使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
27:1 Páu-lô Chē Chûn Khì Lô-má
Chi̍t-ē koat-tēng goán tio̍h chē chûn khì I-ta-lí-ah, in chiū kā Páu-lô kah lēng-gōa kúi-nā-ê hoān-lâng kau hō͘ hông-ka-kun Se-bá-su-toh iâⁿ chi̍t-ê miâ kiò-chò Iû-lioh ê liân-tiúⁿ.
27:2 Goán chē chi̍t chiah tùi A-ta-mu-te-no͘h lâi ê chûn, chit chiah chûn tú beh khui-chûn, iân A-si-a séng hái-hōaⁿ kúi-nā-ê káng-kháu kiâⁿ. Ū chi̍t-ê tùi Ma-ke-tó-niah lâi ê The-sa-lô-nî-ke lâng A-lí-su-ta̍t-khó͘ kah goán chò-hóe khì.
27:3 Keh tńg kang lâi-kàu Si-tòng, Iû-lioh chin chhin-chhiat khoán-thāi Páu-lô, chún i khì kìⁿ i ê pêng-iú, siū in ê chiau-thāi.
27:4 Goán tùi hia koh khui-chûn, in-ūi chìⁿ-hong ê iân-kò͘, chiū sūn Ku-pu-liò tó siám-hong ê hit pêng keng-kòe.
27:5 Goán keng-kòe Ki-lí-kiah kah Pam-hu-lí-ah ê gōa-hái, lâi-kàu Lū-kiah ê Mú-lah.
27:6 Tī hia, liân-tiúⁿ tú tio̍h chi̍t chiah tùi A-le̍k-san-toh lâi ê chûn, beh khui-khì I-ta-lí-ah, i chiū kiò goán chē hit chiah chûn.
27:7 Chûn kiâⁿ chin bān, keng-kòe chin chē ji̍t chiah lâi-kàu Ku-ní-toh ê gōa-hái. In-ūi siū hong chó͘-tòng, goán chiū sūn Ku-lé-té tó siám-hong ê hit pêng, kiâⁿ tùi Sa-mó͘-neh kòe-.khì.
27:8 Goán ê chûn iân hái-hōaⁿ kiâⁿ, bián-kióng-lâi-kàu lī La̍h-sa-iah bô gōa hn̄g, chi̍t-ê miâ kiò-chò " An-choân-káng "ê siâⁿ.
27:9 Goán í-keng chhiân chin chē ji̍t, koh in-ūi kìm-chia̍h ê kî í-keng kòe-.khì, kiâⁿ-chûn chin gûi-hiám. Páu-lô chiū khǹg tāi-ke,
27:10 Kóng, " Kok-ūi, góa khòaⁿ chit pái kiâⁿ-chûn, m̄ nā hòe-bu̍t kah chûn, liân lán ê sèⁿ-miā to ē tú tio̍h gûi-hiám kah tōa sún-sit. "
27:11 M̄ koh, liân-tiúⁿ siong-sìn chûn-tiúⁿ kah chûn-chú ê ōe, bô beh thiaⁿ Páu-lô kóng ê ōe.
27:12 Koh in-ūi tī chit-ê káng-kháu kòe kôaⁿ-thiⁿ bô sek-ha̍p, só͘-í, tōa pō͘-hūn ê lâng lóng chàn-sêng khui-chûn lī-khui chia, ǹg-bāng ē-tàng kóaⁿ kàu Hoe-ní-ke khì kòe kôaⁿ-thiⁿ. Hoe-ní-ke sī Ku-lé-té tó ê chi̍t-ê káng-kháu, chi̍t-bīn ǹg tang-lâm, chi̍t-bīn ǹg tang-pak (chù, ū ê pán-pún siá-chò, chi̍t-bīn ǹg sai-lâm, chi̍t-bīn ǹg sai-pak ）.
27:13 Tú tio̍h Tōa Hong-éng
Hit sî, lâm-hong bî-bî-á chhoe-.lâi, tāi-ke siūⁿ kóng ē-tàng sūn-lī kàu bo̍k-tek-tē, chiū khí tiāⁿ, chīn-liōng iân Ku-lé-té tó ê hái-hōaⁿ kiâⁿ.
27:14 Kòe bô gōa kú, chi̍t chūn kiò-chò" Iû-la-ku-lông"ê tang-pak kiông-hong, tùi tó-sū téng-bīn sàu lo̍h-.lâi.
27:15 Chûn chi̍t ē hō͘ hong sàu, chih-chài bē tiâu, chiū chhut-chāi i phiau-liû.
27:16 Chûn sái lâi-kàu chi̍t-ê kiò-chò Ku-láu-tè ê sió-tó, goán bián-kióng ē-tàng kā sam-pán siu khí-.lâi.
27:17 Sam-pán siu khí-lâi chûn téng liáu-āu, chiū ēng hong-hoat khún-pa̍k chûn-té. In-ūi in khióng-kiaⁿ chûn ē tī Sul-tí-suh ê soa-chiu khò-chhián, chiū kā phâng kàng-lo̍h, chhut-chāi chûn khì phiau-liû.
27:18 Goán hō͘ hong-éng sàu-kah chin lī-hāi, keh tńg kang, tāi-ke chiū khai-sí kā hòe-bu̍t hiat-lo̍h hái.
27:19 Tē-saⁿ ji̍t, in koh chhin-chhiú kā chûn-.ni̍h ê khì-kū tàn lo̍h hái.
