羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
6:1 Lán tī Ki-tok Lāi-bīn ê Seng-oa̍h
Án-ne, lán tio̍h án-chóaⁿ kóng? Lán kám thang kè-sio̍k tī chōe-ok tiong seng-oa̍h, lâi hō͘ un-tián koh khah ke-thiⁿ?
6:2 Choa̍t-tùi m̄ thang! Lán í-keng kah chōe-ok toān-choa̍t koan-hē, kám thang kè-sio̍k tī chōe-ok tiong seng-oa̍h?
6:3 Lín kám m̄-chai lán lóng ū niá siū sé-lé lâi kah Ki-tok I-é-su kiat-ha̍p, to̍h-sī niá siū sé-lé lâi kah I chò-hóe sí?
6:4 Thong-kòe sé-lé, lán kah Ki-tok tâng-chê sí, tâng-chê siū bâi-chòng; ná chhin-chhiūⁿ Ki-tok thong-kòe Thiⁿ-pē êng-kng ê koân-lêng tùi sí koh-oa̍h, lán mā ē-tàng kòe sin ê seng-oa̍h.
6:5 Lán kì-jiân kah Ki-tok chiâⁿ-chò chi̍t thé lâi thé-giām sí, lán it-tēng mā ē kah I kiat-liân chiâⁿ-chò chi̍t thé lâi koh-oa̍h.
6:6 Lán chai, lán kū ê chū-ngó͘ í-keng kah Ki-tok chò-hóe tèng si̍p-jī-kè, sī beh hō͘ lán chāi lâi siū chōe sok-pa̍k ê hit-ê chū-ngó͘ húi-bia̍t, hō͘ lán bô koh chò chōe ê lô͘-lē.
6:7 In-ūi lâng it-tān sí-.khì, chiū tùi chōe tit tio̍h tháu-pàng.
6:8 Lán kì-jiân kah Ki-tok chò-hóe sí, siong-sìn lán mā ē kah I chò-hóe koh-oa̍h.
6:9 Lán chai Ki-tok í-keng tùi sí koh-oa̍h, I bē koh sí, sí bô koh kā I koán-hat.
6:10 In-ūi Ki-tok sí chi̍t pái chiū kah chōe oân-choân toān-choa̍t koan-hē; I chitmá oa̍h-.leh, sī ūi tio̍h Siōng-tè teh oa̍h.
6:11 Án-ne, lín mā tio̍h khòaⁿ kakī í-keng kah chōe toān-choa̍t koan-hē, chitmá kah Ki-tok I-é-su kiat-liân, ūi tio̍h Siōng-tè teh oa̍h.
6:12 Só͘-í, m̄ thang koh kā ē sí ê seng-khu kau hō͘ chōe chi-phòe, khì sūn-ho̍k jio̍k-thé ê io̍k-bōng.
6:13 Mā m̄ thang kā seng-khu ê ki-thé, kau hō͘ chōe khì chò put-gī ê kang-kū, tian-tò tio̍h chò chi̍t-ê tùi sí koh-oa̍h ê lâng, kā seng-khu hiàn hō͘ Siōng-tè, kā seng-khu ê kok ki-thé, hiàn hō͘ Siōng-tè chò gī ê kang-kū.
6:14 M̄-thang hō͘ chōe kā lín chi-phòe, in-ūi lín m̄-sī oa̍h tī lu̍t-hoat ē-bīn, sī oa̍h tī un-tián ē bīn.
6:15 Chōe Tit tio̍h Sià-bián
Án-ne, lán kì-jiân m̄-sī oa̍h tī lu̍t-hoat ē-bīn, sī tī un-tián ē bīn, chiū thang hoān chōe, sī-.bô? Choa̍t-tùi m̄-sī!
6:16 Lín kám m̄-chai, lín nā kā kakī kau hō͘ bó͘-chi̍t-lâng chò lô͘-lē lâi sūn-ho̍k i, lín to̍h-sī hit-ê lâng ê lô͘-lē? Án-ne kóng-khí-.lâi, lín sī beh chò chōe ê lô͘-lē lâi kiâⁿ-ji̍p sí-bông, á-.sī beh chò Siōng-tè ê lô͘-po̍k lâi sūn-ho̍k I, kiat-kó kah I ū hô-hó ê koan-hē?
6:17 Kám-siā Siōng-tè! Lín sûi-jiân bat chò chōe ê lô͘-lē, chitmá lín í-keng choân-sim sūn-ho̍k hit-ê thoân-siū hō͘ lín chò kui-hoān ê kà-sī.
6:18 Lín í-keng tùi chōe tit tio̍h tháu-pàng, lâi chiâⁿ-chò gī ê lô͘-lē.
6:19 Góa khióng-kiaⁿ lín bē liáu-kái, só͘-í, ēng it-poaⁿ lâng ē-tàng liáu-kái ê ōe kā lín soat-bêng. Lín í-chêng kā seng-khu oân-choân kau hō͘ ù-òe kah put-hoat chò lô͘-lē, tì-sú put-hoat ê tāichì jú lâi jú ke-thiⁿ. Chit-má lín tio̍h kā seng-khu oân-choân hiàn hō͘ gī chò sèng-kiat ê lō͘-ēng.
6:20 Lín chò chōe-ok ê lô͘-lē ê sî-chūn, lín bô siū gī ê sok-pa̍k.
6:21 Hit sî, lín chò chitmá khòaⁿ-chò kiàn-siàu ê tāichì, kiat-kó án-chóaⁿ? Kiat-kio̍k sī sí!
6:22 Taⁿ lín í-keng tùi chōe tit tio̍h tháu-pàng, chiâⁿ-chò Siōng-tè ê lô͘-po̍k, kiat-kó sī chiâⁿ chò sèng-kiat, kiat-kio̍k sī éng-oán ê oa̍h-miā.
6:23 In-ūi chōe ê tāi-kè sī sí; m̄ koh, Siōng-tè thong-kòe Chú Ki-tok I-é-su, pe̍h-pe̍h sù hō͘ lán ê un-tián sī éng-oán ê oa̍h-miā.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。