, M̄-thang óng-hùi tùi Siōng-tè niá-siū ê un-tián.
6:2 Siōng-tè kóng, góa hoaⁿ-hí chiap-la̍p ê sî ū thiaⁿ lí ê kî-kiû, Tī chín-kiù ê ji̍t góa ū pang-chān lí. (chù, ISI 49:8) Lín tio̍h thiaⁿ, chit chūn sī siū chiap-la̍p ê sî, kin-á-ji̍t sī chín-kiù ê ji̍t.
6:3 Goán bô ài lâng húi-pòng goán ê ho̍k-sāi kang-chok, goán lóng bô chò chó͘-gāi lâng ê tāichì.
6:4 Goán tian-tò ēng siōng tōa ê jím-nāi, it-chhè lóng thong-kòe hoān-lān, kan-lân kah khùn-khó͘, lâi chèng-bêng goán sī Siōng-tè ê lô͘-po̍k.
6:5 Goán hông phah, hông koaiⁿ lo̍h kaⁿ, hō͘ pō-bîn jiáu-loān; goán lô-khó͘, bô khùn, bô chia̍h.
6:6 Goán ēng sûn-kiat, tì-sek, khoan-iông, jîn-chû kah óa-khò Sèng Sîn, ēng chin-sêng ê thiàⁿ-sim,
6:7 Chin-lí ê sìn-sit kah Siōng-tè ê koân-lêng, lâi piáu-bêng goán sī Siōng-tè ê lô͘-po̍k. Goán ēng chèng-gī chò bú-khì kong-kek tùi-te̍k, pó-hō͘ kakī.
6:8 Goán siū chun-tiōng mā siū bú-jio̍k, tit tio̍h pháiⁿ miâ-siaⁿ mā tit tio̍h hó miâ-siaⁿ; goán hō͘ lâng khòaⁿ-chò ná pián-sian-á, kî-si̍t goán lóng kóng sêng-si̍t-ōe.
6:9 Kah-ná bô lâng bat goán, kî-si̍t lâng-lâng lóng bat; hō͘ lâng khòaⁿ-chò kahná sí-.khì, kî-si̍t goán iáu oa̍h-.leh; goán sûi-jiân siū hêng-hoa̍t, mā bô hō͘ lâng thâi-sí.
6:10 Sûi-jiân ū hoân-ló, kî-si̍t tiāⁿtiāⁿ ū hí-lo̍k; sûi-jiân sànchhiah, kî-si̍t hō͘ chin chē lâng hó-gia̍h; kahná bô pòaⁿ-hāng, kî-si̍t ta̍k hāng lóng ū.
6:11 Ko-lîn-to ê pêng-iú, goán ê sim-heng í-keng phah-khui, khui chhùi teh tùi lín kóng ōe.
6:12 Goán m̄ bat tùi lín bô tō͘-liōng, sī lín kakī bô tō͘-liōng.
6:13 Góa kā lín tòng-chò kakī ê kiáⁿ teh tùi lín kóng, lín tio̍h o̍h goán ê khoán-sit, kā lín ê sim-heng pàng khah khui-khoah.
6:14 Tio̍h Thê-hông Īⁿ-kàu ê Éng-hióng
M̄-thang kah bô sìn ê lâng khan-liân kau-chhap. Gī kah put-gī kám ē-tàng chò-hóe? Kng-bêng kah o͘-àm kám ē-tàng hō͘-siong lâi-óng?
6:15 Ki-tok kah Mô͘-kúi ná ē-tàng hô-hó? Sìn kah bô sìn ê lâng ū siáⁿ-mi̍h kiōng thong ê só͘-chāi?
6:16 Siōng-tè ê tiān kah ngó͘-siōng ná ē-tàng pâi chò-hóe? Lán sī éng-oán oa̍h ê Siōng-tè ê tiān. Chiàu Siōng-tè só͘ kóng, góa beh kah Góa ê chú-bîn chò-hóe tòa, tī in tiong-kan kiâⁿ-ta̍h. Góa beh chò in ê Siōng-tè, in mā beh chò Góa ê chú-bîn. (chù, LBK 26:11-12)
6:17 Só͘-í, Chú kóng, Lín tio̍h tùi in tiong-kan chhut-khì kah in hun-lī. M̄-thang bong bô chheng-khì ê mi̍h, góa chiū ē kā lín chiap-la̍p. (chù, ISI 52:11; ICK 20:34, 41)
6:18 Góa beh chò lín ê Thiⁿ-pē, Lín beh chò góa ê kiáⁿ-jî. Che sī choân-lêng ê Chú kóng ê. (chù, SMH 7:14)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。