哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
16:1 Ūi Ê-lú-sa-lèm ê Sìn-tô͘ Bō͘-khoán
Koan-hē bō͘-khoán pang-chān sìn-tô͘ ê tāichì, lín mā tio̍h chiàu góa í-chêng hoan-hù Ga-la̍h-tia hiahê kàu-hōe ê pān-hoat khì chò.
16:2 Múi chhit ji̍t ê thâu chi̍t ji̍t, lín ta̍k lâng tio̍h chiàu kakī ê siu-ji̍p poah chi̍t-kóa chîⁿ khí-lâi khǹg, bián-tit góa khì lín hia ê sî chiah khai-sí bō͘-khoán.
16:3 Góa kàu-ūi ê sî, ē kā siāu-kài ê phoe kah lín ê koan-khoán kau hō͘ lín só͘ thui-chiàn ê lâng, jiân-āu chhe-phài in tòa-khì Ê-lú-sa-lèm.
16:4 Nā-sī góa mā tio̍h khì, in mā thang kah góa chò-hóe khì.
16:5 Páu-lô ê Hóng-būn Kè-ōe
Góa chitmá keng-kòe Ma-ke-tó-niah liáu-āu, chiū beh khì lín hia.
16:6 Góa tāi-khài ē kah lín tòa chi̍t-chām-á, kiámchhái ē kah lín chò-hóe kòe kôaⁿ-thiⁿ. Án-ne, bô-lūn sòa lo̍h-khì góa beh khì tó-ūi, lóng thang hō͘ lín sàng góa chhut-hoat.
16:7 Chit pái góa bô ài kantaⁿ kòe lō͘ ê sî sūn-sòa khì lín hia; Chú nā ín-chún, góa ǹg-bāng kah lín tòa khah kú.
16:8 Chóng-.sī, góa mā beh tī Ê-hu-soh tòa kàu Gō͘-sûn-cheh.
16:9 Sûi-jiân tī hia ū chin chē tùi-te̍k, m̄ koh, Siōng-tè ūi góa khui chi̍t-ê khoah koh tōa ê mn̂g, thang chò ū kong-hāu ê kang-chok.
16:10 Tî-mó͘-theh nā kàu-ūi, lín tio̍h kā i chiap-thāi, hō͘ i ē-tàng an-sim chò-kang, in-ūi i kah goán kāng-khoán teh chò chú ê kang.
16:11 Lín lóng m̄ thang kā i khòaⁿ-khin, tio̍h sàng i pêng-an chhut-hoat lâi góa chia, in-ūi góa teh thèng-hāu i kah hiahê hiaⁿ-tī chò-hóe lâi.
16:12 Koan-hē lán ê hiaⁿ-tī A-po-lô, góa chài-saⁿ khǹg i kah hiahê hiaⁿ-tī khì lín hia; chóng-.sī, i kàu taⁿ lóng bô àn-sǹg beh khì. Nā ū tú-hó ê ki-hōe, i chiū ē khì.
16:13 Kiat-bóe ê Chhéng-an
Lín tio̍h kéng-séng, tī sìn-gióng siōng khiā ho͘ chāi, tio̍h ióng-kám, kian-kiông.
16:14 It-chhè ê tāichì tio̍h ēng thiàⁿ-sim lâi chò.
16:15 Hiaⁿ-tī chí-mōe, lín bat Su-tê-hoa-nah ê chi̍t ke lâng, in sī A-kha-iah séng thâu-chi̍t ke kui sìn Chú ê, koh jia̍t-sim ho̍k-bū sìn-tô͘.
16:16 Góa khǹg lín tio̍h ho̍k-chiông chit khoán lâng, í-ki̍p só͘-ū kah lín chò-hóe lô-khó͘ ê tâng-kang.
16:17 Góa chin hoaⁿ-hí Su-tê-hoa-nah, Hok-tu-ná-toh, A-khai-kó͘ ē-tàng khì lín hia, thang pó͘ lín ê put-chiok.
16:18 In hō͘ góa kah lín ê sim-sîn tit tio̍h kó͘-bú. Lín tio̍h chun-tiōng chit khoán lâng.
16:19 A-si-a séng ê kok kàu-hōe lóng kā lín chhéng-an. A-ku-lah, Pu-lí-su-ki-lah kah tī in chhù lāi teh chū-hōe ê kàu-hōe, mā tī Chú ê lāi-bīn pek-chhiat kā lín chhéng-an.
16:20 Só͘-ū ê hiaⁿ-tī chí-mōe lóng kā lín chhéng-an. Lín tio̍h ēng sèng-kiat ê lé-gî lâi hō͘-siong chhéng-an.
16:21 Góa Páu-lô chhin-pit kā lín chhéng-an.
16:22 Nā ū lâng bô thiàⁿ Chú, tio̍h siū chiù-chó͘. Chú ah, kiû Lí kàng-lîm!
16:23 Goān Chú I-é-su Ki-tok ê un-tián kah lín tông-chāi.
16:24 Góa ê thiàⁿ-sim kah só͘-ū sio̍k Ki-tok I-é-su ê lâng tông-chāi. A-men!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。