使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
13:1 Sèng Sîn Chhe-phài Ba-ná-ba kah Sàu-lô
Tī An-ti-o-khè ê kàu-hōe ū kúi-nā-ê sian-ti kah kàu-su, to̍h-sī Ba-ná-ba kah kiò-chò Nî-gel ê Si-miān, Ku-lé-nái lâng Lō͘-kioh kah hun-hong ê kun-ông He-lo̍t chò-hóe tōa-hàn ê Má-nî-án, í-ki̍p Sàu-lô.
13:2 In teh kèng-pài Chú, kìm-chia̍h ê sî, Sèng Sîn kóng, " Tio̍h ūi góa chhe-phài Ba-ná-ba kah Sàu-lô, khì chò góa ho͘-tiàu in khì chò ê kang-chok. "
13:3 In kìm-chia̍h kî-tó liáu-āu, kā Ba-ná-ba kah Sàu-lô hōaⁿ-chhiú, chiū chhe-phài in chhut-.khì.
13:4 Sù-tô͘ tī Ku-pu-liò Thoân-tō
Ba-ná-ba kah Sàu-lô siū Sèng Sîn chhe-phài, chiū lo̍h-khì Se-liû-ki, tùi hia chē chûn khì Ku-pu-liò.
13:5 In kàu Sa-la-mih, chiū tī Iô-tá-iah lâng ta̍k-ê hōe-tn̂g thoân Siōng-tè ê tō-lí. Kiò-chò Má-khó ê Iô-há-neh mā khì kā in pang-bâng.
13:6 In kiâⁿ-phiàn choân tó lâi-kàu Pa-ho͘h, tī hia tú tio̍h chi̍t-ê kiâⁿ siâ-su̍t ê lâng, sī Iô-tá-iah lâng ê ké sian-ti, miâ kiò-chò Ba-li-ê-suh.
13:7 I kah chóng-tok Se̍h-gio̍h Pó-lô ū kau-pôe. Chóng-tok sī chhong-bêng ê lâng, i chhiáⁿ Ba-ná-ba kah Sàu-lô lâi, ài beh tùi in thiaⁿ Siōng-tè ê tō-lí.
13:8 M̄ koh hit-ê kiâⁿ siâ-su̍t-ê Í-lū-má( Hi-la̍h ōe ê ì-sù to̍h-sī " Kiâⁿ siâ-su̍t ê lâng ") hoán-tùi in nn̄g lâng, ài beh chó͘-tòng chóng-tok chiap-siū chit-ê sìn-gióng.
13:9 Chit sî Sàu-lô (mā kiò-chò Páu-lô ) hō͘ Sèng Sîn chhiong-móa, gîn hit-ê Í-lū-má, kóng,
13:10 " Lí chit-ê Mô͘-kúi á kiáⁿ, lí sī it-chhè kong-gī ê tùi-te̍k, chhiong-móa ta̍k chióng ê kúi-chà kah siâ-ok, lí ná ē ài beh niú-khiok Chú ê chin-lí?
13:11 Taⁿ lí khòaⁿ, Chú beh kā lí hêng-hoa̍t, lí ē chheⁿmê, chiām-sî bē khòaⁿ-kìⁿ ji̍t-kng. " I ê ba̍k-chiu sûi-sî hō͘ o͘-bū tah-teh, lóng khòaⁿ bô, sì-kè kiû lâng kā i khan.
13:12 Chóng-tok khòaⁿ tio̍h só͘ hoat-seng ê tāichì chiū sìn, tùi Chú ê kà-sī kám-kak chin hi-kî.
13:13 Páu-lô kah Ba-ná-ba tī Pí-si-tia ê Ai-ti-o-khè
Páu-lô kah tâng-phōaⁿ tùi Pa-ho͘h khui-chûn, kàu Pam-hu-lí-ah ê Pek-gē. Kiò-chò Má-khó ê Iô-há-neh tī hia lī-khui in, tńg-khì Ê-lú-sa-lèm.
13:14 In tùi Pek-gē kè-sio̍k kiâⁿ, lâi-kàu Pí-si-tia ê Ai-ti-o-khè. Tī An-hioh-ji̍t, in ji̍p-khì hōe-tn̂g, chē lo̍h-.lâi.
13:15 Tha̍k Mô͘-se ê lu̍t-hoat kah sian-ti ê chheh liáu-āu, hōe-tn̂g ê chú-koán chhe lâng lâi kā in kóng, " Hiaⁿ-tī, lín nā ū khoàn-bián tāi-ke ê ōe, chhiáⁿ kóng. "
13:16 Páu-lô chiū khiā khí-.lâi, pí chhiú-sè, kóng, " Kok-ūi I-su-la-el lâng kah kèng-ùi Siōng-tè ê chèng lâng, chhiáⁿ thiaⁿ.
