羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
11:1 I-su-la-el Lâng kah Siōng-tè ê Sìn-si̍t
Án-ne, góa beh mn̄g lín, Siōng-tè kám ū khì-sak I ê chú-bîn? Choa̍t-tùi bô! In-ūi góa mā sī I-su-la-el lâng, sī A-bu-la-hàm ê kiáⁿ-sun, sio̍k Biān-iá-mín chi-cho̍k.
11:2 Siōng-tè m̄ bat pàng-sak I chá to̍h kéng-soán ê chú-bîn. Lín kám m̄-chai keng-tián ū kì-chài koan-hē E-li-iah tùi Siōng-tè khòng-kò I-su-la-el lâng ê tāichì?
11:3 I kóng, Chú ah, in thâi-sí Lí ê sian-ti, thiah-húi Lí ê chè-tôaⁿ, chí ū chhun góa tī-.leh, in mā teh siàu-siūⁿ góa ê sèⁿ-miā. （ Chù, LOS 19:10, 14)
11:4 Chóng-.sī, Siōng-tè án-chóaⁿ ìn-tap? I ánne kóng, góa ū ūi tio̍h kakī lâu chhit-chheng-ê m̄ bat kūi-pài Ba-al ê lâng. (chù, LOS 19:18)
11:5 Chit-má mā sī ánne; Siōng-tè ū lâu chi̍t-kóa ēng un-tián kéng-soán ê lâng.
11:6 Kì-jiân sī Siōng-tè ê un-tián, chiū m̄-sī chiàu lâng ê hêng-ûi; un-tián nā-sī chiàu lâng ê hêng-ûi, hit-ê un-tián chiū m̄-sī kiò-chò un-tián.
11:7 Án-ne, kiat-kio̍k án-chóaⁿ? I-su-la-el lâng bô tit tio̍h in teh tui-kiû ê, chí ū Siōng-tè kéng-soán ê chi̍t-kóa lâng ū tit tio̍h, kî-tha ê lâng sim ngē m̄-thiaⁿ.
11:8 Chiàu keng-tián só͘ kì-chài, Siōng-tè hō͘ in ê sim-sîn bâ-pì, ba̍k-chiu bô khòaⁿ-kìⁿ, hīⁿ-khang bô thiaⁿ-kìⁿ, it-ti̍t kàu kin-á-ji̍t. （ Chù, SBK 29:4; ISI 29:10)
11:9 Ta-bi̍t mā kóng, Tio̍h hō͘ in ê iàn-hē piàn-sêng in ê hām-kheⁿ, lô-bāng, hō͘ in poa̍h-tó, lâi chò in ê pò-èng.
11:10 Tio̍h hō͘ in ê ba̍k-chiu hoe, bē tàng khòaⁿ-kìⁿ. Tio̍h hō͘ in ê kha-chiah-phiaⁿ éng-oán khiau-ku. （ Chù, SPh 69:22-23)
11:11 Án-ne, góa beh mn̄g, I-su-la-el lâng poa̍h-tó, kám lóng peh bē khí-.lâi? Choa̍t-tùi ē! In-ūi in ê hoān chōe, chín-kiù soah lîm-kàu gōa-pang lâng, tian-tò ē kek-khí in ê chi̍t-tò͘.
11:12 I-su-la-el lâng ê hoān chōe ē hō͘ sè-kan lâng tit tio̍h hong-sēng ê chiok-hok, in ê soe-thè mā ē hō͘ gōa-pang lâng tit tio̍h hù-chiok. Án-ne, nā-sī só͘-ū ê I-su-la-el lâng lóng kui-ǹg Siōng-tè, hit-ê chiok-hok kám m̄-sī ē koh khah tōa!
11:13 Siōng-tè Chín-kiù Gōa-pang-Lâng
Góa sī tùi lín gōa-pang lâng teh kóng ōe, in-ūi góa sī gōa-pang lâng ê sù-tô͘, góa tùi góa ê soan-kàu chit-hūn kám-kak chin kong-êng.
11:14 Kiám-chhái góa ē kek-khí góa ê tông-pau ê chi̍t-tò͘, thang kiù in tiong-kan ê chi̍t-kóa lâng.
11:15 I-su-la-el lâng ê siū khì-sak nā ē hō͘ sè-kan lâng kah Siōng-tè hô-hó, ánne, in koh siū chiap-la̍p ê sî, kám m̄-sī chhin-chhiūⁿ tùi sí koh-oa̍h?
11:16 Thâu chi̍t tè mī-hún-chhè nā sèng-pia̍t hiàn hō͘ Siōng-tè, kui-sn̂g mī-hún mā lóng ē sèng-kiat; chhiū-kin nā sèng-pia̍t hiàn hō͘ Siōng-tè, liân chhiū-ki mā lóng ē sèng-kiat.
11:17 Lín sûi-jiân sī iá-seng ê kaⁿ-ná chhiū ê chhiū-ki, nā chiap-ki tī siū chai-pôe ê kaⁿ-ná chhiū, lâi tāi-thè chi̍t-kóa at-tn̄g ê, chiū ē-tàng tùi kâng hit-châng chhiū-kin hun-hióng hong-hù ê êng-ióng-hun.
