羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
9:1 I-su-la-el Bī-sìn-chiá ê Kè-bô͘
Góa chò chi̍t-ê sio̍k Ki-tok ê lâng, kóng-ōe si̍t-chāi bô pe̍h-chha̍t, góa ê liông-sim siū Sèng Sîn kám-tōng, mā kā góa chò kiàn-chèng.
9:2 Góa hui-siông pi-siong, sim-lāi thòng-khó͘ bô soah.
9:3 Góa koan-sim góa ê tông-pau, góa ê kut-jio̍k chì-chhin. Nā-sī ūi tio̍h in, góa tio̍h siū Siōng-tè chiù-chó͘ pàng-sak, tio̍h kah Ki-tok keh-lī, góa mā kam-goān.
9:4 In sī I-su-la-el bîn-cho̍k; Siōng-tè kéng-soán in chò kiáⁿ-jî, sù in êng-kng kah in li̍p-iok, koh hō͘ in lu̍t-hoat, chông-pài ê lé-gî kah èng-ín.
9:5 In sī kok cho̍k-tiúⁿ ê kiáⁿ-sun, chiàu hiat-thóng-lâi kóng, Ki-tok mā kah in kâng cho̍k. Goān chhiau-oa̍t bān-mi̍h ê Siōng-tè, tit tio̍h oló kàu bān-sè-tāi. A-men!
9:6 I-su-la-el Lâng kah Siōng-tè ê Soán-te̍k
Án-ne m̄-sī kóng Siōng-tè ê èng-ín bô si̍t-hiān, in-ūi m̄-sī só͘-ū ê I-su-la-el lâng lóng sī Siōng-tè ê soán-bîn;
9:7 A-bu-la-hàm ê kiáⁿ-sun, mā bô lóng sī èng-ín ê kiáⁿ-jî. Siōng-tè bat tùi A-bu-la-hàm kóng, Tùi Í-sak seⁿ ê chiah ē-tàng kiò-chò lí ê kiáⁿ-sun. （ Chù, CSK 21:12)
9:8 Án-ne sī kóng, tùi jio̍k-thé seⁿ ê kiáⁿ bô lóng sǹg sī Siōng-tè ê kiáⁿ-jî, chí ū tùi Siōng-tè ê èng-ín seⁿ ê chiah sǹg-chò sī Siōng-tè ê kiáⁿ-sun.
9:9 In-ūi èng-ín ê ōe sī ánne kóng, mê-nî chit-ê sî, góa ē koh lâi, Sa-la̍h ē seⁿ chi̍t-ê chapo͘ kiáⁿ. （ Chù, CSK 18:10, 14)
9:10 M̄-nā ánne, Li-bé-kah seⁿ ê nn̄g-ê kiáⁿ mā sī tùi kāng chi̍t-ê lâng, to̍h-sī lán ê chó͘-sian Í-sak lâi hoâi-īn.
9:11 Siōng-tè ūi tio̍h beh piáu-bêng I kéng-soán lâng sī chiàu I pún-sin tiāⁿ tio̍h ê bo̍k-tek, m̄-sī kin-kì lâng ê hêng-ûi, chiū tī chi̍t tùi siang-seⁿ-á-kiáⁿ iáu-bōe chhut-sì, iáu-bōe chò hó sū á-.sī pháiⁿ tāi í-chêng,
9:12 Chiū kā Li-bé-kah kóng, " Tōa-hàn ê ē ho̍k-sāi sè-hàn ê. " (chù, CSK 25: 23)
9:13 Chiàu kì-chài, góa kah-ì Iâ-kop, bô kah-ì E-sáu. (chù, MLK 1:2-3)
9:14 Án-ne, lán beh án-chóaⁿ kóng? Siōng-tè bô kong-tō, sī-.bô? Choa̍t-tùi m̄-sī.
9:15 In-ūi I bat tùi Mô͘-se kóng, " Góa beh liân-bín góa ài liân-bín ê lâng, góa beh thé-thiap góa ài thé-thiap ê lâng. "（ Chù, CAG 33:19)
9:16 Khó-kiàn Siōng-tè ê kéng-soán sī kin-kì I ê liân-bín, m̄-sī kin-kì lâng ê ì-goān á-.sī ló͘-le̍k.
9:17 Ū kì-chài, Siōng-tè tùi Hôa-láu kóng, " Góa siat-li̍p lí ê bo̍k-tek, sī beh ēng lí lâi hián-bêng góa ê koân-lêng, hō͘ góa ê miâ thoân kàu choân sè-kài. "（ Chù, CAG 9: 16)
9:18 Só͘-í, Siōng-tè beh liân-bín siáⁿ-mi̍h lâng, chiū liân-bín siáⁿ-mi̍h lâng; beh hō͘ siáⁿ-mi̍h lâng sim ngē, chiū hō͘ siáⁿ-mi̍h lâng sim ngē.
