使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 Piat-tò͘, Kol-né-lioh kah Gōa-pang-Lâng
Tī Kai-sa-lī-a ū chi̍t-ê lâng, miâ kiò-chò Kol-né-lioh, sī I-ta-lí-ah iâⁿ ê liân-tiúⁿ.
10:2 I sī kèng-khiân ê lâng kah choân ke lóng kèng-ùi Siōng-tè, chín-chè chin chē sànchhiah ê Iô-tá-iah lâng, koh tiāⁿtiāⁿ tùi Siōng-tè kî-tó.
10:3 Ū chi̍t ji̍t, chha-put-to ē-po͘ saⁿ tiám, i tī ī-siōng tiong bêng-bêng khòaⁿ tio̍h Siōng-tè ê thiⁿ-sài ji̍p-.lâi, tùi i kóng, " Kol-né-lioh. "
10:4 I lia̍h thiⁿ-sài kim-kim khòaⁿ, hui-siông kiaⁿ-hiâⁿ, kóng, " Chú ah, siáⁿ-mi̍h tāichì? " thiⁿ-sài kā i kóng, " Lí ê kî-tó, lí ê chín-chè, í-keng lóng tit tio̍h Siōng-tè hoaⁿ-hí chiap-la̍p.
10:5 Taⁿ lí tio̍h chhe lâng khì Io̍p-pe, chhiáⁿ hit-ê kiò-chò Piat-tò͘ ê Sí-mòng lâi.
10:6 I tòa tī chè-phôe sai-hū Sí-mòng in tau, i ê chhù tī hái piⁿ. "
10:7 Kah i kóng-ōe ê thiⁿ-sài lī-khui liáu-āu, Kol-né-lioh chiū kiò nn̄g-ê lô͘-po̍k kah chi̍t-ê pêng-siông sū-hāu i koh sī kèng-khiân ê peng lâi,
10:8 Kā chiahê tāichì lóng kā in hoan-hù, chiū chhe in khì Io̍p-pe.
10:9 Keh tńg kang, chha-put-to tiong-tàu sî, chit saⁿ-ê lâng kiâⁿ beh kàu Io̍p-pe ê sî, Piat-tò͘ peh khí-lih chhù téng kî-tó.
10:10 I pak-tó͘ chin iau, siūⁿ beh chia̍h-mi̍h-kiāⁿ; lâng tútú teh chún-pī tiong-tàu-tǹg ê sî, Piat-tò͘ soah ji̍p-sîn khì.
10:11 I khòaⁿ tio̍h thiⁿ khui, ū chi̍t-ê chhin-chhiūⁿ sì-kak-thâu pa̍k-.leh ê tōa-pak pò͘ kàng lo̍h-.lâi, tūi tī thô͘-kha,
10:12 Hit lāi-bīn ū tē-bīn ta̍k chióng ê cháu-siù, thâng-thōa kah khong-tiong ê poe-chiáu.
10:13 Koh ū siaⁿ tùi i kóng, " Piat-tò͘, khí-.lâi, thâi lâi chia̍h. "
10:14 M̄ koh, Piat-tò͘ kóng, " Chú ah, chhian-bān m̄ thang, in-ūi góa m̄ bat chia̍h lahsap bô chheng-khì ê mi̍h. "
10:15 Hitê siaⁿ tē-jī pái tùi i kóng, " Siōng-tè só͘ hō͘ i chheng-khì ê, lí m̄ thang lia̍h-chò lahsap. "
10:16 Án-ne ê tùi-ōe liân-sòa saⁿ pái, jiân-āu hit-ê sì-kak-thâu tiàu-teh ê tōa-pak pò͘ sûi-sî koh siu tńg-khì thiⁿ-téng.
