哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
10:1 Kéng-kài Pài Ngó͘-siōng
Hiaⁿ-tī chí-mōe, góa ài lín ē kì-tit lán ê chó͘-sian lóng kin-tòe Mô͘-se, tī hûn ê pó-hō͘ chi-hā kòe Âng-hái.
10:2 In tī hûn tiong kah hái-.ni̍h, niá siū sé-lé kui tī Mô͘-se.
10:3 In lóng chia̍h kāng-khoán sio̍k-lêng ê chia̍h-mi̍h, lóng lim kāng-khoán sio̍k-lêng ê chôaⁿ-chúi.
10:4 Chit-ê chôaⁿ-chúi sī tùi kah in tâng kiâⁿ ê hit tè chio̍h-pôaⁿ lâu chhut; hit tè chio̍h-pôaⁿ to̍h-sī Ki-tok.
10:5 M̄ koh, in tiong-kan chin chē lâng hō͘ Siōng-tè bô hoaⁿ-hí, só͘-í lóng siū húi-bia̍t, sin-si tó kah kui khòng-iá.
10:6 Taⁿ chiahê tāichì hō͘ lán chò kàm-kài, kéng-kài lán m̄ thang chhin-chhiūⁿ in ánne ài chò pháiⁿ tāichì.
10:7 Lín m̄ thang chhin-chhiūⁿ in tiong-kan chi̍t-kóa lâng khì pài ngó͘-siōng. Chiàu kì-chài, chèng lâng chē lo̍h-khì chiū tōa lim tōa chia̍h, khiā khí-lâi chiū tian-kông thiàu-bú. (chù, CAG 32:6)
10:8 Lán mā m̄ thang chhin-chhiūⁿ in tiong-kan ū chi̍t-kóa lâng hoān kan-îm, soah chi̍t ji̍t sí nn̄g-bān saⁿ chheng lâng.
10:9 Lán mā m̄ thang chhin-chhiūⁿ in tiong-kan chi̍t-kóa lâng chhì-thàm Chú, soah hō͘ chôa kā-sí.
10:10 Lín mā m̄ thang chhin-chhiūⁿ in tiong-kan chi̍t-kóa lâng nga̍uh-nga̍uh-liām, soah hō͘ chip-hêng húi-bia̍t ê thiⁿ-sài kā in châu-bia̍t.
10:11 In só͘ tú-.tio̍h ê chiahê tāichì thang chò lâng ê kàm-kài, koh ū kì-chài lo̍h-.lâi, thang kéng-kài lán chiahê oa̍h tī boa̍t-sè ê lâng.
10:12 Só͘-í, kakī siūⁿ kóng khiā chāi ê lâng tio̍h kín-sīn, chiah bē poa̍h-tó.
10:13 Lín só͘ tú-.tio̍h ê chhì-thàm, lóng sī lâng tiāⁿtiāⁿ ē tú-.tio̍h ê. Siōng-tè sī sìn-si̍t, I bē hō͘ lín tú tio̍h tam-tng bē khí ê chhì-liān; lín tī siū chhì-liān ê sî, I ē kā lín khui chi̍t tiâu lō͘, hō͘ lín jím-siū ē-tiâu.
10:14 Phiah-bián Pài Ngó͘-siōng Lâi Êng-kng Siōng-tè
Só͘-í, chhin-ài ê hiaⁿ-tī chí-mōe, tio̍h siám-phiah pài ngó͘-siōng ê tāichì.
10:15 Góa kā lín tòng-chò bat chêng-lí ê lâng teh kā lín kóng. Góa só͘ kóng ê ōe, lín tio̍h kakī phòaⁿ-toàn.
10:16 Lán teh lim hit-ê chiok-siā ê poe, kám m̄-sī teh hun-hióng Ki-tok ê hoeh? Lán teh chia̍h hit-ê peh-khui ê piáⁿ, kám m̄-sī teh hun-hióng Ki-tok ê seng-khu?
