使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
9:1 Sàu-lô Tú tio̍h Koh-oa̍h ê I-é-su
( Ht 22:6-16; 26:12-18)
Sàu-lô iáu koh kè-sio̍k khióng-hat beh thâi Chú ê bûn-tô͘. I khì kìⁿ tōa-chè-si,
9:2 Iau-kiû i siá phoe hō͘ Ta-má-su-ko hia-ê hōe-tn̂g, chún i nā tú tio̍h sìn chit-ê tō-lí ê lâng, bô-lūn lâm-lí, lóng thang kā in pa̍k khí-.lâi, ah-khì Ê-lú-sa-lèm.
9:3 Sàu-lô kiâⁿ beh kàu Ta-má-su-ko ê sî, hut-jiân tùi thiⁿ ū kng chiò-siā tī i ê sì-kho͘-ûi.
9:4 I chiū poa̍h-tó tī thô͘-kha, thiaⁿ tio̍h ū siaⁿ tùi i kóng, " Sàu-lô, Sàu-lô, lí ná ē beh pek-hāi góa? "
9:5 I mn̄g kóng, " Chú ah, Lí sī siáⁿ lâng? " Hitê siaⁿ kóng, " Góa to̍h sī lí só͘ pek-hāi ê I-é-su.
9:6 Chóng-.sī, lí tio̍h khí-.lâi, ji̍p-khì siâⁿ lāi, ū lâng ē kā lí chí-sī lí tio̍h án-chóaⁿ chò. "
9:7 I ê tâng-phōaⁿ chiū tòng-tiām, gāng-gāng khiā-teh bē kóng-ōe; in ū thiaⁿ tio̍h siaⁿ, mā bô khòaⁿ tio̍h iáⁿ.
9:8 Sàu-lô tùi thô͘-kha peh khí-.lâi, ba̍k-chiu thí-khui, siáⁿ-mi̍h to khòaⁿ bô. In chiū khan i ê chhiú, chhōa i ji̍p-khì Ta-má-su-ko.
9:9 Sàu-lô tī hia saⁿ ji̍t, ba̍k-chiu sit-bêng, bô chia̍h mā bô lim.
9:10 Tī Ta-má-su-ko ū chi̍t-ê bûn-tô͘ miâ kiò-chò A-ná-ni-a, Siōng-tè tī ī-siōng tiong kā i kóng, " A-ná-ni-a. " I ìn kóng, " Chú ah, góa tī chia. "
9:11 Chú tùi i kóng, " Khí-.lâi, khì hit tiâu kiò-chò ' Ti̍t'ê ke-lō͘, tī Iô-tah ê chhù chhōe chi̍t-ê miâ kiò-chò Sàu-lô ê Tà-soh lâng, lí ē khòaⁿ tio̍h i tī hia teh kî-tó.
9:12 Sàu-lô tī ī-siōng tiong ū khòaⁿ tio̍h chi̍t-ê miâ kiò-chò A-ná-ni-a ê lâng, ji̍p-lâi kā i hōaⁿ-chhiú, hō͘ i ē-tàng koh khòaⁿ-kìⁿ. "
9:13 A-ná-ni-a ìn kóng, " Chú ah, góa ū thiaⁿ tio̍h chin chē lâng kóng-khí, chit-ê lâng tī Ê-lú-sa-lèm tùi Lí ê sìn-tô͘ chò chin chē ok-to̍k ê tāichì.
9:14 I koh ū chè-si-tiúⁿ ê siū-koân, thang tī chia lia̍h só͘-ū kiû-kiò Lí ê miâ ê lâng. "
9:15 To̍k-to̍k Chú kā i kóng, " Lí khì, i sī góa kéng-soán ê khì-kū, beh tùi gōa-pang lâng, kok-ông kah I-su-la-el lâng soan-iông góa ê miâ.