13:17 Chit-ê I-su-la-el jîn-bîn ê Siōng-tè kéng-soán lán ê chó͘-sian, tī in kià-kha Ai-gi̍p ê sî, hō͘ in chiâⁿ-chò tōa ê bîn-cho̍k, koh ēng tōa koân-lêng ê chhiú chhōa in chhut Ai-gi̍p,
13:18 Koh tī khòng-iá khoan-iông in sì-cha̍p nî.
13:19 Siōng-tè húi-bia̍t Ka-nân tē-khu chhit-ê bîn-cho̍k liáu-āu, chiū kā hit-ê thó͘-tē pun hō͘ in chò sán-gia̍p, chha-put-to ū sì-pah gō͘-cha̍p nî.
13:20 " Chiahê tāichì liáu-āu, Siōng-tè ūi in siat-li̍p sū-su, it-ti̍t kàu Sa-mu-el chò sian-ti ê sî.
13:21 Āu-lâi, I-su-la-el jîn-bîn iau-kiû ài ū chi̍t-ê ông, Siōng-tè chiū tùi Biān-iá-mín chi-cho̍k soán-chhut Ki-si ê kiáⁿ Sàu-lô, hō͘ i chò ông sì-cha̍p nî.
13:22 Āu-lâi, Siōng-tè hòe-tiāu Sàu-lô ê ông-ūi, chiū siat-li̍p Ta-bi̍t chò in ê ông. Koan-hē Ta-bi̍t, Siōng-tè ū ánne kóng, ' Góa chhōe tio̍h I-é-sái ê kiáⁿ Ta-bi̍t, i sī ha̍h góa ê sim-ì, koh ta̍k hāng tāichì lóng chun-chiàu góa ê chí-ì. ' (chù, Tg SMS 13:14)
13:23 Siōng-tè chiàu I só͘ èng-ín, tùi Ta-bi̍t ê kiáⁿ-sun, kā I-su-la-el lâng siat-li̍p chi̍t-ê Kiù-chú, to̍h-sī I-é-su.
13:24 I-é-su lâi-lîm í-chêng, Iô-há-neh tāi-seng tùi I-su-la-el lâng thoân-tō, kiò in tio̍h hóe-kái lâi niá siū sé-lé.
13:25 Iô-há-neh teh beh oân-sêng i ê kang-chok ê sî, tùi chèng lâng kóng, ' Lín siūⁿ kóng góa sī siáⁿ lâng? Góa m̄-sī Ki-tok; ū chi̍t ūi tòe tī góa āu-bīn beh lâi ê, góa liân kā I thǹg ê to bē kham-tit. '
13:26 " Kok-ūi hiaⁿ-tī chí-mōe, A-bu-la-hàm ê kiáⁿ-sun kah lín tiong-kan kèng-ùi Siōng-tè ê lô͘-po̍k, chit-ê chín-kiù ê sìn-sit í-keng ū thoân hō͘ lán à.
13:27 In-ūi tòa tī Ê-lú-sa-lèm ê lâng kah in ê koaⁿ-tiúⁿ m̄ bat I, mā m̄ bat ta̍k-ê An-hioh-ji̍t só͘ tha̍k ê sian-ti ê ōe, chiah ē kā I tēng chōe. Che tú èng-giām sian-ti ê ī-giân.
13:28 Sûi-jiân in chhâ bô kā I tēng sí-chōe ê lí-iû, iáu koh iau-kiû Pí-la̍h-to kā I chhú sí-hêng.
13:29 Keng-tián só͘ kì-chài koan-hē I-é-su ê ōe oân-choân èng-giām liáu-āu, in chiū tùi si̍p-jī-kè téng kā I siu lo̍h-.lâi, hē tī bōng lāi.
13:30 Chóng-.sī, Siōng-tè hō͘ I tùi sí-lâng tiong koh-oa̍h.
13:31 Tī kúi-nā ji̍t tiong-kan, koh-oa̍h ê I-é-su hián-hiān hō͘ hiahê bat tùi Ga-lí-la-iah séng kah I chò-hóe chiūⁿ Ê-lú-sa-lèm ê lâng khòaⁿ-kìⁿ. Taⁿ chiahê lâng ū tùi bîn-chiòng chò I-é-su ê kiàn-chèng-jîn.
13:32 Goán kā Siōng-tè èng-ín lán chó͘-sian ê hok-im thoân hō͘ lín,
13:33 In-ūi Siōng-tè ū hō͘ I-é-su koh-oa̍h, chit-ê èng-ín í-keng ū tùi lán chiahê chò kiáⁿ-sun ê èng-giām, tú chhin-chhiūⁿ Si-phian tē-jī phiⁿ só͘ kì-chài, Lí to̍h-sī góa ê Kiáⁿ, góa kin-á-ji̍t seⁿ Lí. (chù, SPh 2:7)
13:34 Koan-hē hō͘ I-é-su tùi sí-lâng tiong koh-oa̍h, bô koh hiú-nōa ê tāichì, Siōng-tè ū ánne kóng, góa beh ēng Ta-bi̍t sèng koh si̍t-chāi ê un-tián sù hō͘ lín. (chù, ISI 5:3)
13:35 Tī Si-phian lēng-gōa chi̍t phiⁿ mā ū ánne kóng, ' Lí bô beh hō͘ Lí ê sèng ê hiú-nōa. ' (chù, SPh 16:10)
13:36 Ta-bi̍t chāi-seⁿ ê sî, ū chun-chiàu Siōng-tè ê chí-ì; i sí liáu-āu, bâi-chòng tī chó͘-sian ê piⁿ-á, mā í-keng hiú-nōa khì.