10:17 Piat-tò͘ kám-kak kî-koài, sim-lāi tú-teh siūⁿ chit-ê ī-siōng sī siáⁿ-mi̍h ì-sù ê sî, Kol-né-lioh só͘ chhe lâi ê lâng í-keng chhōe tio̍h Sí-mòng ê chhù, lâi khiā tī mn̂g-kháu,
10:18 Tōa siaⁿ mn̄g kóng, " Ū chi̍t-ê kiò-chò Piat-tò͘ ê Sí-mòng tòa tī chia á-bô? "
10:19 Piat-tò͘ iáu teh siūⁿ chit-ê ī-siōng ê sî, Sèng Sîn kā i kóng, " Ū saⁿ-ê lâng lâi beh chhōe lí.
10:20 Taⁿ tio̍h kóaⁿ-kín lo̍h-khì kah in chò-hóe khì, m̄ thang tiû-tû, sī góa chhe-phài in lâi ê. "
10:21 Piat-tò͘ chiū lo̍h-khì kìⁿ hiahê lâng, kóng, " Góa to̍h-sī lín teh chhōe ê lâng, lín lâi ū siáⁿ-mi̍h kùi-sū? "
10:22 In ìn kóng, " Liân-tiúⁿ Kol-né-lioh chhe-phài goán lâi. I sī gī lâng koh kèng-ùi Siōng-tè, siū choân-pō͘ ê Iô-tá-iah lâng chun-kèng. I tit tio̍h sèng thiⁿ-sài chí-sī, lâi chhiáⁿ lí kàu in tau, thang thiaⁿ lí ê káng-tō. "
10:23 Piat-tò͘ chiū chhiáⁿ in ji̍p-khì chhù lāi, lâu in tòa hia kòe-mê. Keh tńg kang, Piat-tò͘ kah in khì, koh ū kúi-nā-ê Io̍p-pe ê sìn-tô͘ mā tòe i khì.
10:24 Koh keh tńg kang, in lâi-kàu Kai-sa-lī-a. Kol-né-lioh í-keng chū-chi̍p i ê chhin-lâng kah hó pêng-iú, teh thèng-hāu in.
10:25 Piat-tò͘ ji̍p-khì ê sî, Kol-né-lioh kā i gêng-chiap, phak tī i ê kha chêng kā i pài.
10:26 Chóng-.sī, Piat-tò͘ khan i khí-.lâi, kóng, " Khí-.lâi, góa kah lí kāng-khoán, pêⁿ-pêⁿ mā sī lâng. "
10:27 Piat-tò͘ kah i ná kiâⁿ ná kóng-ōe, ji̍p-khì chhù lāi, khòaⁿ tio̍h chin chē lâng í-keng chū-chi̍p tī hia.
10:28 Piat-tò͘ tùi in kóng, " Lín chai Iô-tá-iah lâng ê lu̍t-hoat kìm-chí in kah pa̍t cho̍k ê lâng kau-pôe lâi-óng, m̄ koh, Siōng-tè í-keng chí-sī góa, bô-lūn siáⁿ lâng lóng m̄ thang kóng lâng sī lahsap bô chheng-khì.
10:29 Só͘-í, lín chhiáⁿ góa lâi, góa bô the-sî chiū lâi. Taⁿ chhiáⁿ-mn̄g lín chit pái chhiáⁿ góa lâi, ū siáⁿ-mi̍h kùi-sū? "
10:30 Kol-né-lioh kóng, " Sì ji̍t chêng, chha-put-to chit-ê sî ē-po͘ saⁿ tiám, góa tī chhù lāi teh kî-tó, hut-jiân ū chi̍t-ê lâng, saⁿ-khò͘ kng iàⁿiàⁿ, khiā tī góa ê bīn-chêng,
10:31 Kóng, ' Kol-né-lioh, Siōng-tè í-keng thiaⁿ tio̍h lí ê kî-tó, mā ē kì-tit lí ê chín-chè.