9:16 Góa mā beh hō͘ i chai, ūi tio̍h góa ê miâ, i it-tēng tio̍h siū chin chē kan-khó͘. "
9:17 A-ná-ni-a chiū khì, ji̍p-khì hit keng chhù, kā Sàu-lô hōaⁿ-chhiú, kóng, " Sàu-lô hiaⁿ-tī, Chú, to̍h-sī lí lâi ê sî, tī lō͘ tiong chhut-hiān hō͘ lí khòaⁿ ê I-é-su, chhe góa lâi hō͘ lí ē koh khòaⁿ-kìⁿ, koh tit tio̍h Sèng Sîn chhiong-móa. "
9:18 Ōe kóng soah, sûi-sî tùi i ê ba̍k-chiu ū chhin-chhiūⁿ hî-lân ê mi̍h lak lo̍h-.lâi, i chiū koh ū khòaⁿ-kìⁿ, khí-lâi niá siū sé-lé.
9:19 Sàu-lô tī Ta-má-su-ko Thoân-tō
Sàu-lô chia̍h pá liáu-āu chiū ióng-kiāⁿ khí-.lâi. I kah Ta-má-su-ko ê bûn-tô͘ chò-hóe tòa kúi-nā ji̍t.
9:20 I sûi-sî tī chiahê hōe-tn̂g soan-iông I-é-su, kóng, " I sī Siōng-tè ê Kiáⁿ. "
9:21 Thiaⁿ-.tio̍h ê lâng lóng tio̍h-kiaⁿ kah gāng-.khì, kóng, " Chit-ê lâng kám m̄-sī hit-ê tī Ê-lú-sa-lèm pek-hāi só͘-ū kiû-kiò chit-ê miâ ê lâng? I koh lâi chia beh lia̍h sìn-tô͘, thoa in khì kau hō͘ chè-si-tiúⁿ. "
9:22 M̄ koh Sàu-lô ná-kóng ná ū la̍t, i chèng-bêng I-é-su sī Ki-tok, hō͘ tòa tī Ta-má-su-ko ê Iô-tá-iah lâng lóng bô piān-pok ê î-tē.
9:23 Sàu-lô Thoat-lī Iô-tá-iah Lâng ê Chhiú
Kòe chin chē ji̍t liáu-āu, Iô-tá-iah lâng chò-hóe kè-bô͘ beh thâi Sàu-lô.
9:24 Sàu-lô ū thiaⁿ tio̍h in ê kè-bô͘. Hiahê lâng mê-ji̍t tī siâⁿ mn̂g teh tng-tán, beh kā i thâi.
9:25 M̄ koh, Sàu-lô ê bûn-tô͘ thàu-mê ēng chi̍t-ê nâ á, tùi siâⁿ chhiûⁿ kā i lūi lo̍h-.khì.
9:26 Sàu-lô tī Ê-lú-sa-lèm
Sàu-lô lâi-kàu Ê-lú-sa-lèm, beh kah bûn-tô͘ kau-pôe. Chèng lâng lóng kiaⁿ i, bô siong-sìn i sī bûn-tô͘.
9:27 Chí-ū Ba-ná-ba chhōa Sàu-lô lâi kìⁿ sù-tô͘, kā in soat-bêng i tī lō͘ tiong án-chóaⁿ khòaⁿ tio̍h Chú, Chú án-chóaⁿ kah i kóng-ōe, í-ki̍p i tòa Ta-má-su-ko án-chóaⁿ hó-táⁿ hōng Chú ê miâ lâi thoân hok-im.
9:28 Sàu-lô tī Ê-lú-sa-lèm kah sù-tô͘ ū chhut ji̍p-lâi óng, hōng Chú ê miâ hó-táⁿ thoân hok-im.
9:29 I mā kah kóng Hi-la̍h ōe ê Iô-tá-iah lâng kóng-ōe piān-lūn; hiahê lâng iáu koh put-sî kè-bô͘ beh kā i thâi.
