使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
28:1 Páu-lô tī Mel-thah Tó
Goán chiūⁿ hōaⁿ liáu-āu chiah chai iáⁿ, hit-ê tó-sū miâ kiò-chò Mel-thah (chù, hiān-kim kiò-chò Mel-thah, Eng-gí miâ: Malta).
28:2 Tong-tē ê goân-chū-bîn chin chhin-chhiat khoán-thāi goán. In-ūi lo̍h hō͘ koh kôaⁿ, in chiū khí hóe kā goán chiap-thāi.
28:3 Páu-lô khioh chi̍t pé chhâ hiat lo̍h-khì hóe-.ni̍h, in-ūi hóe-jia̍t, ū to̍k-chôa chông chhut-.lâi, tîⁿ tiâu tī i ê chhiú.
28:4 Goân-chū-bîn khòaⁿ tio̍h hit bóe to̍k-chôa tiâu tī i ê chhiú, chiū chò-hóe kóng, " Chit-ê lâng it-tēng sī hiong-chhiú, sûi-jiân tùi hái-.ni̍h khioh tio̍h miā, thian-lí bē iông-ín i oa̍h. "
28:5 Páu-lô kā to̍k-chôa hiat lo̍h-khì hóe-.ni̍h, i lóng bô siū-siong.
28:6 Goân-chū-bîn lóng teh thèng-hāu i ê chhiú chéng khí-.lâi, á-.sī hut-jiân-kan tó lo̍h-khì sí-.khì. In thèng-hāu chin kú, khòaⁿ tio̍h i lóng bô tāichì, chiū tian-tò siūⁿ kóng i sī sîn-bêng.
28:7 Hái-tó ê thâu-lâng Pō͘-pu-lioh, ū chi̍t-kóa chhân-hn̂g tī lī hia bô gōa hn̄g ê só͘-chāi. I hoan-gêng goán khì in tau tòa saⁿ ji̍t, chin hó lé kā goán khoán-thāi.
28:8 Hit sî, Pō͘-pu-lioh ê lāu-pē hoān tio̍h jia̍t-pēⁿ kah chhiah-lī, tó tī bîn-chhn̂g. Páu-lô ji̍p-khì kā i hōaⁿ-chhiú kî-tó, chiū i hó i ê pēⁿ.
28:9 In-ūi ánne, tó-sū tiong phòa-pēⁿ ê lâng, mā lâi hō͘ i i hó.
28:10 In sàng goán chin chē lé-mi̍h, goán beh khui-chûn ê sî, kā goán su-iàu ê mi̍h sàng kàu chûn-.ni̍h hō͘ goán.
28:11 Páu-lô Lâi-kàu Lô-má
Saⁿ kò-goe̍h āu, goán tah A-le̍k-san-toh ê chûn chhut-hoat, hit chiah chûn hō-chò " Che-ú-su ê siang-seⁿ-á-kiáⁿ", sī tī chit-ê tó-sū kòe-tang ê.
28:12 Goán tī Su-la-ku-sái chiūⁿ hōaⁿ, tòa hia thêng-liû saⁿ ji̍t.
28:13 Goán koh tùi hia se̍h kàu Lē-gí-óng. Keh tńg kang ū thàu lâm-hong, tē-jī ji̍t chiū kàu Po͘-tio-lói.
28:14 Tī hia goán tú tio̍h chi̍t-kóa sìn-tô͘, in chhiáⁿ goán kah in chò-hóe tòa chhit ji̍t, āu-lâi goán chiū kàu Lô-má.
28:15 Lô-má ê sìn-tô͘ thiaⁿ tio̍h goán ê siau-sit, chiū tùi hia lâi-kàu Ap-pí-oh chhī kah Ta-bel-né ê só͘-chāi, kā goán gêng-chiap. Páu-lô khòaⁿ tio̍h in, chiū kám-siā Siōng-tè, koh khah chòng-táⁿ khí-.lâi.
28:16 Goán kàu Lô-má liáu-āu, in chún Páu-lô kah khòaⁿ-siú i ê peng-á lēng-gōa tòa.
