哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
6:1 Bīn-tùi Kàu-hōe Tiong ê Hun-cheng
Lín tiong-kan ū lâng kah lâng ū kiù-hun ê sî, ná ē bô tī sìn-tô͘ ê bīn-chêng kiû kái-koat, khiok kò khì bī-sìn-chiá ê hoat-têng?
6:2 Lín kám m̄-chai sìn-tô͘ beh sím-phòaⁿ sè-kan? Kì-jiân lín beh sím-phòaⁿ sè-kan, kám bē hiáu sím-phòaⁿ sió-khóa ê tāichì?
6:3 Lín kám m̄-chai lán liân thiⁿ-sài to beh sím-phòaⁿ? Chit sè-kan ji̍t-siông ê tāichì koh khah bián-kóng!
6:4 Chit khoán tāichì, lín kám thang kau hō͘ kàu-hōe gōa ê lâng kā lín phòaⁿ-koat?
6:5 Góa ánne kóng sī beh hō͘ lín kám-kak kiàn-siàu. Lín tiong-kan kám bô chi̍t-ê ū tì-hūi ê lâng thang chhâi-koat sìn-tô͘ tiong-kan ê kiù-hun?
6:6 Lín tiong-kan kèng-jiân ū sìn-tô͘ kò sìn-tô͘, sīm-chì kò kàu bī-sìn-chiá ê bīn-chêng.
6:7 Kî-si̍t lín tiong-kan ū sio-kò, í-keng piáu-sī lín ê tōa sit-chhò. Lín ná ē m̄ lêng-khó hō͘ lâng oan-óng? Ná ē m̄ lêng-khó siū khek-khui?
6:8 M̄ koh, lín tian-tò oan-óng lâng, khek-khui lâng, sīm-chì tùi kàu-hōe lāi ê hiaⁿ-tī chí-mōe mā ánne chò.
6:9 Lín kám m̄-chai put-gī ê lâng bē tàng chò Siōng-tè kok-tō͘ ê chú-bîn? M̄-thang khi-phiàn kakī. Bô-lūn sī îm-loān ê, pài ngó͘-siōng ê, hoān kan-îm ê, chò lâm-chhiong ê, hò͘ⁿ lâm-sek ê,
6:10 Chò-chha̍t ê, tham-sim ê, hò͘ⁿ-chiú ê, húi-pòng ê, chà-khi ê, lóng bē tàng chò Siōng-tè kok-tō͘ ê chú-bîn.
6:11 Lín tiong-kan í-chêng ū lâng sī ánne, m̄ koh, óa-khò Chú I-é-su Ki-tok ê miâ kah lán ê Siōng-tè ê Sèng Sîn, lín í-keng sé chheng-khì, chiâⁿ chò sèng-kiat kah Siōng-tè ū hô-hó ê koan-hē.
6:12 Phiah-bián Bô Tō-tek ê Sèng-Koan-hē
Ū lâng kóng, " Ta̍k hāng tāichì góa lóng thang chò. " M̄ koh, m̄-sī ta̍k hāng tāichì lóng ū lī-ek. Góa mā thang kóng, " Ta̍k hāng tāichì góa lóng thang chò. " M̄ koh, góa bô beh hō͘ jīm-hô tāichì kā góa khòng-chè.
6:13 Ū lâng kóng, " Chia̍h sī ūi tio̍h pak-tó͘, pak-tó͘ mā sī ūi tio̍h chia̍h. " Chóng-.sī, Siōng-tè lóng beh kā chit nn̄g hāng húi-hoāi. Seng-khu m̄-sī ūi tio̍h îm-loān, sī ūi tio̍h ho̍k-sāi Chú, Chú mā ē kiong-kip lán seng-khu ê su-iàu.
6:14 Siōng-tè ū hō͘ Chú tùi sí koh-oa̍h, mā ē ēng I ê koân-lêng hō͘ lán koh-oa̍h.
6:15 Lín kám m̄-chai lín ê seng-khu sī Ki-tok ê ki-thé? Án-ne, góa kám thang kā Ki-tok ê ki-thé piàn-chò chhiong-ki ê ki-thé? Choa̍t-tùi m̄ thang.
6:16 Lín kám m̄-chai kah chhiong-ki hoat-seng jio̍k-thé koan-hē, to̍h-sī kah i chiâⁿ-chò chi̍t thé? In-ūi keng-tián ū kóng, nn̄g-ê beh chiâⁿ-chò chi̍t thé. (chù, CSK 2:24)
6:17 To̍k-to̍k kah Chú kiat-ha̍p ê lâng, to̍h-sī sim-sîn kah Chú chiâⁿ-chò chi̍t thé.
6:18 Lín tio̍h siám-phiah îm-loān, lâng bô-lūn hoān siáⁿ-mi̍h chōe lóng bē éng-hióng kakī ê seng-khu, m̄ koh, hoān kan-îm ê sī hoān chōe koh hāi tio̍h kakī ê seng-khu.
6:19 Lín kám m̄-chai lín ê seng-khu to̍h-sī Sèng Sîn ê tiān? Sèng Sîn tiàm tī lín lāi-bīn, to̍h-sī lín tùi Siōng-tè só͘ niá-siū ê. Koh-chài kóng, lín m̄-sī sio̍k kakī, sī sio̍k Siōng-tè;
6:20 In-ūi lín sī I hù-chhut tāi-kè bé-.lâi ê, só͘-í, tio̍h ēng lín ê seng-khu lâi êng-kng Siōng-tè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。