哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
14:1 Sèng Sîn ê Un-sù
Tio̍h tui-kiû thiàⁿ-sim, mā tio̍h khat-bōng sio̍k-lêng ê un-sù, iû-kî-sī thoân hok-im ê un-sù.
14:2 Kóng kok chióng kńg-chi̍h-ōe ê lâng m̄-sī teh tùi lâng kóng, sī teh tùi Siōng-tè kóng, in-ūi bô lâng thiaⁿ ū. Chóng-.sī, i ū teh kóng sio̍k-lêng ê ò-pì.
14:3 M̄ koh hiahê thoân hok-im ê lâng sī teh tùi lâng kóng, lâi kā lâng chō-chiū, khoàn-bián kah an-ùi.
14:4 Kóng kńg-chi̍h-ōe ê lâng sī teh chō-chiū kakī, thoân hok-im ê lâng sī teh chō-chiū kàu-hōe.
14:5 Góa chin ài lín ta̍k lâng lóng ē kóng kî-biāu ê im-gí, to̍k-to̍k góa koh khah ài lín ē thoân hok-im. In-ūi kóng kńg-chi̍h-ōe nā bô hoan-e̍k, chiū bē tàng chō-chiū kàu-hōe, ánne, thoân hok-im pí kóng kńg-chi̍h-ōe khah iàu-kín.
14:6 Só͘-í, hiaⁿ-tī chí-mōe, góa khì lín hia, nā kantaⁿ kóng kńg-chi̍h-ōe, bô thoân-káng Siōng-tè ê khé-sī, tì-sek, sìn-sit á-.sī kà-sī, ánne, tùi lín ū siáⁿ-mi̍h lī-ek?
14:7 Hiahê bô oa̍h-miā ê ga̍k-khì, chhin-chhiūⁿ tōng-siau á-.sī khîm, nā bô hoat-chhut koân-kē ê im, lâng ná ē chai sī teh chàu siáⁿ-mi̍h?
14:8 Sàu-kak ê siaⁿ nā bô chún-khak ê im, lâng ná ē chai thang chún-pī chhut-chiàn?
14:9 Chhin-chhiūⁿ ánne, lín só͘ kóng ê kńg-chi̍h-ōe, ì-sù nā bô chheng-chhó, lâng ná ē chai lín teh kóng siáⁿ-mi̍h? Án-ne, lín bē su teh tùi khong-khì kóng-ōe.
14:10 Sè-kan ū chin chē-chióng ê im-gí, ta̍k-ê lóng ū ì-sù.
14:11 Góa nā m̄ bat hit khoán im-gí, kóng ê lâng ē kā góa tòng-chò sī gōa-kok lâng, góa mā ē kā i tòng-chò sī gōa-kok lâng.
14:12 Án-ne, lín kì-jiân jia̍t-sim teh tui-kiû sio̍k-lêng ê un-sù, tio̍h koh khah chhut-la̍t tui-kiû ē-tàng chō-chiū kàu-hōe ê un-sù.
14:13 Só͘-í, kóng kńg-chi̍h-ōe ê lâng, tio̍h kî-kiû ē-tàng ū kái-soeh ê lêng-le̍k.
14:14 Góa nā ēng kńg-chi̍h-ōe kî-tó, he sī góa ê lêng teh kî-tó, m̄ koh, góa ê lí-tì bô hoat-seng chok-iōng.
14:15 Án-ne, góa tio̍h án-chóaⁿ chò? Góa beh ēng sim-sîn kî-tó; mā beh ēng lí-tì kî-tó. Góa beh ēng sim-sîn gîm-si, mā beh ēng lí-tì gîm-si.
14:16 Lín nā kantaⁿ ēng sim-sîn kám-siā, hiahê hōe-chiòng m̄-chai lí teh kóng siáⁿ-mi̍h, i ná ē tùi lí ê kám-siā tâng-sim lâi kóng, " A-men "?
14:17 Lí ê kám-siā sī hó, m̄ koh, bô hō͘ lâng tit tio̍h chō-chiū.
14:18 Góa kám-siā Siōng-tè ê sî, kóng kńg-chi̍h-ōe pí lín tāi-ke khah chē.
14:19 Chóng-.sī, tī kàu-hōe tiong, góa lêng-khó kóng gō͘ kù hō͘ lâng thiaⁿ ū koh thang kà-sī lâng ê ōe, mā bô ài kóng chi̍t bān kù ê kńg-chi̍h-ōe.
14:20 Hiaⁿ-tī chí-mōe, lín siūⁿ tāichì m̄ thang chhin-chhiūⁿ gín'á. Chò pháiⁿ tāichì tio̍h chhin-chhiūⁿ eⁿ-á, siūⁿ tāichì tio̍h chhin-chhiūⁿ tōa-lâng.