9:30 Sìn-tô͘ chai-iáⁿ chit-ê tāichì, chiū chhōa i lo̍h-khì Kai-sa-lī-a, sàng i tńg-khì Tà-soh.
9:31 Hit sî, choân Iô-tá-iah, Ga-lí-la-iah séng kah Sa-má-lī-a ê kàu-hōe lóng ū pêng-an, ná lâi ná kian-kò͘ hoat-tián. In só͘ kiâⁿ só͘ chò lóng kèng-ùi Chú, tit tio̍h Sèng Sîn ê kó͘-bú, sìn-tô͘ jîn-sò͘ it-ti̍t ke-thiⁿ.
9:32 Piat-tò͘ i-tī Ai-né-iah
Piat-tò͘ khì ta̍k só͘-chāi hóng-būn, mā ū hóng-būn tòa tī Lu̍h-tah ê sìn-tô͘.
9:33 I tī hia tú tio̍h chi̍t-ê lâng, miâ kiò-chò Ai-né-iah; chit-ê lâng hoān tio̍h piàn-sūi, í-keng tó tī bîn-chhn̂g peh nî.
9:34 Piat-tò͘ kā i kóng, " Ai-né-iah, I-é-su Ki-tok kā lí i hó à, khí-.lâi, chéng-tùn lí kakī ê pho͘-á. " Ai-né-iah sûi-sî khí-lâi kiâⁿ.
9:35 Só͘-ū tòa tī Lu̍h-tah kah Sat-lûn ê lâng lóng ū khòaⁿ tio̍h ánne, chiū lâi kui Chú.
9:36 Tol-ka Hoe-ho̍k Oa̍h-miā
Tī Io̍p-pe ū chi̍t-ê lú sìn-tô͘, miâ kiò-chò Ta-bí-thah, Hi-la̍h ōe kiò-chò " Tol-ka", to̍h-sī lo̍k-á ê ì-sù. I chò chin chē hó tāichì, koh chín-chè sànchhiah lâng.
9:37 I phòa-pēⁿ sí-.khì, lâng sé i ê sin-si, kā i hē tī lâu-téng ê pâng-keng.
9:38 In-ūi Lu̍h-tah lī Io̍p-pe bô hn̄g, bûn-tô͘ thiaⁿ tio̍h Piat-tò͘ tī hia, chiū chhe nn̄g-ê lâng khì chhōe i, kiû kóng, " Chhiáⁿ lâi goán hia, m̄ thang iân-chhiân. "
9:39 Piat-tò͘ chiū sûi-sî kah in khì, khì-kàu-ūi chiū ū lâng chhōa i khì lâu-téng ê pâng-keng. Chèng kóaⁿ-hū khiā tī Piat-tò͘ ê sin piⁿ teh háu, kā Tol-ka kah in chò-hóe ê sî só͘ chò ê saⁿ-khò͘ hō͘ i khòaⁿ.
9:40 Piat-tò͘ chiū kiò in lóng chhut-.khì, kūi lo̍h-.khì, kî-tó, jiân-āu oa̍t tńg-sin tùi sin-si kóng, " Ta-bí-thah, khí-.lâi. " Tol-ka ê ba̍k-chiu thí-khui, khòaⁿ tio̍h Piat-tò͘, chiū khí-lâi chē.
9:41 Piat-tò͘ chhun chhiú kā i hû khí-.lâi, kiò hiahê sìn-tô͘ kah kóaⁿ-hū ji̍p-.lâi, kā koh-oa̍h ê Tol-ka kau hō͘ in.
9:42 Choân Io̍p-pe ê lâng lóng chai chit-hāng tāichì, chiū ū chin chē lâng sìn Chú.
9:43 Piat-tò͘ tī Io̍p-pe kah chi̍t-ê chè-phôe sai-hū Sí-mòng chò-hóe tòa chin chē ji̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。