使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
19:1 Páu-lô tī Ê-hu-soh
A-po-lô tī Ko-lîn-to ê sî, Páu-lô keng-kòe lāi-lio̍k ê tē-khu, lâi-kàu Ê-hu-soh, tī hia tú tio̍h kúi-nā-ê bûn-tô͘.
19:2 Páu-lô mn̄g in kóng, " Lín sìn Chú ê sî kám ū niá-siū Sèng Sîn? " In ìn kóng, " Goán kàu taⁿ lóng m̄ bat thiaⁿ-kòe ū Sèng Sîn ê tāichì. "
19:3 Páu-lô koh mn̄g kóng, " Án-ne, lín niá-siū siáⁿ-mi̍h khoán ê sé-lé? " In chiū kóng, " Iô-há-neh ê sé-lé. "
19:4 Páu-lô kóng, " Iô-há-neh kiâⁿ hóe-kái ê sé-lé, i kiò I-su-la-el lâng tio̍h sìn tòe i āu-bīn lâi ê hit ūi, to̍h-sī tio̍h sìn I-é-su. "
19:5 Hiahê lâng thiaⁿ-.tio̍h, chiū hōng Chú I-é-su ê miâ niá siū sé-lé.
19:6 Páu-lô kā in hōaⁿ-chhiú, Sèng Sîn chiū lîm-kàu tī in sin chiūⁿ, in sûi-sî kóng kńg-chi̍h-ōe, koh soan-káng Siōng-tè ê sìn-sit.
19:7 In chóng-kiōng chha-put-to ū cha̍p-jī-ê lâng.
19:8 Páu-lô liân-sòa saⁿ goe̍h-ji̍t, ji̍p-khì hōe-tn̂g hó-táⁿ thoân-tō kah lâng piān-lūn Siōng-tè kok-tō͘ ê tāichì lâi khó͘-khǹg lâng sìn Chú.
19:9 M̄ koh, ū chi̍t-kóa lâng kò͘-chi̍p m̄-sìn, tī kûn-chiòng ê bīn-chêng siat-to̍k Chú ê tō-lō͘. Páu-lô chiū chhōa bûn-tô͘ lī-khui in, ta̍k ji̍t tī Tu-la̍h-nô͘ ê káng-tn̂g kah lâng piān-lūn.
19:10 Án-ne kè-sio̍k nn̄g nî, hō͘ só͘-ū tòa tī A-si-a séng ê lâng, bô-lūn Iô-tá-iah lâng á-.sī Hi-la̍h lâng, lóng ū thiaⁿ tio̍h Chú ê tō-lí.
19:11 Su-ke-oah ê Kiáⁿ
Siōng-tè ēng Páu-lô ê chhiú, kiâⁿ hui-siông hi-hán ê sîn-jiah.
19:12 Sīm-chì ū lâng the̍h Páu-lô ēng kòe ê chhiú-kin-á á-.sī ûi-su-kûn, hē tī pēⁿ-lâng ê sin chiūⁿ, in ê pēⁿ chiū hó-.khì, siâ-sîn mā tùi in sin chiūⁿ chhut-.khì.
19:13 Hit sî, ū kúi-nā-ê kiâⁿ kang-ô͘ teh kóaⁿ kúi-ê Iô-tá-iah lâng, mā siūⁿ beh chioh Chú I-é-su ê miâ. In tùi hiahê hō͘ siâ-sîn hū-sin ê lâng kóng, " Góa hōng Páu-lô só͘ thoân ê I-é-su ê miâ, bēng-lēng lí tùi hit-ê lâng ê seng-khu chhut-.khì! "
19:14 Iô-tá-iah ê chè-si-tiúⁿ Su-ke-oah ê chhit-ê kiáⁿ, mā teh chò chit khoán tāichì.
19:15 Hitê siâ-sîn ìn kóng, " I-é-su góa bat, Páu-lô góa mā bat. Á lín leh, lín sī siáⁿ-mi̍h lâng? "
19:16 Hitê hō͘ siâ-sîn hū-sin ê lâng, chiū óa khì kong-kek hiahê kiâⁿ kang-ô͘ ê lâng, kā in chè-ho̍k, hō͘ in tio̍h-siong, koh thǹgpaktheh tùi hit keng chhù tô-cháu.
19:17 Tòa tī Ê-hu-soh ê Iô-tá-iah lâng kah Hi-la̍h lâng thiaⁿ tio̍h chit-hāng tāichì, lóng tio̍h-kiaⁿ. Chú I-é-su ê miâ chiū ánne tōa-tōa siū chun-tiōng.
19:18 Ū chin chē í-keng sìn ê lâng chhut-lâi kong-khai sêng-jīn, koh kóng-khí in kòe-khì só͘ chò ê tāichì.
19:19 Mā ū chin chē kiâⁿ siâ-su̍t ê lâng, the̍h in ê chheh lâi khǹg chò-hóe, tī kûn-chiòng ê bīn-chêng pàng hóe sio. In keng-kòe tiám-sǹg hiahê chheh ê kè-ta̍t, chha-put-to ū gō͘-bān ê gîn-pè.
19:20 Chhin-chhiūⁿ ánne, Chú ê tō-lí it-ti̍t thoân-khui, tōa-tōa heng-ōng khí-.lâi.