9:19 Siōng-tè ê Siū-khì kah Liân-bín
Án-ne, lí ē mn̄g góa kóng, " Siōng-tè ná ē iáu teh chek-pī lâng? Siáⁿ lâng káⁿ hoán-khòng I ê chí-ì? "
9:20 Lí chit-ê lâng sǹg siáⁿ-mi̍h, lí káⁿ kah Siōng-tè tú chhùi? Siū-chō-bu̍t kám ē tùi chhòng-chō chiá kóng, Lí ná ē kā góa chō kah ánne? （ Chù, ISI 29:16; 45:9)
9:21 Pêⁿ-pêⁿ chi̍t tè liâm-thô͘, kám m̄-sī chhut-chāi sio-hûi sai-hū beh kā i lia̍p chò kùi-khì ê khì-kū á-.sī chi̍t tè chho͘-sio̍k ê khì-kū?
9:22 Siōng-tè só͘ chò ê mā chhin-chhiūⁿ ánne. I sûi-jiân ē-tàng sûi-sî chiàu I ê ì-sù hián-bêng I ê siū-khì, hō͘ lâng chai I ê koân-lêng, I iû-goân tōa-tōa khoan-iông jím-nāi hiahê jiá I siū-khì ê lâng, to̍h-sī hiahê eng-kai bia̍t-bông ê lâng.
9:23 Che sī ūi tio̍h beh hō͘ lâng bêng-pe̍k, Siōng-tè beh siúⁿ-sù hong-sēng ê êng-iāu, hō͘ hiahê tit tio̍h liân-bín ê lâng, to̍h-sī Siōng-tè só͘ ī-tēng, beh lâi niá-siū I ê êng-kng ê hiahê lâng.
9:24 Lán lóng sī Siōng-tè ho͘-tiàu ê lâng, I m̄ nā tùi Iô-tá-iah lâng, mā tùi gōa-pang lâng ho͘-tiàu.
9:25 Chiàu I tī Hô-se-a su só͘ kóng, Chiahê m̄-sī Góa ê chú-bîn ê, góa beh chheng in chò " Góa ê chú-bîn "; Hiahê m̄-sī góa só͘ ài ê, góa beh chheng in chò " Góa só͘ ài ê". (chù, HSA 2:23)
9:26 Tī khah chá bat kā in kóng " Lín m̄-sī Góa ê chú-bîn "ê só͘-chāi, kāng-khoán tī hia in beh hông kiò-chò " Éng-oán-oa̍h ê Siōng-tè ê kiáⁿ". （ Chù, HSA 1:10)
9:27 Koan-hē I-su-la-el lâng, I-sá-iah bat soan-pò͘ kóng, I-su-la-el ê kiáⁿ-sun, sûi-jiân sò͘-bo̍k chhin-chhiūⁿ hái soa hiahni̍h chē, ē tit tio̍h kiù ê sī só͘ chhun lo̍h-.lâi ê chió-sò͘ niā-niā.
9:28 In-ūi Chú tī tē-chiūⁿ beh chin kín koh thiat-té lâi chip-hêng sím-phòaⁿ. （ Chù, ISI 10:22-23 LXX)
9:29 Tú chhin-chhiūⁿ I-sá-iah bat kóng, nā m̄-sī bān-kun ê Chú kā lán lâu chi̍t-kóa kiáⁿ-sun chò chéng, lán chá to̍h chhin-chhiūⁿ So͘-tóm kah Am-mo͘-la̍h siū húi-bia̍t ā. （ Chù, ISI 1:9)
9:30 I-su-la-el Lâng kah Hok-im
Án-ne, lán beh án-chóaⁿ kóng? Gōa-pang lâng bô tui-kiû kah Siōng-tè ê hô-hó koan-hē, tian-tò thong-kòe sìn lâi tit tio̍h kah Siōng-tè ê hô-hó koan-hē.
9:31 M̄ koh, I-su-la-el lâng phah-piàⁿ tui-kiû, siūⁿ beh tùi lu̍t-hoat lâi kah Siōng-tè ū hô-hó ê koan-hē, kiat-kó mā bô tit tio̍h.
9:32 Ná ē ánne? In-ūi in bô tùi sìn, sī tùi óa-khò in ê hêng-ûi. In ê kiat-kio̍k sī khì that tio̍h hit tè hō͘ lâng poa̍h-tó ê chio̍h-thâu.
9:33 Keng-tián ū ánne kì-chài, lí khòaⁿ, góa kā ē hō͘ lâng that tio̍h ê chio̍h, ē hō͘ lâng poa̍h-tó ê tōa chio̍h, khǹg tī Si-óng; kiàn-nā sìn-khò I ê lâng bē tú-tioh sit-bōng. （ Chù, ISI 28:16; 8:14)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。