使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
26:1 Páu-lô tī A-gu-li̍p-phà Ông Bīn-chêng Ūi Ka-kī Piān-hō͘
A-gu-li̍p-phà tùi Páu-lô kóng, " Chún lí ūi kakī piān-hō͘. " Páu-lô chiū chhun chhiú piān-hō͘ kóng,
26:2 " A-gu-li̍p-phà ông, kin-á-ji̍t góa ē-tàng tī lí ê bīn-chêng, ūi tio̍h hō͘ Iô-tá-iah lâng khòng-kò ê tāichì lâi piān-hō͘, kám-kak hui-siông êng-hēng.
26:3 Ka-chài in-ūi lí tùi Iô-tá-iah lâng ê kui-lē kah in teh cheng-lūn ê būn-tê chin liáu-kái, só͘-í, kiû lí nāi-sim thiaⁿ góa kóng.
26:4 " Góa chū siàu-liân kàu taⁿ, khí-thâu tī góa ê pún-kok, āu-lâi tī Ê-lú-sa-lèm, góa ê chò lâng án-chóaⁿ, só͘-ū ê Iô-tá-iah lâng lóng chai.
26:5 In í-keng bat góa chin kú, nā khéng ūi góa chò-chèng, chiū ē-tàng chèng-bêng góa chò chi̍t-ê Hoat-lī-sài lâng ū chiàu goán chong-kàu siōng giâm-keh kàu-phài ê iau-kiû teh seng-oa̍h.
26:6 Chit-mà góa khiā tī chia lâi siū sím-phòaⁿ, to̍h-sī in-ūi ǹg-bāng Siōng-tè tùi goán chó͘-sian ê èng-ín ē si̍t-hiān.
26:7 Goán cha̍p-jī chi-cho̍k ê tông-pau mê-ji̍t jia̍t-sim kèng-pài, mā sī teh kî-thāi ē-tàng ta̍t-sêng chit-ê ǹg-bāng. Ông, góa ūi tio̍h chit-ê ǹg-bāng, chiah hō͘ Iô-tá-iah lâng khòng-kò.
26:8 Siōng-tè hō͘ sí-lâng koh-oa̍h chit-hāng tāichì, lín Iô-tá-iah lâng ná ē bē tàng siong-sìn?
26:9 " Í-chêng góa pún-sin mā siūⁿ kóng, tio̍h ēng ta̍k-khoán ê hong-hoat lâi kong-kek Na-cha-lia̍t lâng I-é-su ê miâ.
26:10 Góa tī Ê-lú-sa-lèm khak-si̍t ū ánne chò. Góa m̄ nā ū chè-si-tiúⁿ ê siū-koân, lia̍h chin chē sìn-tô͘ lâi koaiⁿ lo̍h kaⁿ, koh tī in siū sí-hêng ê sî, góa mā piáu-sī chàn-tông.
26:11 Góa sî-siông tī ta̍k-ê hōe-tn̂g kā in hêng-hoa̍t, kiông-pek in kóng siat-to̍k ê ōe, ēng pō-le̍k tùi-thāi in, sīm-chì kàu gōa-kok ê siâⁿ-chhī mā kā in pek-hāi. "
26:12 Páu-lô Kóng Ka-kī Kui Chú ê Keng-kòe
( Ht 9: 1-19; 22: 6-16)
" Hit sî, góa khì Ta-má-su-ko ê sî, ū tòa chè-si-tiúⁿ ê siū-koân kah bēng-lēng.
26:13 Ông, thàu tiong-tàu ê sî, góa tī lō͘ tiong khòaⁿ tio̍h pí ji̍t-thâu khah kiông ê kng, tùi thiⁿ-téng chiò lo̍h-lâi tī góa kah tâng-phōaⁿ ê sì-kho͘-ûi.
26:14 Goán lóng poa̍h lo̍h-khì thô͘-kha. Góa thiaⁿ tio̍h ū siaⁿ ēng Hi-bú-lâi ōe tùi góa kóng, ' Sàu-lô, Sàu-lô, lí ná ē beh pek-hāi góa? Lí ánne chò, chhin-chhiūⁿ gû ēng kha teh that ū chhì ê kùn-á （ Chù, Chit-kù ê ì-sù to̍h-sī lán Tâi-gí ê" Ēng kûn-thâu-bú teh cheng chio̍h-sai "）, sī kakī teh thó phôe thiàⁿ. '
26:15 Góa mn̄g kóng, ' Chú ah, Lí sī siáⁿ lâng? ' Chú kóng, ' Góa to̍h-sī lí só͘ pek-hāi ê I-é-su.