19:21 Tī Ê-hu-soh ê Pō-tōng
Chiahê tāichì liáu-āu, Páu-lô siū Sèng Sîn ê chí-sī, koat-tēng beh keng-kòe Ma-ke-tó-niah kah A-kha-iah, khì Ê-lú-sa-lèm. I kóng, " Kàu hia liáu-āu, góa mā tio̍h khì khòaⁿ Lô-má. "
19:22 I chiū chhe nn̄g-ê chō͘-chhiú, Tî-mó͘-theh kah Ê-lá-su-toh khì Ma-ke-tó-niah, i kakī chiām-sî lâu tòa A-si-a séng.
19:23 Hit sî, ūi tio̍h Chú ê tō, tī Ê-hu-soh ū ín-khí giâm-tiōng ê jiáu-loān.
19:24 Ū chi̍t-ê miâ kiò-chò Tê-mē-tu-lí-oh ê phah gîn sai-hū, i ēng gîn chò A-té-mih lú-sîn-biō ê bô͘-hêng. I hō͘ hiahê sai-hū thàn bē chió chîⁿ.
19:25 Tê-mē-tu-lí-oh kā hiahê sai-hū kah só͘-ū ê tông-gia̍p chū-chi̍p óa-.lâi, kā in kóng, " Kok-ūi, lín chai lán sī óa-khò chit-ê chhiú-gē teh thàn chîⁿ.
19:26 Taⁿ chit-ê Páu-lô, m̄ nā tī Ê-hu-soh, mā tī chha-put-to choân A-si-a séng, ēng i ê káng-tō lâi bê-he̍k chin chē lâng, kóng ēng lâng ê chhiú só͘ chò ê lóng m̄-sī sîn-bêng. Che sī lín só͘ khòaⁿ-.tio̍h, só͘ thiaⁿ-.tio̍h ê.
19:27 Án-ne lo̍h-.khì, m̄ nā lán chit khoán hâng-gia̍p ē phah-pháiⁿ miâ-siaⁿ, ū hō͘ lâng khòaⁿ-khin ê gûi-hiám, liân tōa lú-sîn A-té-mih ê biō mā ē hō͘ lâng khòaⁿ-khin. Choân A-si-a séng kah thian-hā só͘ pài ê A-té-mih lú-sîn ē sit-khì i ê chun-giâm! "
19:28 Kûn-chiòng chi̍t-ē thiaⁿ tio̍h chiahê ōe chiū hui-siông siū-khì, tōa-siaⁿ hoah, " Úi-tāi ah! Ê-hu-soh lâng ê A-té-mih! "
19:29 Choân-siâⁿ chiū khí jiáu-loān. Chèng lâng lia̍h tio̍h Páu-lô ê tâng-phōaⁿ — Ma-ke-tó-niah lâng Gâ-io̍h kah A-lí-su-ta̍t-khó͘, kui tīn lâng chò chi̍t-ē kheh ji̍p-khì hì-hn̂g.
19:30 Páu-lô siūⁿ beh ji̍p-khì kûn-chiòng ê lāi-bīn, bûn-tô͘ kā i chó͘-tòng.
19:31 A-si-a séng ū kúi-nā-ê koaⁿ-tiúⁿ sī Páu-lô ê pêng-iú, in mā chhe lâng lâi khǹg Páu-lô m̄ thang mō͘-hiám ji̍p-khì hì-hn̂g.
19:32 Hit sî, kui-ê hōe-tiûⁿ loān chhau-chhau, chi̍t-ê lâng hoah chi̍t-khoán, tōa pō͘-hūn ê lâng m̄-chai in ūi siáⁿ-mi̍h teh chū-chi̍p.
19:33 Kûn-chiòng tiong-kan ū lâng kā jiáu-loān ê chek-jīm kui hō͘ A-le̍k-san-toh, in-ūi Iô-tá-iah lâng kā i sak khì thâu-chêng. A-le̍k-san-toh pí chhiú-sè kiò in an-chēng, siūⁿ beh tùi in piān-kái.
19:34 Chèng lâng chi̍t ē jīn-chhut i sī Iô-tá-iah lâng, chiū chê-siaⁿ hoah, " Úi-tāi ah! Ê-hu-soh lâng ê A-té-mih! " Án-ne it-ti̍t hoah, chha-put-to hoah nn̄g tiám-cheng.
19:35 Siâⁿ ê su-kì-koaⁿ hō͘ kûn-chiòng an-chēng liáu-āu, chiū kóng, " Ê-hu-soh lâng, siáⁿ lâng m̄-chai Ê-hu-soh lâng ê siâⁿ sī tōa A-té-mih ê biō kah tùi thiⁿ-téng lak lo̍h-lâi hit tè sèng-chio̍h ê siú-hō͘-chiá?
19:36 Kì-jiân bô lâng ē-tàng hó͘ⁿ-jīn chit-hāng tāichì, lín tio̍h an-chēng, m̄ thang chhong-pōng.
19:37 Hô-hòng chiahê lâng bô thau-the̍h biō lāi ê mi̍h, mā bô húi-pòng lán ê lú-sîn, lín kèng-jiân thoa in lâi chia.
19:38 Tê-mē-tu-lí-oh kah hiahê óa i ê sai-hū nā beh khòng-kò in, ū khui-têng ê ji̍t-kî, mā ū chóng-tok, tāi-ke thang tòa hia sio-kò.
19:39 Lín nā iáu ū pa̍t hāng tāichì, thang tī tēng-kî ê hōe-gī lâi kái-koat.
19:40 Kin-á-ji̍t só͘ hoat-seng ê jiáu-loān, khióng-kiaⁿ bē bián-tit ē hō͘ lâng cha-mn̄g, lán mā bô lí-iû thang piān-kái. "
19:41 Kóng soah, i chiū soan-pò͘ sòaⁿ-hōe.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。