11:18 Só͘-í, lín m̄ thang tùi hiahê at-tn̄g ê chhiū-ki khoa-kháu, siūⁿ kóng lín pí in khah hó. Lín nā beh khoa-kháu, tio̍h ē kì-tit, sī lín óa-khò chhiū-kin teh oa̍h, m̄-sī chhiū-kin óa-khò lín teh oa̍h.
11:19 Lí kiámchhái ē kóng, " Chhiū-ki chián khí-.lâi, sī ūi tio̍h beh hō͘ góa ē-tàng chiap lo̍h-.khì. "
11:20 Bô m̄ tio̍h, in-ūi in m̄-sìn chiah hō͘ lâng chián khí-.lâi, lín sī in-ūi ū sìn chiah khiā ē tiâu. M̄ koh, lín m̄ thang kiau-ngō͘, tian-tò tio̍h kiaⁿ-hiâⁿ.
11:21 In-ūi Siōng-tè nā bô kā chū-jiân seⁿ chhut-.lâi ê chhiū-ki lâu lo̍h-.lâi, khó-lêng mā bô it-tēng ē kā lín lâu lo̍h-.lâi.
11:22 Án-ne, lán tio̍h chai Siōng-tè sī chû-ài koh giâm-keh, tùi tūi-lo̍h ê lâng chin giâm keh, m̄ koh, lín nā kè-sio̍k óa-khò I ê chû-ài, I chiū ē tùi lín chû-ài; nā bô, I mā ē kā lín chián khí-.lâi.
11:23 Hiahê siū chián ê I-su-la-el lâng nā bô koh kò͘-chi̍p m̄-sìn, mā ē koh hông chiap tò tńg-khì goân-lâi hit-châng chhiū, in-ūi Siōng-tè ū koân-lêng kā in chiap tò tńg-.khì.
11:24 Lín chiahê tùi iá-seng kaⁿ-ná chhiū chián khí-.lâi ê chhiū-ki to ē-tàng chiap tī bô kāng pún-sèng siū chai-pôe ê kaⁿ-ná chhiū, hô-hòng sī hiahê goân-lâi ê chhiū-ki, kám bē koh khah hó chiap tò tńg-.khì?
11:25 Siōng-tè Liân-bín Choân Jîn-lūi
Hiaⁿ-tī chí-mōe, góa ài lín chai chit-ê ò-pì, bián-tit lín kakī lia̍h-chò ū tì-hūi. Chit-ê ò-pì to̍h-sī, chi̍t-pō͘-hūn ê I-su-la-el lâng chiām-sî ngē-sim, thèng-hāu kàu gōa-pang lâng choân-pō͘ kui Chú ûi-chí;
11:26 Án-ne, só͘-ū ê I-su-la-el lâng lóng ē tit kiù. Chiàu kì-chài, Kiù-chú ē tùi Si-óng chhut-.lâi, kā Iâ-kop ê put-gī tû-.khì.
11:27 Hit sî, góa ē sià-bián in ê chōe, che sī góa kah in só͘ li̍p ê iok. （ Chù, ISI 59:20-21; 27:9; ILM 31:33-34)
11:28 Tùi hok-im ê koan-tiám lâi khòaⁿ, in-ūi lín ū chiap-siū, in khiok kī-choa̍t, só͘-í, in chiâⁿ-chò Siōng-tè ê tùi-te̍k; tùi siū kéng-soán ê koan-tiám lâi khòaⁿ, in-ūi Siōng-tè tài-liām tùi in chó͘-sian ê èng-ín, só͘-í, in chiâⁿ-chò Siōng-tè só͘ thiàⁿ ê lâng.
11:29 In-ūi Siōng-tè ê un-sù kah kéng-soán bē kái-piàn.
11:30 Lín gōa-pang lâng kòe-khì bô sūn-ho̍k Siōng-tè, m̄ koh, chitmá khiok in-ūi I-su-la-el lâng bô sūn-ho̍k, lín chiah tit tio̍h Siōng-tè ê liân-bín.
11:31 Chhin-chhiūⁿ ánne, in-ūi lín ū tit tio̍h liân-bín, I-su-la-el lâng chitmá bô sūn-ho̍k Siōng-tè, sī ūi tio̍h beh hō͘ in mā tit tio̍h liân-bín.
11:32 Siōng-tè pàng só͘-ū ê lâng lóng tī bô sūn-ho̍k ê chōng-thāi, sī ūi tio̍h beh liân-bín só͘-ū ê lâng.
11:33 Kui Êng-kng hō͘ Siōng-tè
Siōng-tè ê tì-hūi hui-siông chhim-tîm, tì-sek hui-siông hong-hù! I ê phòaⁿ-toàn oh-tit thui-chhek, I ê tō-lō͘ oh-tit chhōe-.tio̍h!
11:34 Siáⁿ lâng chai Chú ê sim-ì? Siáⁿ lâng ē-tàng thè I chhut chú-ì? (chù, ISI 43:13)
11:35 Siáⁿ lâng bat sàng lé-mi̍h hō͘ Siōng-tè lâi tit tio̍h pò-tap? (chù, IPK 41:11)
11:36 In-ūi bān-mi̍h lóng sī tùi I hia lâi, koh óa-khò I, ūi tio̍h I lâi oa̍h. Goān I tit tio̍h êng-kng, ti̍t-kàu éng-oán. A-men!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。