26:16 Chóng-.sī, lí tio̍h khiā khí-.lâi, in-ūi góa choan-kang tùi lí hián-hiān, sī beh siat-li̍p lí chò tāichì, ūi tio̍h lí só͘ khòaⁿ-.tio̍h ê kah góa chiong-lâi só͘ beh hián-hiān hō͘ lí khòaⁿ ê tāichì, lâi chò kiàn-chèng.
26:17 Góa beh tùi Iô-tá-iah lâng kah gōa-pang lâng tiong-kan kā lí kiù chhut-.lâi. Taⁿ góa beh chhe-phài lí khì gōa-pang lâng hia,
26:18 Khui in ê ba̍k-chiu, hō͘ in lī-khui o͘-àm, oat- tńg-lâi kui-ǹg kng-bêng; lī-khui Sa-tán ê koân-sè, lâi kui-ǹg Siōng-tè, tùi sìn góa lâi tit tio̍h sià chōe, koh sêng-siū chò Siōng-tè soán-bîn ê tē-ūi. '"
26:19 Páu-lô ê Kiàn-chèng
" Só͘-í, A-gu-li̍p-phà ông, góa bô ûi-pōe tùi thiⁿ lâi ê ī-siōng.
26:20 Góa seng tī Ta-má-su-ko kah Ê-lú-sa-lèm, āu-lâi tī Iô-tá-iah choân tē, mā tùi gōa-pang lâng thoân-tō, khǹg lâng tio̍h hóe-kái lâi kui-ǹg Siōng-tè, koh tio̍h ēng hêng-ûi chèng-bêng in chin-chiàⁿ ū hóe-kái.
26:21 In-ūi ánne, Iô-tá-iah lâng tī sèng-tiān kā góa lia̍h, koh siūⁿ beh kā góa thâi.
26:22 M̄ koh, kàu kin-á-ji̍t, góa ū tit tio̍h Siōng-tè ê pó-hō͘, ē-tàng khiā tī chia, tùi chun-kùi kah pi-bî ê lâng chò kiàn-chèng. Góa só͘ kóng ê kah sian-ti í-ki̍p Mô͘-se só͘ kóng ê oân-choân-kāng-khoán, lóng sī koan-hē chiong-lâi beh hoat-seng ê tāichì,
26:23 Chiū-sī Ki-tok án-chóaⁿ tio̍h siū khó͘, chiâⁿ-chò thâu chi̍t-ê tùi sí-lâng tiong koh-oa̍h, thang kā chín-kiù ê kng-bêng thoân hō͘ Iô-tá-iah lâng kah gōa-pang lâng. "
26:24 Páu-lô Siūⁿ Beh Soeh-ho̍k A-gu-li̍p-phà Ông Chò Ki-tok-tô͘
Páu-lô ánne piān-hō͘ ê sî, Hui-su-to͘ tōa-siaⁿ hoah, " Páu-lô, lí teh khí-kông! Lí ha̍k-būn siuⁿ pá soah hō͘ lí khí-kông! "
26:25 Páu-lô kóng, " Hui-su-to͘ tōa-lâng, góa m̄-sī teh khí-kông, góa só͘ kóng ê ōe sī chin-si̍t koh chèng-siông. In-ūi ông lí chai chiahê tāichì, góa chiah káⁿ hó-táⁿ tùi lí kóng.
26:26 Góa siong-sìn ông tùi chit-hāng tāichì chin chheng-chhó, in-ūi lâng-lâng lóng chai chit-hāng tāichì.
26:27 A-gu-li̍p-phà ông, lí kám ū siong-sìn sian-ti? Góa chai lí ū sìn. "
26:28 A-gu-li̍p-phà tùi Páu-lô kóng, " Lí siūⁿ kóng ēng chit kúi-kù ōe chiū beh soeh-ho̍k góa chò Ki-tok-tô͘ ò͘! "
26:29 Páu-lô kóng, " Bô-lūn sī kúi kù á á-.sī chin chē ōe, góa khún-kiû Siōng-tè, m̄ nā hō͘ lí, mā hō͘ kin-á-ji̍t só͘-ū thiaⁿ góa kóng ê lâng lóng kah góa kāng-khoán, to̍k-to̍k bô chhiūⁿ góa ánne hō͘ lâng ēng thih-liān-á liān teh. "
26:30 Ông, chóng-tok kah be̍h-ní-ke, í-ki̍p tī hia teh chē ê lâng lóng khiā khí-.lâi.
26:31 In thè-chhut-khì liáu-āu, chiū chò-hóe tâm-lūn kóng, " Chit-ê lâng pēng bô hoān tio̍h kai sí á-.sī tio̍h koaiⁿ-kaⁿ ê chōe. "
26:32 A-gu-li̍p-phà kā Hui-su-to͘ kóng, " Chit-ê lâng nā bô tùi Lô-má hông-tè siōng-sò͘, chá to̍h thang pàng i khì. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。