27:20 Goán í-keng kúi-nā ji̍t bô khòaⁿ tio̍h chheⁿ kah ji̍t-thâu chhut-hiān. Hong-éng kè-sio̍k phah kah chin lī-hāi, goán tit-kiù ê ǹg-bāng lóng siau-sit-khì à.
27:21 Chèng lâng chin kú bô chia̍h, Páu-lô khiā tī in tiong-kan, kóng, " Kok-ūi, lín chêng nā thiaⁿ góa ê ōe, bô khui-chûn lī-khui Ku-lé-té tó, chiū bē tú tio̍h chit khoán ê siong-hāi kah sún-sit.
27:22 Taⁿ góa khǹg lín the̍h-chhut ióng-khì, in-ūi lín tiong-kan bô kah chi̍t-ê lâng ē sòng-sit sèⁿ-miā, kantaⁿ ē sit-lo̍h chit chiah chûn niā-niā.
27:23 In-ūi góa só͘ sio̍k kah só͘ kèng-pài ê Siōng-tè, I ê thiⁿ-sài chā-mê khiā tī góa sin piⁿ,
27:24 Tùi góa kóng, ' Páu-lô, m̄-bián kiaⁿ! Lí it-tēng tio̍h khì khiā tòa Lô-má hông-tè ê bīn-chêng. Siōng-tè í-keng kā chûn lāi só͘-ū ê lâng kau-thok lí à. '
27:25 Só͘-í, lán tio̍h ióng-kám, in-ūi góa siong-sìn tāichì ē chiàu Siōng-tè kā góa kóng ê lâi si̍t-hiān.
27:26 M̄ koh, lán it-tēng ē tī chi̍t-ê hái-tó khò-chhián. "
27:27 Kàu tē-cha̍p-sì ji̍t ê àm-sî, goán phiau-liû tī A-to-li-a hái. Chha-put-to tī pòaⁿ-mê ê sî, chúi-siú lia̍h-chò teh beh óa-kīn lio̍k-tē,
27:28 Chiū tàn thàm chúi chhim ê iân tūi-lo̍h hái, thàm-chhut ū 40 kong-chhioh chhim, koh khì lio̍h-á chìn-chêng ê só͘-chāi thàm, ū 30 kong-chhioh chhim.
27:29 In khióng-kiaⁿ chûn lè tio̍h tōa chio̍h, chiū tī chûn-bóe pha sì-ê tiàⁿ, pek-chhiat ǹg-bāng kín thiⁿ-kng.
27:30 Chúi-siú siūⁿ beh lī-khui chûn tô-cháu, chiū pàng sam-pán lo̍h hái, ké-chò beh tùi chûn-thâu pha tiàⁿ.
27:31 Páu-lô tùi liân-tiúⁿ kah peng-á kóng, " Chiahê lâng nā bô lâu tī chûn téng, lín chiū bô kiù. "
27:32 Peng-á chiū chám-tn̄g sam-pán ê tōa-soh, chhut-chāi i lâu-.khì.
27:33 Kàu thiⁿ beh kng ê sî, Páu-lô khǹg tāi-ke tio̍h chia̍h, kóng, " Lín í-keng cha̍p-sì ji̍t lóng bô chia̍h,
27:34 Só͘-í, góa khǹg lín tio̍h chia̍h, che sī koan-hē lín ê tit-kiù, in-ūi lín bô kah chi̍t-ê lâng ē sit-lo̍h chi̍t ki thâu-mn̂g. "
27:35 Páu-lô kóng soah, the̍h piáⁿ, tī chèng lâng ê bīn-chêng kám-siā Siōng-tè liáu-āu, kā piáⁿ peh-khui lâi chia̍h.
27:36 Tāi-ke sim chiū tiāⁿ lo̍h-.lâi, lóng the̍h mi̍h-kiāⁿ lâi chia̍h.
27:37 Kah goán kāng chûn ê, chóng-kiōng ū nn̄g-pah chhit-cha̍p-la̍k lâng.
27:38 Tāi-ke chia̍h pá, kā be̍h-á hiat-lo̍h hái, thang hō͘ chûn khah khin.
27:39 Chûn Khò-chhián
Kàu thiⁿ-kng, chúi-siú m̄ bat hit-ê só͘-chāi, to̍k-to̍k ū khòaⁿ tio̍h chi̍t-ê hái-oan ū soa-than, chiū chò-hóe siūⁿ khòaⁿ ē-tàng kā chûn sái chiūⁿ téng-bīn á-bē.
27:40 In kā tiāⁿ soh chám-tn̄g, pàng lo̍h-khì hái-.ni̍h, mā tháu-khui tiàu chûn-tōa ê soh, kā chûn-thâu ê phâng tiàu khí-lâi hō͘ i chia̍h hong, kā chûn sái chiūⁿ soa-than.
27:41 Chûn lè tio̍h soa-than chiū khò-chhián, chûn-thâu kā-tiâu-.leh bē tín-tāng, chûn-bóe hō͘ tōa-éng phah-phòa.
27:42 Peng-á kiaⁿ hoān-lâng siû-chúi tô-cháu, siūⁿ beh kā in lóng thâi-sí.
27:43 M̄ koh liân-tiúⁿ ài beh kiù Páu-lô, chiū kā in chó͘-tòng, bēng-lēng ē siû-chúi ê lâng seng thiàu lo̍h-chúi chiūⁿ hōaⁿ.
27:44 Kî-tha ê lâng chiah lī-iōng chûn-pang á-.sī chûn téng ē phû ê mi̍h chiūⁿ hōaⁿ. Án-ne, goán choân-pō͘ lóng an-choân chiūⁿ hōaⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。