14:21 Lu̍t-hoat ū kì-chài, Chú kóng, góa beh ēng kóng gōa-kok-ōe ê lâng, ēng ī-pang lâng ê chhùi-tûn, tùi Góa ê chú-bîn kóng-ōe; ánne, in iû-goân m̄-thiaⁿ. (chù, ISI 28:11-12)
14:22 Só͘-í, kóng kńg-chi̍h-ōe ê un-sù m̄-sī beh hō͘ sìn-tô͘, sī beh hō͘ bô sìn ê lâng chò kì-hō; thoân hok-im ê un-sù m̄-sī beh hō͘ bô sìn ê lâng, sī beh hō͘ sìn-tô͘ chò kì-hō.
14:23 Choân kàu-hōe chū-hōe ê sî nā lóng kóng kńg-chi̍h-ōe, bô liáu-kái kńg-chi̍h-ōe ê lâng á-.sī bô sìn ê lâng ji̍p-.lâi, kám bē kóng lín sī teh khí-siáu?
14:24 Tāi-ke nā lóng teh thoân hok-im, ū bô sìn-á-.sī bô liáu-kái kńg-chi̍h-ōe ê lâng ji̍p-.lâi, thiaⁿ tio̍h hiahê ōe chiū ē-hiáu-ngō͘ kakī ê chōe,
14:25 Sim lāi ê pì-bi̍t chiū ē hián-lō͘ chhut-.lâi, ē phak lo̍h-khì kèng-pài Siōng-tè, kóng, " Siōng-tè chin-chiàⁿ tī lín tiong-kan! "
14:26 Kàu-hōe ê Tia̍t-sū
Hiaⁿ-tī chí-mōe, ánne tio̍h án-chóaⁿ? Lín chū-hōe ê sî, ū lâng chhiùⁿ Sèng-si, ū lâng kà-sī, ū lâng soan-káng Siōng-tè ê khé-sī, ū lâng kóng kńg-chi̍h-ōe, ū lâng chò hoan-e̍k. Ta̍k hāng tāichì lóng tio̍h ūi tio̍h chō-chiū kàu-hōe lâi chò.
14:27 Nā ū lâng beh kóng kńg-chi̍h-ōe, tio̍h hān-tiāⁿ nn̄g-ê, siōng-chē saⁿ-ê, mā tio̍h chiàu sūn-sū lûn-liû kóng, koh tio̍h ū lâng lâi hoan-e̍k.
14:28 Nā bô lâng thang hoan-e̍k, in tio̍h tiām-tiām, kantaⁿ tùi kakī kah tùi Siōng-tè kóng to̍h hó.
14:29 Tio̍h hō͘ nn̄g-ê á-.sī saⁿ-ê lâi thoân-káng Siōng-tè ê sìn-sit, kî-tha ê lâng tio̍h séng-chhat hiahê sìn-sit.
14:30 Nā chāi-chō ū lâng tit tio̍h Siōng-tè ê khé-sī, hit-ê tng teh kóng ê lâng tio̍h thêng-chí kóng-ōe.
14:31 In-ūi lín ta̍k lâng lóng thang lûn-liû thoân-káng Siōng-tè ê sìn-sit, thang chò-hóe ha̍k-si̍p, hō͘-siong bián-lē.
14:32 Soan-káng Siōng-tè sìn-sit ê lâng, tio̍h ài ē-hiáu iok-sok kakī ê un-sù,
14:33 In-ūi Siōng-tè m̄-sī bô tia̍t-sū ê Siōng-tè, sī ài lán hô-hâi ê Siōng-tè.
14:34 Kah só͘-ū Siōng-tè chú-bîn ê kàu-hōe kāng-khoán, chabó͘ lâng tī kàu-hōe tiong tio̍h tiām-tiām, m̄ thang hoat-giân. Iô-tá-iah lâng ê lu̍t-hoat mā kui-tēng in tio̍h sūn-ho̍k.
14:35 In nā ài beh ha̍k-si̍p siáⁿ-mi̍h, tio̍h tī chhù lāi mn̄g kakī ê tiōng-hu, in-ūi chabó͘ lâng tī kàu-hōe tiong kóng-ōe chin bô sek-ha̍p.
14:36 Siōng-tè ê tō-lí kám sī tùi lín lâi ê? Á-sī kantaⁿ thoân hō͘ lín?
14:37 Nā ū lâng siūⁿ kóng kakī sī thoân-káng Siōng-tè sìn-sit ê lâng á-.sī sio̍k-lêng ê lâng, i eng-kai tio̍h chai góa teh siá hō͘ lín ê sī Chú ê bēng-lēng.
14:38 Nā ū lâng bô kā chit-ê tāichì khòaⁿ-chò iàu-kín, lín mā m̄-bián kā chit-ê lâng khòaⁿ-chò iàu-kín.
14:39 Só͘-í, góa ê hiaⁿ-tī chí-mōe, tio̍h pek-chhiat tui-kiû thoân-káng Siōng-tè sìn-sit ê un-sù, mā m̄ thang kìm-chí lâng kóng kńg-chi̍h-ōe.
14:40 Ta̍k hāng tāichì tio̍h chiàu tia̍t-sū, kui-kui kú-kú lâi chò.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。