28:17 Páu-lô tī Lô-má Thoân-tō
Saⁿ ji̍t āu, Páu-lô chhiáⁿ Iô-tá-iah lâng ê thâu-lâng lâi siong-hōe. In chū-chi̍p liáu-āu, Páu-lô chiū tùi in kóng, " Hiaⁿ-tī chí-mōe, góa sûi-jiân m̄ bat hoān tio̍h tùi-put-khí lán ê lâng á-.sī chó͘-sian ê kui-lē, m̄ koh, góa tī Ê-lú-sa-lèm siū lia̍h, hō͘ lâng sàng-kau Lô-má tong-kio̍k.
28:18 In í-keng kā góa sím-phòaⁿ, khòaⁿ góa bô hoān tio̍h kai sí ê chōe, chiū siūⁿ beh pàng góa.
28:19 To̍k-to̍k Iô-tá-iah lâng hoán-tùi, góa put-tek-í chiah tùi Lô-má hông-tè siōng-sò͘. Kî-si̍t góa bô ì-sù beh khòng-kò kakī ê tông-pau.
28:20 In-ūi ánne, góa chiah chhiáⁿ lín lâi kìⁿ-bīn, chò-hóe thó-lūn. Góa sī ūi tio̍h I-su-la-el só͘ ǹg-bāng ê hit ūi, chiah siū chit-ê thih-liān-á khún-pa̍k. "
28:21 In tùi Páu-lô kóng, " Goán m̄ bat tùi Iô-tá-iah chiap tio̍h phoe kóng-kàu lí ê tāichì, mā bô siáⁿ-mi̍h hiaⁿ-tī kàu chia thong-pò, á-.sī kóng lí ê pháiⁿ ōe.
28:22 Chóng-.sī, goán ài thiaⁿ lí ê ì-kiàn, in-ūi goán chai lín chit phài ê lâng tī ta̍k só͘-chāi lóng hō͘ lâng hoán-tùi. "
28:23 In kah Páu-lô iok-tēng ji̍t-kî, ū chin chē lâng lâi-kàu i tòa ê chhù. Tùi chá kàu àm, Páu-lô ūi tio̍h Siōng-tè kok-tō͘ chò kiàn-chèng, ín-iōng Mô͘-se ê lu̍t-hoat kah sian-ti ê chheh, khoàn-bián in lâi sìn I-é-su.
28:24 I só͘ kóng ê ōe, ū lâng sìn, ū lâng m̄-sìn.
28:25 Nn̄g pêng ì-kiàn bē ha̍h, chiū sì-sòaⁿ. Sì-sòaⁿ chìn-chêng, Páu-lô seng kóng chi̍t kù ōe, " Sèng Sîn thok I-sá-iah sian-ti ê chhùi, kā lín ê chó͘-sian só͘ kóng ê ōe chin tio̍h!
28:26 I kóng, khì kā chiahê lâng kóng, Lín thiaⁿ koh thiaⁿ, mā lóng bē bêng-pe̍k; lín khòaⁿ koh khòaⁿ, mā lóng bē khòaⁿ-kìⁿ.
28:27 In-ūi chiahê lâng sim tūn, hīⁿ-khang tāng, ba̍k-chiu pàng-kheh-kheh; In nā ēng ba̍k-chiu khòaⁿ-.tio̍h, ēng hīⁿ-khang thiaⁿ-.tio̍h, iōng-sim bêng-pe̍k, koh hôe-sim choán-ì, góa chiū kā in i hó. (chù, ISI 6:9-10)
28:28 " Só͘-í, lín tio̍h chai, Siōng-tè chit ê chín-kiù ê sìn-sit í-keng thoân hō͘ gōa-pang lâng, in ē thiaⁿ koh ē chiap-siū. "
28:29 Páu-lô kóng chiahê ōe liáu-āu, hiahê Iô-tá-iah lâng gī-lūn hun-hun, chiū lī-khui hia. （ Chù, goân pán-pún bô chit chat, ū ê chhau-pún ke chit chat ）
28:30 Páu-lô tòa tī kakī sòe ê chhù nn̄g nî ê sî-kan, lâi hóng-būn ê lâng, i lóng kā in chiap-thāi.
28:31 I hó-táⁿ soan-iông Siōng-tè kok-tō͘, koh kā Chú I-é-su Ki-tok ê hok-im kà-sī lâng, lóng bô hō͘ lâng chó͘-tòng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。