使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
1:1 Koh-oa̍h ê I-é-su kah Sù-tô͘
Kèng-ài ê Thê-o-hui-lô tāi-jîn, tī góa siá ê thâu-chi̍t pún chheh ū kì-chài I-é-su tùi khí-thâu só͘ chò kah só͘ kà-sī ê tāichì,
1:2 It-ti̍t kàu I thong-kòe Sèng Sîn ê tōa-lêng, kà-sī só͘ kéng-soán ê sù-tô͘ liáu-āu, siū chiap chiūⁿ thiⁿ ê ji̍t.
1:3 I-é-su siū hāi liáu-āu, ū ēng chin chē chèng-kì hián-bêng I iáu oa̍h-.leh. Tī sì-cha̍p kang ê tiong-kan, I hián-hiān hō͘ sù-tô͘ khòaⁿ, tùi in kóng-khí Siōng-tè kok-tō͘ ê tāichì.
1:4 I-é-su kah sù-tô͘ chò-hóe ê sî, kā in hoan-hù kóng, " M̄-thang lī-khui Ê-lú-sa-lèm, chiàu góa chêng kā lín kóng ê, lín tio̍h thèng-hāu Thiⁿ-pē ê èng-ín.
1:5 Iô-há-neh ēng chúi kā lâng sé-lé, m̄ koh koh bô kúi ji̍t, lín ē siū Sèng Sîn ê sé-lé. "
1:6 I-é-su Chiūⁿ Thiⁿ
Sù-tô͘ kah I-é-su chū-chi̍p ê sî, mn̄g kóng, " Chú ah, Lí beh tī chitmá hôe-ho̍k I-su-la-el ê ông-kok, sī-.bô? "
1:7 I-é-su ìn kóng, " Sî-kan kah ji̍t-kî sī Thiⁿ-pē kakī ê koân-pèng só͘ koat-tēng ê, m̄-sī lín ē-tàng chai ê.
1:8 M̄ koh, Sèng Sîn lîm-kàu lín ê sî, lín ē tit tio̍h lêng-le̍k, thang tī Ê-lú-sa-lèm, Iô-tá-iah choân tē kah Sa-má-lī-a, it-ti̍t kàu thiⁿ-piⁿ hái-kak, ūi góa lâi chò kiàn-chèng. "
1:9 Chiahê ōe kóng soah, in teh khòaⁿ ê sî, I-é-su siū chiap chiūⁿ thiⁿ; ū hûn chiap I khì, in chiū bô khòaⁿ-kìⁿ I.
1:10 In iáu teh chù-ba̍k khòaⁿ I-é-su chiūⁿ thiⁿ ê sî, hut-jiân ū nn̄g-ê chhēng pe̍h-saⁿ ê lâng khiā tī in sin piⁿ,
1:11 Kóng, " Ga-lí-la-iah lâng, lín ná ē khiā tī chia teh khòaⁿ thiⁿ? chit ūi lī-khui lín siū chiap chiūⁿ thiⁿ ê I-é-su, lín khòaⁿ I ánne chiūⁿ thiⁿ, I mā ē chiàu ánne koh lâi. "
1:12 Sù-tô͘ tī Ê-lú-sa-lèm
Jiân-āu hiahê sù-tô͘ tùi hit-ê kiò-chò Kaⁿ-ná soaⁿ ê só͘-chāi tńg-khì Ê-lú-sa-lèm. Kaⁿ-ná soaⁿ lī Ê-lú-sa-lèm iok chi̍t kong-lí, sī An-hioh-ji̍t ē tit thang kiâⁿ ê lō͘-thêng.
1:13 In ji̍p siâⁿ liáu-āu, chiū peh khí-lih in tòa ê lâu-téng tōa thiaⁿ. Tī hia ū Piat-tò͘, Iô-há-neh, Iâ-kop, An-to-le̍h, Hui-li̍p-pò͘ kah Tho-má-suh, Ba-tho-lô-mái kah Má-thài, Al-hoa-ioh ê kiáⁿ Iâ-kop kah Se-lô-tí ê Sí-mòng, í-ki̍p Iâ-kop ê kiáⁿ Iô-tah.
1:14 Chiahê lâng kah kúi-nā-ê hū-jîn-lâng, í-ki̍p I-é-su ê lāu-bú Mâ-lí-ah, chham I ê hiaⁿ-tī, lóng tâng-sim ha̍p-ì pek-chhiat kî-tó.
1:15 Kéng-soán Chhú-tāi Iô-tah ê Sù-tô͘
Bô kúi ji̍t āu, chha-put-to ū chi̍t-pah jī-cha̍p-ê sìn-tô͘ teh chū-chi̍p ê sî, Piat-tò͘ khiā khí-lâi kóng,
1:16 " Hiaⁿ-tī chí-mōe, Sèng Sîn thong-kòe Ta-bi̍t ê chhùi só͘ ī-giân, koan-hē Iô-tah chhōa lâng lia̍h I-é-su ê tāichì it-tēng tio̍h èng-giām.
1:17 Iô-tah pún-lâi sī goán tiong-kan ê chi̍t-ê, koh ū hūn kah goán chò-hóe kang-chok.
1:18 " Taⁿ chit-ê lâng ēng i chò put-gī ê tāichì só͘ tit tio̍h ê kang-chîⁿ bé chi̍t tè tē, i tò-thâu-chai sí tī hia, pak-tó͘ piak-li̍h, tn̂g-á-tō͘ lóng lâu chhut-.lâi.
1:19 Tòa tī Ê-lú-sa-lèm ê lâng lóng chai chit-hāng tāichì, só͘-í, chiàu in ê ōe kā hit tè tē kiò-chò A-kek-tāi-má, to̍h-sī ' hoeh-hn̂g' ê ì-sù.
1:20 In-ūi Si-phian ū kì-chài, Hō͘ i ê chhù pha-hng, bô lâng tī hia tòa. (chù, SPh 69:25) Koh ū kì-chài, Tio̍h hō͘ pa̍t lâng lâi tāi-thè i ê chit-bū. (chù, SPh 109:8)
1:21 " Só͘-í, lán tio̍h tī tùi-thâu kàu-bóe lóng kah lán chò-hóe ê lâng tiong-kan, soán chi̍t-ê lâi kah goán tàu-tīn chò I-é-su koh-oa̍h ê kiàn-chèng-jîn.
1:22 Hitê lâng tio̍h tùi Iô-há-neh kiâⁿ sé-lé khai-sí, kàu I-é-su lī-khui lán siū chiap hit ji̍t, lóng ū tiāⁿtiāⁿ kah goán chò-tīn ê lâng. "
1:23 In chiū thê-miâ nn̄g lâng, chi̍t-ê sī kiò-chò Ba-sà-bah, mā kiò-chò Iû-sú-toh ê Iô-sé-huh, koh chi̍t-ê sī Mat-thi-iah.
1:24 In chiū kî-tó, kóng, " Chú ah, Lí chai ta̍k lâng ê sim, kiû Lí chí-sī goán, chit nn̄g-ê lâng tiong-kan tó chi̍t-ê sī Lí kéng-soán,
1:25 Beh lâi tam-tng sù-tô͘ ê chit-hūn. In-ūi Iô-tah hòng-khì chit-ê chit-hūn, khì kiâⁿ kakī ê lō͘. "
1:26 Jiân-āu in liam-khau liam tio̍h Mat-thi-iah, i chiū ka-ji̍p cha̍p-it-ê sù-tô͘ ê hâng-lia̍t.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。