13:37 To̍k-to̍k Siōng-tè só͘ hō͘ i koh-oa̍h ê hit ūi bô hiú-nōa.
13:38 Só͘-í, kok-ūi hiaⁿ-tī chí-mōe, ánne lín eng-kai chai, sià chōe ê tō-lí sī tùi chit ūi I-é-su thoân hō͘ lín.
13:39 Mô͘-se ê lu̍t-hoat bē tàng hō͘ lín tit tio̍h chheng-chò gī, só͘-ū sìn-khò I-é-su ê lâng lóng ē tit tio̍h chheng-chò gī.
13:40 Só͘-í, lín tio̍h kín-sīn, chiah bián-tit sian-ti só͘ ī-giân ê lîm-kàu lín.
13:41 Sian-ti ê ōe kóng, ' Biáu-sī Siōng-tè ê lô͘-po̍k, lín tio̍h khòaⁿ, tio̍h-kiaⁿ, lâi bia̍t-bông, in-ūi tng lín ê sè-tāi, góa só͘ chò ê tāichì, sûi-jiân ū lâng kā lín soat-bêng, lín mā m̄-sìn. " (chù, HPK 1:5)
13:42 Páu-lô kah Ba-ná-ba tùi hōe-tn̂g chhut-khì ê sî, chèng lâng chhiáⁿ in tī chhú-āu ê An-hioh-ji̍t koh lâi kóng chiahê tō-lí hō͘ in thiaⁿ.
13:43 Sòaⁿ-hōe liáu-āu, Iô-tá-iah lâng kah kái-chong ji̍p Iô-tá-iah-kàu ê kèng-khiân ê lâng, chin chē tòe Páu-lô kah Ba-ná-ba chhut-.khì. Chit nn̄g-ê sù-tô͘ kah in kóng-ōe, khoàn-bián in tio̍h khò Siōng-tè ê un-tián lâi seng-oa̍h.
13:44 Koh lo̍h-.khì ê An-hioh-ji̍t, choân siâⁿ ê lâng lóng chū-chi̍p lâi thiaⁿ Siōng-tè ê tō-lí.
13:45 M̄ koh, Iô-tá-iah lâng khòaⁿ tio̍h lâng hiah chē, chiū móa-sim oàn-tò͘, hoán-po̍k Páu-lô só͘ kóng ê tō-lí, koh kā i húi-pòng.
13:46 Páu-lô kah Ba-ná-ba put-koán, tian-tò koh khah hó-táⁿ kóng, " Siōng-tè ê tō-lí seng thoân hō͘ lín, lín kèng-jiân kī-choa̍t, siūⁿ kóng lín kakī bē kham-tit tit tio̍h éng-oán ê oa̍h-miā, só͘-í, goán chiah choán-ǹg gōa-pang lâng.
13:47 In-ūi Chú bat ánne bēng-lēng goán, kóng, góa í-keng siat-li̍p lí chò gōa-pang ê kng, hō͘ lí kā góa ê chín-kiù tòa khì-kàu thiⁿ-piⁿ hái-kak. " (chù, ISI 49:6)
13:48 Gōa-pang lâng thiaⁿ tio̍h chiahê ōe lóng chin hoaⁿ-hí, oló Siōng-tè ê tō-lí. Só͘-ū siū Siōng-tè kéng-soán thang tit tio̍h éng-oán oa̍h-miā ê lâng, lóng chiâⁿ-chò sìn-tô͘.
13:49 Chiū ánne, Chú ê tō-lí thoân khì-kàu hit tē-hng ê ta̍k só͘-chāi.
13:50 To̍k-to̍k Iô-tá-iah lâng siàn-tōng kèng-khiân chun-kùi ê hū-jîn-lâng kah siâⁿ lāi ê thâu-lâng lâi pek-hāi Páu-lô kah Ba-ná-ba, kā in kóaⁿ-chhut hit só͘-chāi.
13:51 In nn̄g lâng tī kûn-chiòng ê bīn-chêng pōaⁿ kha-té ê thô͘-soa hún lâi piáu-sī hùn-khài, chiū khì Í-ko-ni-óng.
13:52 Bûn-tô͘ móa-sim hoaⁿ-hí, koh hō͘ Sèng Sîn chhiong-móa.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。