羅馬書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Án-ne kóng-khí-.lâi, chò Iô-tá-iah lâng ū siáⁿ-mi̍h iu-tiám? Siū kat-lé ū siáⁿ-mi̍h lī-ek?
3:2 Tī ta̍k hong-bīn lóng ū chin chē hó-chhù. Thâu chi̍t hāng, to̍h-sī Siōng-tè ū kā I ê ōe kau-thok in.
3:3 In tiong-kan nā ū lâng bô sìn-si̍t, in ê bô sìn-si̍t kám ē hō͘ Siōng-tè ê ē piàn-chò bô sìn-si̍t?
3:4 Choa̍t-tùi bē! Sīm-chì só͘-ū ê lâng lóng pe̍h-chha̍t, Siōng-tè mā it-tēng sī chin-si̍t ê. Chiàu keng-tián só͘ kì-chài, tì-sú Lí kóng-ōe ê sî hián-bêng chò gī, phòaⁿ-toàn ê sî hián-bêng kong-tō. （ Chù, SPh 51:4)
3:5 Taⁿ góa chiàu sè-kan lâng ê siūⁿ-hoat lâng kóng, lán ê put-gī nā hián-bêng Siōng-tè ê gī, lán ē-tàng kóng siáⁿ-mi̍h lè? Siōng-tè tùi lán siū-khì, I kám sǹg sī put-gī?
3:6 Choa̍t-tùi m̄-sī! Siōng-tè nā m̄-sī kong-gī ê, I ná ē-tàng sím-phòaⁿ sè-kan?
3:7 Góa ê hi-ké kah bô láu-si̍t nā ē-tàng hō͘ Siōng-tè ê chin-si̍t koh khah bêng-hián, hō͘ I koh khah ū êng-kng, góa ná ē iáu koh hō͘ I soan-phòaⁿ chò chōe-jîn?
3:8 Án-ne, ná ē m̄-kóng, lán lâi chò pháiⁿ, thang hō͘ hó tāichì hián-bêng? Khak-si̍t ū lâng kóng goán ū ánne kóng, lâi kā goán tiòng-siong, chit khoán lâng eng-kai siū chek-hoa̍t.
3:9 Sè-kan Bô Gī-Lâng
Án-ne, lán Iô-tá-iah lâng kám ū pí gōa-pang lâng khah iu-siù? Bô, chi̍t-tiám-tiám-á to bô! In-ūi goán í-keng ū kóng kòe, Iô-tá-iah lâng kah gōa-pang lâng lóng siū chōe ê koán-hat.
3:10 Chiàu keng-tián só͘ kì-chài, Lóng bô gī lâng, liân chi̍t-ê to bô!
3:11 Bô lâng bêng-pe̍k sī-hui, mā bô lâng cháu-chhōe Siōng-tè.
3:12 Lâng-lâng lī-khui chiàⁿ lō͘, lóng kiâⁿ bê-lō͘; lóng bô lâng chò hó, liân chi̍t-ê to bô. (chù, SPh 14:1-3)
3:13 In ê nâ-âu chhin-chhiūⁿ khui-khui ê bōng, in ê chhùi-chi̍h khi-chà lâng, in ê chhùi-tûn ū chôa ê to̍k. (chù, SPh 5:9)
3:14 In ê chhùi lāi chhiong-móa ok-to̍k ê chiù-chó͘. (chù, SPh 10:7)
3:15 In cháu chin kín, kip-beh thâi lâng;
3:16 In keng-kòe ê lō͘ ū húi-bia̍t kah pi-chhám.
3:17 In m̄-chai ū pêng-an ê lō͘. (chù, ISI 59:7-8)
3:18 In gán-tiong bô kèng-ùi Siōng-tè. （ Chù, SPh 36:1)
3:19 Taⁿ lán chai, lu̍t-hoat it-chhè ê iau-kiû sī tùi hiahê siū lu̍t-hoat koán-hat ê lâng teh kóng ê, sī beh hō͘ lâng bē tàng piān-kái, hō͘ choân sè-kài ê lâng lóng siū Siōng-tè ê sím-phòaⁿ.
3:20 Só͘-í, bô lâng ē-tàng khò chun-siú lu̍t-hoat lâi hō͘ Siōng-tè khòaⁿ-chò sī gī lâng. Lu̍t-hoat kantaⁿ sī beh hō͘ lâng chai-iáⁿ siáⁿ-mi̍h sī chōe.
3:21 Thong-kòe Sìn-gióng Lâi kah Siōng-tè Hô-hó
Taⁿ Siōng-tè í-keng kā lán chí-sī, lán m̄-bián khò lu̍t-hoat chiū ē-tàng kah I kiàn-li̍p hô-hó ê koan-hē. Lu̍t-hoat kah sian-ti mā lóng ū ūi tio̍h chit-hāng tāichì chò kiàn-chèng.
3:22 Kah Siōng-tè ū hô-hó ê koan-hē sī thong-kòe sìn I-é-su Ki-tok; Siōng-tè hō͘ só͘-ū sìn ê lâng lóng kāng-khoán tit tio̍h chit-ê hô-hó ê koan-hē.
3:23 In-ūi só͘-ū ê lâng lóng hoān chōe, tì-sú bē tàng niá-siū Siōng-tè ê êng-kng.
3:24 In-ūi Siōng-tè bô tiâu-kiāⁿ ê un-sù, hō͘ lâng ē-tàng thong-kòe Ki-tok I-é-su só͘ oân-sêng ê kiù-sio̍k, lâi tit tio̍h kah Siōng-tè ū hô-hó ê koan-hē.
3:25 Siōng-tè hi-seng Ki-tok chò sio̍k-chōe ê chè-phín, ēng I ê hoeh hō͘ sìn I ê lâng ê chōe tit tio̍h sià-bián; Siōng-tè khoan-iông lâng, bô tui-kiù lâng kòe-khì só͘ hoān ê chōe.
3:26 Chit-má, Siōng-tè hō͘ só͘-ū sìn I-é-su ê lâng kah I ū hô-hó ê koan-hē, ēng ánne lâi hián-bêng I ê kong-gī.
3:27 Nā ánne, lán iáu ū siáⁿ-mi̍h thang khoa-kháu? Lóng bô! Lán tio̍h khò siáⁿ-mi̍h hoat-chek? Khò hêng-ûi, sī-.bô? M̄-sī, sī khò sìn-sim!
3:28 Só͘-í, lán ê kiat-lūn sī, lâng ē-tàng kah Siōng-tè kiàn-li̍p hô-hó ê koan-hē, m̄-sī khò chun-siú lu̍t-hoat, sī khò sìn chiah ē-tàng tit tio̍h.
3:29 Siōng-tè kám kantaⁿ sī Iô-tá-iah lâng ê Siōng-tè? I mā sī gōa-pang lâng ê Siōng-tè, kám m̄-sī? Tong-jiân sī, I mā sī gōa-pang lâng ê Siōng-tè.
3:30 Kì-jiân Siōng-tè chí ū chi̍t ūi, I hō͘ siū kat-lé ê kah bô siū kat-lé ê, lóng kāng-khoán tùi sìn lâi tit tio̍h kah I ū hô-hó ê koan-hē.
3:31 Án-ne, lán kám ē in-ūi chit-ê sìn soah hō͘ lu̍t-hoat sit-khì kong-hāu? Tong-jiân bē! Lán tian-tò ē khak-li̍p lu̍t-hoat.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。