利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Sio-hòa-chè ê Kui-tēng
Siōng-chú tùi hōe-bō͘ lāi kiò Mô͘-se, kā i kóng,
1:2 " Lí tio̍h hoan-hù I-su-la-el lâng kóng: Lín tiong-kan nā ū lâng hiàn lé-mi̍h hō͘ Siōng-chú, tio̍h tùi gû-kûn, iûⁿ-kûn tiong hiàn chengseⁿ chò lé-mi̍h.
1:3 " I ê lé-mi̍h nā tùi gû-kûn chhú-chò sio-chè, chiū tio̍h hiàn chi̍t chiah bô khoat-tiám ê gû-káng-á, tio̍h tī hōe-bō͘ mn̂g-kháu hiàn, chiah ē-tàng tī Siōng-chú ê bīn-chêng tit tio̍h chiap-la̍p.
1:4 I tio̍h hōaⁿ-chhiú tī sio-chè ê chengseⁿ ê thâu-khak téng, chiū ūi tio̍h i siū chiap-la̍p, thè i kakī sio̍k-chōe.
1:5 I tio̍h tī Siōng-chú ê bīn-chêng thâi gû-káng-á. A-lông ê kiáⁿ-sun chò chè-si ê, tio̍h hiàn hit-ê hoeh, kā hoeh hiù tī hōe-bō͘ mn̂g-kháu kah tôaⁿ ê sì-kho͘-ûi.
1:6 I tio̍h pak sio-chè ê chengseⁿ ê phôe, kā i ê bah chhiat-chò chi̍t tè chi̍t tè.
1:7 Chè-si A-lông ê kiáⁿ-sun tio̍h ēng hóe hē tī tôaⁿ téng, ēng chhâ pâi tī hóe ê téng-bīn.
1:8 A-lông ê kiáⁿ-sun chò chè-si ê, tio̍h kā bah-tè, thâu kah iû, pâi tī tôaⁿ téng hóe-.ni̍h ê chhâ.
1:9 To̍k-to̍k sio-chè ê pak-lāi kah thúi, i tio̍h ēng chúi sé chheng-khì; chè-si chiū tio̍h kā it-chhè lóng sio tī tôaⁿ téng chò sio-chè, hiàn hō͘ Siōng-chú chò phang-phang ê hóe-chè.
1:10 " I ê lé-mi̍h nā tùi iûⁿ-kûn tiong lâi chò sio-chè, á-.sī mî-iûⁿ, á-.sī soaⁿ-iûⁿ, tio̍h ēng bô khoat-tiám ê kang ê lâi hiàn.
1:11 Tio̍h tī tôaⁿ piⁿ ê pak pêng, tī Siōng-chú ê bīn-chêng kā i thâi. A-lông ê kiáⁿ-sun chò chè-si ê, tio̍h ēng i ê hoeh hiù tī tôaⁿ ê sì-kho͘-ûi.
1:12 Tio̍h kā i chhiat-chò chi̍t tè chi̍t tè, liân thâu kah iû, chè-si tio̍h pâi tī tôaⁿ téng hóe-.ni̍h ê chhâ.
1:13 To̍k-to̍k pak-lāi kah thúi, tio̍h ēng chúi sé chheng-khì, chè-si tio̍h kā choân-pō͘ lóng hiàn, sio tī tôaⁿ téng. Che sī sio-chè, hiàn hō͘ Siōng-chú chò phang-phang ê hóe-chè.
1:14 " I hiàn hō͘ Siōng-chú ê lé-mi̍h, nā ēng chiáu-chiah chò sio-chè, chiū tio̍h hiàn pan-kah á-.sī hún-chiáu-kiáⁿ chò lé-mi̍h.
1:15 Chè-si tio̍h tòa chiáu-á kàu tôaⁿ chêng, kā i ê thâu chūn-tn̄g, tio̍h hē tī tôaⁿ piⁿ, it-ti̍t kàu hoeh lâu kah ta chiah tī tôaⁿ téng sio.
1:16 Koh tio̍h kā chiáu-á ê kui kah mn̂g tû-.khì, hiat tī tôaⁿ piⁿ ê tang pêng ū hóe-hu ê só͘-chāi.
1:17 Tio̍h khiú chiáu ê siang si̍t, kā i thiah-khui, chóng-.sī, m̄ thang phòa hō͘ i tn̄g; chè-si tio̍h kā i sio tī tôaⁿ téng hóe-.ni̍h ê chhâ. Che sī sio-chè, hiàn hō͘ Siōng-chú chò phang-phang ê hóe-chè.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。