哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 Chhéng-an kah Kám-siā
Góa sī Páu-lô, hōng Siōng-tè ê chí-ì siū-tiàu, chò I-é-su Ki-tok ê sù-tô͘. Góa kah hiaⁿ-tī Só͘-su-siánneh,
1:2 Siá phoe hō͘ tī Ko-lîn-to Siōng-tè ê kàu-hōe, to̍h-sī hiahê tī Ki-tok I-é-su lāi chiâⁿ-sèng, siū-tiàu chiâⁿ-chò sìn-tô͘, í-ki̍p tī ta̍k só͘-chāi teh kiû-kiò lán ê Chú I-é-su Ki-tok ê miâ ê lâng. Ki-tok sī in ê Chú, mā sī lán ê Chú.
1:3 Goān lín tùi lán ê Thiⁿ-pē Siōng-tè kah Chú I-é-su Ki-tok, tit tio̍h un-tián kah pêng-an.
1:4 Tī Ki-tok Ni̍h ê Chiok-hok
Góa tiāⁿtiāⁿ thè lín kám-siā góa ê Siōng-tè, in-ūi Siōng-tè ê un-tián ū thong-kòe I-é-su Ki-tok siúⁿ-sù hō͘ lín.
1:5 Thong-kòe Ki-tok, lín ta̍k hāng tit tio̍h hù-chiok, chhiong-móa ta̍k-khoán ê kháu-châi kah tì-sek.
1:6 Ki-tok ê sìn-sit í-keng tī lín tiong-kan kiàn-li̍p kian-kò͘ ê ki-chhó͘,
1:7 Hō͘ lín teh thèng-hāu lán ê Chú I-é-su Ki-tok ê hián-hiān ê sî, lóng bô khiàm siáⁿ-mi̍h un-sù.
1:8 I mā ē hō͘ lín kian-kò͘, it-ti̍t kàu lán ê Chú I-é-su Ki-tok chài-lîm ê ji̍t-chí, lóng bô thang hō͘ lâng hiâm.
1:9 Siōng-tè sī sìn-si̍t ê, I ho͘-tiàu lín lâi kah I ê Kiáⁿ, lán ê Chú I-é-su Ki-tok kiat-liân.
1:10 Kàu-hōe ê Hun-cheng
Hiaⁿ-tī chí-mōe, taⁿ góa hōng lán ê Chú I-é-su Ki-tok ê miâ khǹg lín, kóng-ōe tio̍h it-tì, m̄ thang ū hun-cheng, tio̍h it-sim it-ì phō kāng-khoán ê bo̍k-phiau lâi thoân-kiat.
1:11 Chhin-ài ê hiaⁿ-tī chí-mōe, Khu-ló-eh chhù lāi ê lâng bat kā góa kóng, lín tiong-kan ū hun-cheng.
1:12 Góa ê ì-sù sī kóng lín ta̍k lâng ū bô kāng-khoán ê kóng-hoat; ū ê kóng, " Góa sio̍k Páu-lô "; ū ê kóng, " Góa sio̍k A-po-lô "; ū ê kóng, " Góa sio̍k Piat-tò͘ ", koh ū ê kóng, " Góa sio̍k Ki-tok. "
1:13 Ki-tok kám ū hō͘ lâng hun-khui? Páu-lô kám ū thè lín tèng si̍p-jī-kè? Lín kám ū hōng Páu-lô ê miâ niá siū sé-lé?
1:14 Kám-siā Siōng-tè, Ku-lí-su-pò͘ kah Gâ-io̍h í-gōa, góa m̄ bat kā lín tiong-kan jīm-hô lâng sé-lé,
1:15 Só͘-í, bô lâng ē-tàng kóng, lín ū hōng góa ê miâ niá siū sé-lé.
1:16 Tio̍h lah, góa mā ū kā Su-tê-hoa-nah chi̍t ke lâng sé-lé, kî-tha ū kā pa̍t lâng sé-lé á-bô, góa khiok bē kì-tit à.
1:17 Ki-tok bô chhe-phài góa lâi kā lâng sé-lé, sī beh lâi thoân hok-im. Góa bô ēng tì-hūi ê giân-sû thoân, chiah bián hō͘ Ki-tok ê si̍p-jī-kè sit-khì ì-gī.