10:17 In-ūi piáⁿ kantaⁿ chi̍t tè, lán sûi-jiân chin chē lâng, iáu koh sī chi̍t thé, in-ūi lán chò-hóe chia̍h kâng chi̍t tè piáⁿ.
10:18 Ēng chiàu jio̍k-thé ê I-su-la-el lâng chò lē, hiahê chia̍h chè-mi̍h ê lâng kám m̄-sī kah chè-tôaⁿ ū koan-hē?
10:19 Án-ne, góa sī teh kóng siáⁿ-mi̍h? Kám sī teh kóng ngó͘-siōng kah chè-mi̍h ū siáⁿ-mi̍h iàu-kín?
10:20 M̄-sī, góa sī teh kóng gōa-pang lâng só͘ chè ê sī teh chè kúi, m̄-sī teh chè Siōng-tè; góa bô ài lín kah kúi kau-chhap.
10:21 Lín bē tàng lim Chú ê poe mā lim kúi-ê poe; bē tàng chham-ka Chú ê iàn-se̍k koh chham-ka kúi-ê iàn-se̍k.
10:22 Lán sī beh kek Chú siū-khì, sī-.bô? Lán kám ē pí Chú khah kiông?
10:23 Ū lâng kóng, " Ta̍k hāng tāichì lóng thang chò ", chóng-.sī, m̄-sī ta̍k hāng lóng ū lī-ek. Sûi-jiân kóng ta̍k hāng tāichì lóng thang chò, chóng-.sī, bô lóng tùi lâng ū pang-chān.
10:24 M̄-thang kiû kakī ê lī-ek, tio̍h kiû pa̍t lâng ê lī-ek.
10:25 Chhī-tiûⁿ teh bē ê mi̍h lóng thang chia̍h, m̄-bián ūi tio̍h liông-sim ê iân-kò͘ mn̄g-tang mn̄g-sai.
10:26 In-ūi keng-tián ū kóng, tē kah tē-chiūⁿ ê bān-mi̍h lóng sī Chú ê. (chù, SPh 24:1)
10:27 Nā ū bī-sìn-chiá chhiáⁿ lín chia̍h pn̄g, lín nā khì, pâi tī lín bīn-chêng ê mi̍h lóng thang chia̍h. M̄-bián ūi tio̍h liông-sim ê iân-kò͘ lâi mn̄g-tang mn̄g-sai.
10:28 Nā ū lâng kā lín kóng, " Chiahê chia̍h-mi̍h ū chè-kòe ngó͘-siōng. " Án-ne, ūi tio̍h hit-ê kā lín kóng ê lâng kah liông-sim ê iân-kò͘, lín chiū m̄ thang chia̍h.
10:29 Góa só͘ kóng ê sī chí hit-ê lâng ê liông-sim, m̄-sī lín ê liông-sim. Lín bô tiāⁿ tio̍h ē mn̄g kóng, " Góa ê chū-iû ūi siáⁿ-mi̍h tio̍h hō͘ pa̍t lâng ê liông-sim lâi chi-phòe?
10:30 Góa nā ēng kám-un ê sim lâi chia̍h hit-ê chè-kòe ngó͘-siōng ê mi̍h, ná tio̍h hō͘ lâng chí-chek? "
10:31 Só͘-í, lín bô-lūn sī chia̍h sī lim á-.sī chò siáⁿ-mi̍h, lóng eng-kai ūi tio̍h êng-kng Siōng-tè lâi chò.
10:32 Bô-lūn sī tùi Iô-tá-iah lâng, Hi-la̍h lâng á-.sī Siōng-tè ê kàu-hōe, lín lóng m̄ thang chiâⁿ-chò in ê chó͘-gāi.
10:33 Lín tio̍h chiàu góa ê bô͘-iūⁿ khì chò. Ūi tio̍h beh hō͘ chèng lâng hoaⁿ-hí, góa m̄ bat kiû kakī ê lī-ek, lóng sī kiû chèng lâng ê lī-ek, thang hō͘ in tit-kiù.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。