10:32 Taⁿ lí tio̍h chhe lâng khì Io̍p-pe, chhiáⁿ hit-ê kiò-chò Piat-tò͘ ê Sí-mòng lâi. I tòa tī chè-phôe sai-hū Sí-mòng in tau, i ê chhù tī hái piⁿ. '
10:33 Góa chiū sûi-sî chhe lâng kàu lí hia, taⁿ lí lâi si̍t-chāi chin hó. Chit-má goán lóng tī Siōng-tè ê bīn-chêng, ài beh thiaⁿ Chú bēng-lēng lí beh kā goán kóng ê ōe. "
10:34 Piat-tò͘ tī Kol-né-lioh ê Chhù Thoân-tō
Piat-tò͘ khui chhùi, kóng, " Taⁿ góa khak-si̍t chai, Siōng-tè bô ēng gōa-māu chhú lâng.
10:35 Bô-lūn tó chi̍t-ê bîn-cho̍k, kèng-ùi Siōng-tè lâi kiâⁿ gī ê lâng, I lóng hoaⁿ-hí chiap-la̍p.
10:36 Lín chai, Siōng-tè ū thong-kòe bān-bîn ê Chú I-é-su Ki-tok, lâi tùi I-su-la-el lâng thoân hô-pêng ê hok-im.
10:37 Lín mā chai, Iô-há-neh thoân sé-lé ê tō-lí í-āu, chit-ê hok-im ū tùi Ga-lí-la-iah séng khai-sí, thoân kàu Iô-tá-iah choân tē.
10:38 Chit-ê hok-im to̍h-sī Na-cha-lia̍t lâng I-é-su, Siōng-tè ū kā Sèng Sîn kah châi-lêng siúⁿ-sù hō͘ I, I chiū khì ta̍k só͘-chāi chò hó sū, i hó só͘-ū hō͘ Mô͘-kúi ap-chè ê lâng, in-ūi Siōng-tè kah I tông-chāi.
10:39 Goán sī I tī Iô-tá-iah lâng ê só͘-chāi kah Ê-lú-sa-lèm só͘ chò ê tāichì ê kiàn-chèng-jîn. In kā I tèng-sí tī si̍p-jī-kè,
10:40 Kàu tē-saⁿ ji̍t, Siōng-tè hō͘ I koh-oa̍h, koh hō͘ I hián-hiān;
10:41 M̄-sī tùi só͘-ū ê lâng hián-hiān, kantaⁿ tùi goán chiahê hō͘ Siōng-tè kéng-soán lâi chò kiàn-chèng ê lâng hián-hiān. Goán chiahê lâng tī I tùi sí-lâng tiong koh-oa̍h liáu-āu kah I chò-hóe lim-chia̍h.
10:42 I-é-su bēng-lēng goán thoân hok-im hō͘ só͘-ū ê lâng, chèng-si̍t I sī Siōng-tè só͘ jīm-bēng lâi chò oa̍h-lâng kah sí-lâng ê sím-phòaⁿ-koaⁿ.
10:43 Chèng sian-ti mā ūi I chò kiàn-chèng, to̍h-sī só͘-ū sìn I ê lâng lóng ē-tàng óa-khò I ê miâ tit tio̍h sià chōe. "
10:44 Gōa-pang lâng niá-siū Sèng Sîn
Piat-tò͘ iáu teh kóng ōe ê sî, Sèng Sîn kàng-lîm tī só͘-ū thiaⁿ tō-lí ê lâng tiong-kan.
10:45 Kah Piat-tò͘ chò-hóe lâi ê hiahê siū kat-lé ê sìn-tô͘ tōa tio̍h-kiaⁿ, in-ūi Sèng Sîn ê siúⁿ-sù mā ū kàng-lîm tī gōa-pang lâng.
10:46 In-ūi in ū thiaⁿ tio̍h hiahê lâng ēng kńg-chi̍h-ōe teh oló Siōng-tè ê úi-tāi.
10:47 Piat-tò͘ chiū ìn kóng, " Hiahê lâng í-keng kah lán kāng-khoán ū niá-siū Sèng Sîn, siáⁿ lâng ē-tàng kìm-chí in niá-siū chúi ê sé-lé? "
10:48 Piat-tò͘ chiū bēng-lēng in hōng I-é-su Ki-tok ê miâ niá siū sé-lé. Āu-lâi, in chhiáⁿ Piat-tò͘ kah in koh tòa kúi-nā ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。