1:18 Lâng ê Tì-hūi kah Si̍p-jī-kè
Si̍p-jī-kè ê tō-lí, hiahê tîm-lûn ê lâng kā i khòaⁿ-chò sī gû-gōng ê; lán chiahê tit-kiù ê lâng, kā i khòaⁿ-chò sī Siōng-tè ê tōa-lêng.
1:19 In-ūi keng-tián ū kì-chài, góa beh siau-bia̍t tì-hūi ê lâng ê tì-hūi, Mā beh khì-sak chhong-bêng ê lâng ê chhong-bêng. (chù, ISI 29:14)
1:20 Án-ne, tì-hūi ê lâng tī tó-ūi? Keng-ha̍k kàu-su tī tó-ūi? Chit sè-kan hò͘ⁿ piān lūn ê lâng tī tó-ūi? Siōng-tè kám m̄-sī í-keng hō͘ sè-kan ê tì-hūi piàn-chò gû-gōng?
1:21 Kì-jiân sè-kan lâng bē tàng ēng in ê tì-hūi lâi jīn-bat Siōng-tè, Siōng-tè chiū ēng I kakī ê tì-hūi, hoaⁿ-hí ēng goán só͘ thoân ê gû-gōng ê sìn-sit, lâi chín-kiù hiahê sìn ê lâng.
1:22 Iô-tá-iah lâng kiû sîn-jiah, Hi-la̍h lâng chhōe tì-hūi;
1:23 M̄ koh, goán sī teh soan-iông tèng si̍p-jī-kè ê Ki-tok. Chit-ê sìn-sit tùi Iô-tá-iah lâng lâi kóng sī chó͘-gāi, tùi gōa-pang lâng lâi kóng sī gû-gōng;
1:24 M̄ koh, tùi Siōng-tè kéng-tiàu ê lâng lâi kóng, bô-lūn sī Iô-tá-iah lâng á-.sī Hi-la̍h lâng, Ki-tok to̍h-sī Siōng-tè ê koân-lêng, sī Siōng-tè ê tì-hūi.
1:25 In-ūi Siōng-tè ê gû-gōng pí lâng khah ū tì-hūi, Siōng-tè ê loán-jio̍k pí lâng khah ióng-chòng.
1:26 Hiaⁿ-tī chí-mōe, tio̍h ē kì-tit lín siū-tiàu ê sî, chiàu sè-kan it-poaⁿ ê phiau-chún, lín bô kúi-ê lâng ū tì-hūi, bô kúi-ê lâng ū lêng-le̍k, bô kúi-ê lâng sio̍k siōng-liû kai-kip.
1:27 M̄ koh, Siōng-tè ēng sè-kan lâng khòaⁿ-chò gōng ê, lâi hō͘ tì-hūi ê lâng kiàn-siàu, mā ēng sè-kan lâng khòaⁿ-chò loán-jio̍k ê, lâi hō͘ ióng-chòng ê lâng kiàn-siàu;
1:28 I koh ēng sè-kan lâng só͘ khin-sī, só͘ hō͘ lâng khòaⁿ-bē khí á-.sī bô lō͘-ēng ê, lâi hùi bô lâng só͘ khòaⁿ-tiōng ê.
1:29 Án-ne, sè-kan chiū bô lâng ē-tàng tī Siōng-tè ê bīn-chêng khoa-kháu.
1:30 Siōng-tè hō͘ lín kah Ki-tok I-é-su kiat-liân, hō͘ Ki-tok chiâⁿ-chò lán tùi Siōng-tè lâi ê tì-hūi, koh hō͘ lán kah Siōng-tè hô-hó, chiâⁿ-chò Siōng-tè sèng-kiat ê chú-bîn, iū-koh hō͘ lán tit tio̍h kiù-sio̍k.
1:31 Só͘-í, chiàu keng-tián só͘ kì-chài, Ài-beh khoa-kháu ê lâng, tio̍h ēng Chú lâi chò khoa-kháu. (chù, ILM 9:24)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。